ତାଳଚେର,୧୮।୭( ମନୋଜ ନନ୍ଦ): ଅନୁଗୋଳ ଜିଲା ତାଳଚେର ଏକ କୋଇଲା ଖଣିର ଜଣେ ଡମ୍ଫର ଅପରେଟରଙ୍କ ମଙ୍ଗଳବାର ସାଇଲୋ ଅଫିସ ନିକଟରେ ମୃତ୍ୟୁ ଘଟିଛି। ସେ ହେଲେ ବଲଣ୍ଡାର ସୁଶାନ୍ତ କୁମାର ପ୍ରଧାନ । ସୁଶାନ୍ତ ନିଜେ ଚଳାଉଥିବା ଡମ୍ଫର ନିଜ ଉପରେ ମାଡି ଯିବାରୁ ତାଙ୍କର ମୃତ୍ୟୁ ଘଟିଛି ।ବ୍ରେକଫେଲ୍ ହେବା ଯୋଗୁ ଡମ୍ଫର ଟି ତାଙ୍କ ଉପରେ ମାଡି ଯାଇଥିବା କୁହାଯାଉଛି । ଦୁର୍ଘଟଣା ପରେ ଖଣି କାର୍ଯ୍ୟ ସମ୍ପୂର୍ଣ୍ଣ ବନ୍ଦ ରହିଛି । ଖଣି ସୁରକ୍ଷା ବିଭାଗ ଓ ଖଣି କର୍ତ୍ତୃପକ୍ଷ ସୁରକ୍ଷା ପ୍ରତି ଅବହେଳା କରୁଥିବାରୁ ଖଣିରେ ବାରମ୍ବାର ଦୁର୍ଘଟଣା ଘଟି ଶ୍ରମିକମାନଙ୍କ ଅକାଳ ମୃତ୍ୟୁ ହେଉଛି ବୋଲି ଶ୍ରମିକମାନେ ଅଭିଯୋଗ କରିଛନ୍ତି । ଖବର ପାଇ ଖଣି କର୍ତ୍ତୃପକ୍ଷ, ପୋଲିସ, ଶ୍ରମିକ ନେତା ଓ ଖଣି କର୍ମଚାରୀମାନେ ଘଟଣାସ୍ଥଳରେ ପହଞ୍ଚିଛନ୍ତି । ଏହାକୁ ନେଇ ଚପା ଉତ୍ତେଜନା ଲାଗି ରହିଛି ।
