ମହିଳାମାନଙ୍କ ପାଇଁ ସତର୍କ ଏବଂ ସୁରକ୍ଷାପୂର୍ଣ୍ଣ ସମାଜ ଲାଗି ସବୁବେଳେ କାମନା କରି ଆସିଛି। ମଣିଷ ଭାବେ ମହିଳା ଏବଂ ପୁରୁଷ ଦୁହେଁ ସମାନ। ଏବେ ବି ମହିଳାଙ୍କୁ ତାଙ୍କର ନ୍ୟାଯ୍ୟ ମର୍ଯ୍ୟାଦା ଦିଆଯାଇ ପାରୁନାହିଁ ବୋଲି ସାହିତି୍ୟକା ପାରମିତା ଶତପଥୀ କହିଛନ୍ତି। ଅନ୍ତର୍ଜାତୀୟ ମହିଳା ଦିବସ ଅବସରରେ ସେ କହିଛନ୍ତି ଯେ, ନାରୀମାନଙ୍କ ପାଇଁ ଏକ ଅଧିକ ସୁରକ୍ଷାପୂର୍ଣ୍ଣ ତଥା ସମାନତା ରୂପକ ସମାଜ ଓ ପୃଥିବୀ ମିଳିବା ଆବଶ୍ୟକ। ଦୁଃଖର କଥା ନାରୀମାନଙ୍କୁ ନିଜର ସୁରକ୍ଷା ପାଇଁ ଏବେ ବି ଭାବିବାକୁ ପଡୁଛି। ଜଙ୍ଗଲ ଭିତରେ ଗୋଟେ ହରିଣ ସବୁବେଳେ ଭାବେ ଯେ ମୁଁ କାଳେ ବାଘର ଶିକାର ହୋଇଯିବି। କିନ୍ତୁ ଏକ ସଭ୍ୟ ସମାଜରେ କାଳେ ବିପଦରେ ପଡିବ ବୋଲି ନାରୀକୁ ସବୁବେଳେ ସତର୍କ ହେବାକୁ ପଡେ। ବାପା, ଭାଇ, ସ୍ବାମୀ ସବୁବେଳେ ଯେ ସୁରକ୍ଷା ଦେବେ ତାହା ନୁହେଁ। ନାରୀମାନେ ପ୍ରତି କ୍ଷେତ୍ରରେ ପୁରୁଷଙ୍କ ସହ କାନ୍ଧ ମିଳାଇ ଆଗେଇଲେଣି। ମାତ୍ର ପୁରୁଷଙ୍କ ପରି ସେ ସ୍ବାଧୀନ କିମ୍ବା ସୁରକ୍ଷିତ ନୁହଁନ୍ତି। ନିର୍ଦ୍ଧାରିତ ସମୟରେ ଘରକୁ ଫେରିବା, ଜୁଡ଼ୋ କରାଟେ ଶିଖିବା ସୁରକ୍ଷା ପାଇଁ ମାପଦଣ୍ଡ ନୁହେଁ। ନାରୀଙ୍କ ସୁରକ୍ଷା ପାଇଁ ସମାଜର ମନୋଭାବ ବଦଳାଇବାକୁ ପଡିବ।
ଓଡ଼ିଆ କଥା ସାହିତ୍ୟର ଅନ୍ୟତମ ପରିଚୟ ପାରମିତା ଶତପଥୀ। ଓଡ଼ିଆ ଗଳ୍ପ, ଉପନ୍ୟାସରେ ସେ ଏକ ପରିଚିତ ଚେହେରା। ପିଲାଟିବେଳୁ ସାହିତି୍ୟକ ପରିବେଶରେ ରହି ଆସିଥିବାରୁ ଖୁବ୍ କମ୍ ବୟସରୁ ସାହିତ୍ୟ ପ୍ରତି ଅନୁରାଗ ବଢିଥିଲା। ଏହା ମଧ୍ୟରେ ସେ ଏକାଧିକ ଗଳ୍ପ, ଉପନ୍ୟାସ ରଚନା କରି ସାରିଛନ୍ତି। ୧୯୬୫ ମସିହା ଅଗଷ୍ଟ ୩୦ ତାରିଖରେ ଜନ୍ମ ଗ୍ରହଣ କରିଥିବା ପାରମିତା ସାହିତ୍ୟ ଏକାଡେମୀ ପୁରସ୍କାର ବିଜେତା କବି ପ୍ରତିଭା ଶତପଥୀ ଏବଂ ନିତ୍ୟାନନ୍ଦ ଶତପଥୀଙ୍କ କନ୍ୟା। ୧୯୮୯ରେ ଭାରତୀୟ ରାଜସ୍ବ ସେବାରେ ଯୋଗ ଦେଇଥିବା ପାରମିତା ଏବେ ଆୟକର ବିଭାଗର କମିଶନର ଭାବେ କାର୍ଯ୍ୟରତ ଅଛନ୍ତି। ଏଥିସହ ଓଡ଼ିଆ ସାହିତ୍ୟକୁ ମଧ୍ୟ ଋଦ୍ଧିମନ୍ତ କରିଛନ୍ତି।
