ନୂଆଦିଲ୍ଲୀ: ବଲିଉଡ଼ର ମହାନାୟକ ଅମିତାଭ ବଚ୍ଚନ ନିଜର ନାମ, ଫଟୋ ଏବଂ କଣ୍ଠସ୍ୱରର ଅନଧିକୃତ ବ୍ୟବହାରକୁ ରୋକିବା ପାଇଁ ଦୀର୍ଘ ଦିନ ହେବ ଆଇନଗତ ଲଢ଼େଇ ଜାରି ରଖିଛନ୍ତି। ଏହି ମାମଲାରେ ବର୍ତ୍ତମାନ ଦିଲ୍ଲୀ ହାଇକୋର୍ଟ ଏକ ନୂତନ ନିର୍ଦ୍ଦେଶ ଜାରି କରିବା ପରେ ଅଭିନେତାଙ୍କ ବ୍ୟକ୍ତିତ୍ୱ ଅଧିକାର (Personality Rights) ମାମଲା ପୁଣିଥରେ ଚର୍ଚ୍ଚାକୁ ଆସିଛି। ବିଭିନ୍ନ ବ୍ୟକ୍ତି ଏବଂ କମ୍ପାନିଗୁଡ଼ିକ ବିନା ଅନୁମତିରେ ବ୍ୟବସାୟିକ ଲାଭ ପାଇଁ ତାଙ୍କ ପରିଚୟର ଦୁରପ୍ରୟୋଗ କରୁଥିବା ଅଭିଯୋଗ କରି ବିଗ୍ ବି କୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଜଷ୍ଟିସ୍ ପୁରୁଷେନ୍ଦ୍ର କୁମାର କୌରବଙ୍କ ପୀଠ ଏହି ମାମଲାର ଶୁଣାଣି କରି ନିର୍ଦ୍ଦେଶ ଜାରି କରିଛନ୍ତି।
ଶୁଣାଣି ସମୟରେ ଉଭୟ ପକ୍ଷ କୋର୍ଟକୁ ଜଣାଇଥିଲେ ଯେ, ନଭେମ୍ବର ୨୦୨୨ରେ କୋର୍ଟ ଅମିତାଭ ବଚ୍ଚନଙ୍କ ବ୍ୟକ୍ତିତ୍ୱ ସମ୍ବନ୍ଧୀୟ ଅଧିକାରଗୁଡ଼ିକର ସୁରକ୍ଷା ପାଇଁ ଏକତରଫା ଅନ୍ତର୍ବର୍ତ୍ତୀକାଳୀନ ରୋକ ଆଦେଶ ଦେଇଥିଲେ। ଏହା ସତ୍ତ୍ୱେ ଉଭୟ ପକ୍ଷ ମଧ୍ୟସ୍ଥତା ଜରିଆରେ ପରସ୍ପର ସହମତିରେ ବିବାଦ ସମାଧାନ କରିବାକୁ ଚେଷ୍ଟା କରିଥିଲେ। କିଛି ପ୍ରତିବାଦୀଙ୍କ ସହ ବୁଝାମଣା ହୋଇଥିଲେ ମଧ୍ୟ ଅମିତାଭ ବଚ୍ଚନଙ୍କ ପକ୍ଷରୁ କିଛି ବ୍ୟବସ୍ଥାଗତ ଅସୁବିଧା ଯାଗାରୁ ବୁଝାମଣାପତ୍ରରେ ଆନୁଷ୍ଠାନିକ ଭାବେ ସ୍ୱାକ୍ଷର ହୋଇପାରି ନଥିଲା।
ଏହି ପରିପ୍ରେକ୍ଷୀରେ ଅମିତାଭ ବଚ୍ଚନଙ୍କ ଓକିଲ ଧ୍ରୁବ ଆନନ୍ଦ ଆବଶ୍ୟକୀୟ ଆନୁଷ୍ଠାନିକତା ପୂରଣ କରିବା ଏବଂ ବୁଝାମଣାକୁ କୋର୍ଟଙ୍କ ରେକର୍ଡରେ ଦାଖଲ କରିବା ପାଇଁ ସମୟ ମାଗିଥିଲେ। କୋର୍ଟ ଏଥିପାଇଁ ଆସନ୍ତା ନଭେମ୍ବର ୧୬ ତାରିଖ ପର୍ଯ୍ୟନ୍ତ ସମୟ ପ୍ରଦାନ କରିଛନ୍ତି। ସେହିପରି କୋର୍ଟ ସ୍ପଷ୍ଟ କରିଛନ୍ତି ଯେ, ଯଦି ବୁଝାମଣା ସମ୍ପୂର୍ଣ୍ଣ ନ ହୁଏ କିମ୍ବା ଅନ୍ତିମ ରୂପ ନ ନିଏ, ତେବେ ଅମିତାଭ ବଚ୍ଚନଙ୍କୁ ଆଗାମୀ ଶୁଣାଣିରେ ବ୍ୟକ୍ତିଗତ ଭାବେ ହାଜର ହେବାକୁ ପଡ଼ିବ, ଯଦି ସେ ମକଦ୍ଦମାରେ ଉଠାଯାଇଥିବା କୌଣସି ଦାବି କିମ୍ବା ପ୍ରସଙ୍ଗରେ ଆଗକୁ କାର୍ଯ୍ୟାନୁଷ୍ଠିତ ହେବାକୁ ଚାହାଁନ୍ତି।
ସୂଚନାଯୋଗ୍ୟ ଯେ, ଅମିତାଭ ବଚ୍ଚନ ୨୦୨୨ ମସିହାରେ ନିଜର ପର୍ସନାଲିଟି ରାଇଟ୍ସ (Personality Rights) ର ସୁରକ୍ଷା ପାଇଁ ଦିଲ୍ଲୀ ହାଇକୋର୍ଟରେ ଏକ ମାମଲା ଦାୟର କରିଥିଲେ। ଏଥିରେ ସେ ତାଙ୍କର ନାମ, ଫଟୋ, କଣ୍ଠସ୍ୱର ଏବଂ ପରିଚୟର ବିନା ଅନୁମତିରେ ବ୍ୟବହାର କରାଯାଉଥିବା ନେଇ ଦୃଢ଼ ଆପତ୍ତି ଜଣାଇଥିଲେ। କିଛି ମୋବାଇଲ୍ ଆପ୍ ଏବଂ ବ୍ୟବସାୟୀ ଲଟେରୀ ଏବଂ ଅନ୍ୟାନ୍ୟ କାର୍ଯ୍ୟକଳାପକୁ ପ୍ରୋତ୍ସାହିତ କରିବା ପାଇଁ ତାଙ୍କ ପରିଚୟର ଅପବ୍ୟବହାର କରୁଥିବା ନେଇ ଅଭିନେତା ଅଭିଯୋଗ କରିଥିଲେ।
