ଅନେକ ସମୟରେ ଦେଖାଯାଏ ଝିଅ ହିଁ ଝିଅର ଶତ୍ରୁ ହୋଇଥାଏ। ତେଣୁ ଏଭଳି ଭାବନାରୁ ଦୂରେଇରହିବା ଜରୁରୀ। ସମସ୍ତଙ୍କ ପ୍ରତି ସମାନ ମନୋଭାବ ଆଣିବା ଆବଶ୍ୟକ। ଏଥିସହ ମା’ ବାପାମାନେ ଝିଅଙ୍କୁ ଆତ୍ମସୁରକ୍ଷା ଶିଖାଇବା ଉଚିତ। ବର୍ତ୍ତମାନ ପରିସ୍ଥିତିରେ ନାରୀଟିଏ ନିଜ ସୁରକ୍ଷା ନିଜେ କରିପାରୁଥିବା ଦରକାର। ବାହାରକୁ ଯିବା ସମୟରେ ଦୁର୍ଘଟଣାରୁ ବର୍ତ୍ତିବା ପାଇଁ ଆବଶ୍ୟକ ଜିନିଷ ସାଙ୍ଗରେ ନେଇ ଯିବା ଆବଶ୍ୟକ ବୋଲି ଅନ୍ତର୍ଜାତୀୟ ମହିଳା ଦିବସ ଉପଲକ୍ଷେ କଣ୍ଠଶିଳ୍ପୀ ନାଭ୍ୟା ଜୟତି କହିଛନ୍ତି।
ଓ୍ବେଷ୍ଟର୍ନ ସଙ୍ଗୀତ ଜଗତର ଜଣାଶୁଣା ଚେହେରା ହେଉଛନ୍ତି ନାଭ୍ୟା। ଓଡ଼ିଶାରେ ୱେଷ୍ଟର୍ନ ମ୍ୟୁଜିକକୁ ଲୋକପ୍ରିୟ କରାଇବା ପାଇଁ ସେ ଉଦ୍ୟମ ଚଳାଉଛନ୍ତି। ୧୯୮୯ ଜୁଲାଇ ୨୪ରେ ସେ କୋଲକାତାରେ ଜନ୍ମ ହୋଇଥିଲେ ବି କିଛିଦିନ ପରେ ପରିବାର ସହ ଆସି ବ୍ରହ୍ମପୁରକୁ ଚାଲି ଆସିଥିଲେ। ପରବର୍ତ୍ତୀ ସମୟରେ ସଙ୍ଗୀତରେ କ୍ୟାରିୟର କଲେ। ତେବେ ଓଡ଼ିଶାବସୀଙ୍କ ଭଲପାଇବା ତାଙ୍କୁ ଏତେ ଆକର୍ଷିତ କରିଥିଲା ଯେ, ସେ ମୁମ୍ବାଇ ଯାଇଥିଲେ ମଧ୍ୟ ଓଡ଼ିଶାରେ ହିଁ ବେଶି ସଙ୍ଗୀତ ଗାଇଛନ୍ତି। ଏଠାରେ ଗୀତ ଗାଇବା ଫଳରେ ତାଙ୍କୁ ଆତ୍ମୀୟତା ମିଳିଥାଏ ବୋଲି ସେ କହିଛନ୍ତି। ୱେଷ୍ଟର୍ନ ସଙ୍ଗ୍ ସହ ନାଭ୍ୟା ରୋମାଣ୍ଟିକ ଓ ପୁରୁଣା ଗୀତଗୁଡ଼ିକୁ ନିଜ ଆନ୍ଦାଜରେ ଗାଇବାକୁ ପସନ୍ଦ କରନ୍ତି। ତେବେ ଷ୍ଟେଜ୍ ଶୋ’ ତାଙ୍କୁ ଲୋକପ୍ରିୟ କରିବାରେ ସାହାଯ୍ୟ କରିଥିଲା। ସେ କୁହନ୍ତି, ଓଡ଼ିଶାରେ ୱେଷ୍ଟର୍ନ ସଙ୍ଗୀତ ପାଇଁ ବହୁ ସୁଯୋଗ ଅଛି। ମାତ୍ର ଦୁଃଖର କଥା ସଙ୍ଗୀତ ସାଧନାରେ ଅଭାବ ରହୁଛି। ଏବେ ଯୁବପିଢ଼ି ସଙ୍ଗୀତ ହେଉ କି ଫିଲ୍ମ ଉପରେ ନୂଆ କିଛି କରି ଦେଖାଇବାକୁ ଚେଷ୍ଟା କରୁଛନ୍ତି। ଆଇଲାରେ ଝୁଲୁରୁ ବାଲି, ଦେ ପ୍ରେମର ପିୟାଲା, ପାତଲଘଣ୍ଟା, ଚୁ ଚୁ ଚୁ, ଦେଶୀ କୁକୁଡ଼ା, ମୁଁ ଝିଅ ଇଡିଅଟରେ, ପ୍ୟାର୍ ୱାଲା, ଲଭ୍ କରି ଘରୁ ପଳେଇ ଆସିଛି, ଡିଅର ଡାର୍ଲୁ ଭଳି ଅନେକ ସଙ୍ଗୀତରେ ନିଜ ସ୍ବରର ଝଲକ ଦେଖାଇଛନ୍ତ ନାଭ୍ୟା।
-ଶର୍ମିଷ୍ଠା ପାଣିଗ୍ରାହୀ
