ଭୋପାଳ: ମଧ୍ୟ ପ୍ରଦେଶ ଦାମୋହ ଜିଲା ଗାଇସାବାଦ୍ ପଞ୍ଚାୟତ ନିର୍ବାଚନକୁ ନେଇ ଏକ ରୋଚକ ଖବର ସାମ୍ନାକୁ ଆସିଛି। ନିକଟରେ ପଞ୍ଚାୟତ ନିର୍ବାଚନ ଫଳାଫଳ ପ୍ରକାଶ ପାଇଛି। ବିଜୟୀ ପ୍ରାର୍ଥୀଙ୍କ ପାଇଁ ଶପଥ ଗ୍ରହଣ ସମାରୋହର ଆୟୋଜନ ମଧ୍ୟ କରାଯାଇଛି। କିନ୍ତୁ ଜିତିଥିବା ମହିଳାଙ୍କ ବଦଳରେ ସେମାନଙ୍କ ସ୍ବାମୀମାନେ ଶପଥ ନେଇଛନ୍ତି। ତେବେ ରାଜ୍ୟରେ ଏ ଘଟଣା ଚର୍ଚ୍ଚାର ବିଷୟ ପାଲଟିଛି। ବିଜୟୀ ମହିଳାଙ୍କ ସ୍ବାମୀମାନେ ଶପଥ ନେବା ଘଟଣା ପଦାକୁ ଆସିବା ପରେ ଜିଲା ଅଧିକାରୀ ପଞ୍ଚାୟତ ଅଫିସରଙ୍କୁ ରିପୋର୍ଟ ମାଗିଛନ୍ତି।
ଅନୁସୂଚିତ ବର୍ଗର ଜଣେ ମହିଳା ପ୍ରାର୍ଥିନୀ ସରପଞ୍ଚ ନିର୍ବାଚନରେ ଜିତିଥିବାବେଳେ ଆଉ କେତେ ଜଣ ମହିଳା ଅନ୍ୟପଦ ଗୁଡ଼ିକ ପାଇଁ ଜିତିଛନ୍ତି। ଶପଥ ଗ୍ରହଣ ଉତ୍ସବରେ ବିଜୟୀ ମହିଳାଙ୍କ ବଦଳରେ ସେମାନଙ୍କ ସ୍ବାମୀ ଶପଥ ନେବା ଅଭିଯୋଗ ହେବା ପରେ ସେମାନଙ୍କୁ ଅନୁମତି ଦେଇଥିବା ପଞ୍ଚାୟତ କର୍ମଚାରୀ ଫେରାର୍ ଥିବା ଜଣାପଡ଼ିଛି। ନିୟମ ବିରୋଧରେ କାର୍ଯ୍ୟ ହୋଇଥିବାବେଳେ ଯେ କେହି ବି ଏ ଘଟଣାରେ ଦୋଷୀ ସାବ୍ୟସ୍ତ ହେବେ, ତାଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଦାମୋହ ପଞ୍ଚାୟତ ସିଇଓ ଅଜୟ ଶ୍ରୀବାସ୍ତବ କହିଛନ୍ତି।
