ଆର.ଉଦୟଗିରି,୧୪।୮(ଡି.ଏନ୍.ଏ.): ବସୁଧା ଯୋଜନାରେ ସୌରଭିତ୍ତିକ ଜଳଯୋଗାଣ ପ୍ରକଳ୍ପ ଥିଲେ ମଧ୍ୟ ତାହା କାମରେ ଆସୁନି। ଫଳରେ ଦୁର୍ଗମ ଅଞ୍ଚଳରେ ଗ୍ରାମବାସୀଙ୍କ ଶୋଷ ମେଣ୍ଟାଉଛି ଚୁଆପାଣି। ମହିଳାମାନେ ଲମ୍ବା ଧାଡ଼ି କରି କାଦୁଅ ପଙ୍କ ବିଲ ହିଡ ଦେଇ ଯିବା ସହ ଚୁଆରୁ ପାଣି ସଂଗ୍ରହ କରୁଛନ୍ତି। ଗଜପତି ଜିଲା ମୋହନା ବ୍ଲକର ଦୁର୍ଗମ ଅଞ୍ଚଳ ବାଡେଗଡା ପଞ୍ଚାୟତ ଦୁଆଗୁଡା ଗାଁରେ ପ୍ରାୟ ଶତାଧିକ ପରିବାରର ୫୦୦ରୁ ଊଦ୍ଧର୍ବ ଲୋକ ବସବାସ କରନ୍ତି। ବିଶୁଦ୍ଧ ପାନୀୟ ଜଳ ଯୋଗାଣ ପାଇଁ ସରକାରଙ୍କ ବସୁଧା ଯୋଜନାରେ ସୌରଶକ୍ତି ଚାଳିତ ଜଳ ଯୋଗାଣ ପ୍ରକଳ୍ପ ଜରିଆରେ ଲକ୍ଷ ଲକ୍ଷ ଟଙ୍କା ଖର୍ଚ୍ଚ କରାଯାଇ ନଳକୂପ ଖୋଳାଯାଇଛି। ପାଣି ଟ୍ୟାଙ୍କ୍ ଓ ସୋଲାର ପ୍ଲେଟ ଖଞ୍ଜାଯାଇଛି। ୯୫ ପରିବାରକୁ ସଂଯୋଗ କରାଯାଇଛି ବୋଲି ସୂଚନା ଦର୍ଶାଯାଇଛି। ଗାଁର ବିଭିନ୍ନ ସ୍ଥାନରେ ଷ୍ଟାଣ୍ଡପୋଷ୍ଟ ପୋତାଯାଇଛି। ମାତ୍ର ପ୍ରକଳ୍ପ ନିର୍ମାଣର କିଛି ମାସ ନ ହେଉଣୁ ସୋଲାର୍ ପ୍ଲେଟ ସହ ଷ୍ଟାଣ୍ଟପୋଷ୍ଟ ଭାଙ୍ଗିଯାଇ ଲଟାବୁଦା ମାଡ଼ିଗଲାଣି। ଗ୍ରାମବାସୀ ଏହାର ପୁନରୁଦ୍ଧାର କରି ଜଳ ଯୋଗାଣ ସ୍ବାଭାବିକ କରିବାକୁ ବାରମ୍ବାର ସ୍ଥାନୀୟ ପ୍ରଶାସନ ଓ ବିଭାଗୀୟ ଅଧିକାରୀଙ୍କ ନିକଟରେ ଅଭିଯୋଗ କରି ଆସୁଥିଲେ ମଧ୍ୟ କେହି ଶୁଣୁନଥିବା ଗ୍ରାମବାସୀ କହିଛନ୍ତି। ଅପରପକ୍ଷେ ଗାଁରେ ଦୁଇଟି ନଳକୂପ ଥିବା ସହ ବିଲ ମଧ୍ୟରେ ଅସଜଡ଼ା କୂଅ ରହିଛି। ଉଭୟ କୂଅ ମରାମତି ଅଭାବରୁ ଭୁଶୁଡ଼ିବା ଅବସ୍ଥାରେ ପଡିଛି। ନଳକୂପ ପାଣି ପାନୀୟ ଜଳ ରୂପେ ବ୍ୟବହାର ଉପଯୋଗୀ ହେଉନଥିବାରୁ ମହିଳାମାନେ ଏହି ପାଣିରେ ବାସନକୁସନ ସଫା କରୁଥିବା ବେଳେ ଅସଜଡା କୂଅ ପାଣିକୁ ଗାଧୋଇବାକୁ ବ୍ୟବହାର କରୁଛନ୍ତି। ଏହି ଅଞ୍ଚଳ ଏକ ଦୁର୍ଗମ ଅଞ୍ଚଳ ହୋଇଥିବାରୁ ବର୍ଷ ବର୍ଷ ଧରି ଏମିତି ସମସ୍ୟା ଭୋଗୁଛନ୍ତି ଗ୍ରାମବାସୀ। ଶେଷରେ ବସୁଧା ହେଲ୍ପ ଲାଇନ୍ ନମ୍ବରକୁ ଫୋନ କଲେ ମଧ୍ୟ କୌଣସି ସହଯୋଗ ମିଳୁନଥିବାରୁ ଲୋକେ ବାଧ୍ୟ ହୋଇ ପାନୀୟ ଜଳ ପାଇଁ ଗ୍ରାମବାସୀ ଏଭଳି ସଂଘର୍ଷ କରୁଥିବା କହୁଛନ୍ତି । ସରକାର ଯଦି ଏଥିପ୍ରତି ଦୃଷ୍ଟି ନ ଦେବେ, ତେବେ ପି.ଗୋବିନ୍ଦପୁର ଗ୍ରାମରେ ଝାଡ଼ାବାନ୍ତି ବ୍ୟାପିବା ଭଳି ଘଟଣାର ପୁନରାବୃତ୍ତି ଘଟିବା ଆଶଙ୍କାକୁ ଏଡ଼ାଇ ଦିଆଯାଇନପାରେ।
