ବରଗଡ଼,୧୨।୫(ପ୍ରେମାନନ୍ଦ ଖମାରୀ):ବରଗଡ଼ ଜିଲାରେ ସୋମବାରରୁ ରବି ଧାନ ସଂଗ୍ରହ ପ୍ରକ୍ରିୟା ଆରମ୍ଭ ହୋଇଛି। ଅନ୍ୟପଟେ ଜିଲାର ଅନେକ ଚାଷୀ ଏପର୍ଯ୍ୟନ୍ତ ଗତବର୍ଷ ଖରିଫ୍ରେ ଅମଳ ଧାନ ବିକ୍ରି କରି ପାରି ନାହାନ୍ତି। ବିଭାଗୀୟ କର୍ମଚାରୀଙ୍କ ଅବହେଳା ଯୋଗୁ ଧାନବିକ୍ରି ପଞ୍ଜୀକରଣରୁ ବାଦ୍ ପଡ଼ି ସେମାନେ ଏଭଳି ସମସ୍ୟାର ସମ୍ମୁଖୀନ ହୋଇଛନ୍ତି ବୋଲି ଚାଷୀମାନେ ଅଭିଯୋଗ କରିଛନ୍ତି ଏବଂ ଗତ ୨ମାସରୁ ଊର୍ଦ୍ଧ୍ୱ ସମୟ ହେଲା ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାନ ଗଦା କରି ଧାରଣାରେ ବସିଛନ୍ତି। ଯେତେଦିନ ପର୍ଯ୍ୟନ୍ତ ସେମାନଙ୍କ ଖରିଫ ଧାନ ବିକ୍ରି ହେବ ନାହିଁ, ସେତେଦିନ ପର୍ଯ୍ୟନ୍ତ ସେମାନେ ଧାରଣା ଜାରି ରଖିବେ ବୋଲି ଚାଷୀମାନେ ରୋକ୍ଠୋକ୍ ଚେତାବନୀ ଦେଇଛନ୍ତି। ତେବେ ସାମବାର ଭେଡ଼େନ ପଞ୍ଚାୟତ ସମିତି ସମ୍ମିଳନୀ କକ୍ଷରେ ମିଳିତ ଜନ ଅଭିଯୋଗ ଶୁଣାଣି ଶିବିର ଚାଲିଥିବା ସମୟରେ ଏଭଳି ସମସ୍ୟାରେ ପଡ଼ିଥିବା ଅଭିଯୋଗ କରି ଜିଲାର ଭେଡ଼େନ ବ୍ଲକ ଅନ୍ତର୍ଗତ ତାଳମେଣ୍ଡା ଗ୍ରାମର ଜଣେ ଚାଷୀଙ୍କ ପୁଅ ରୋହିତ ସେଠାକୁ ପହଞ୍ଚତ୍ ଜିଲାପାଳଙ୍କଠାରେ ଇଚ୍ଛାମୃତ୍ୟୁ ପାଇଁ ଆବେଦନ କରିବା ଘଟଣା ଏବେ ଚର୍ଚ୍ଚାର ବିଷୟ ହୋଇଛି।
ଜିଲାପାଳ ଆଦିତ୍ୟ ଗୋୟଲଙ୍କୁ ଆବେଦନ ପତ୍ର ଦେଇଥିବା ଯୁବକ ଜଣକ ହେଲେ, ତାଲମେଣ୍ଡା ଗ୍ରାମର ରଣଜିତ ଭୋଇଙ୍କ ପୁଅ ରୋହିତ। ସେ ଜିଲାପାଳଙ୍କୁ ଦେଇଥିବା ଆବେଦନ ପତ୍ରରେ ଉଲ୍ଲେଖ ରହିଛି, ଗତ ୨୦ବର୍ଷ ହେଲା, ସେମାନେ ଧାନଚାଷ କରି ଆସୁଛନ୍ତି। ଅମଳ ଧାନକୁ ମଧ୍ୟ ଠିକ୍ ଭାବେ ବିକ୍ରୟ କରି ପରିବାର ପୋଷଣ କରୁଥିଲେ। କିନ୍ତୁ ପ୍ରଶାସନିକ ଅବହେଳା ଯୋଗୁ ଗତବର୍ଷ ଖରିଫରେ ଅମଳ ଧାନକୁ ସେ ବିକ୍ରି କରି ପାରି ନଥିବା ଅଭିଯୋଗ କରିଛନ୍ତି। ଅନ୍ୟପଟେ ବୃଦ୍ଧ ମାତାପିତାଙ୍କ ଔଷଧ, ପିଲାଙ୍କ ପାଠପଢ଼ା ଖର୍ଚ୍ଚ, ପୋଷାକପତ୍ର କିଣିବା ପାଇଁ ମଧ୍ୟ ଟଙ୍କା ନାହିଁ। ସେହିପରି ଚାଷକାର୍ଯ୍ୟ ପାଇଁ ଋଣ କରିଥିବା ଟଙ୍କାକୁ ମଧ୍ୟ ସେ ପୈଠ କରି ପାରୁ ନାହାନ୍ତି। ଏଭଳି ସମସ୍ୟା ଯୋଗୁ ମୌଳିକ ଆବଶ୍ୟକତାକୁ ମଧ୍ୟ ଠିକ୍ଭାବେ ପୂରଣ କରି ପାରୁ ନଥିବାରୁ ସେ ମାନସିକ ଚାପରେ ଅଛନ୍ତି ବୋଲି ଆବେଦନ ପତ୍ରରେ ଉଲ୍ଳେଖ କରିଛନ୍ତି। ଏଭଳି ସମସ୍ୟା ନେଇ ବାରମ୍ବାର ବିଭାଗୀୟ ଅଧିକାରୀଙ୍କୁ ଅବଗତ କରିବା ସହିତ ଧାନ କିଣିବା ପାଇଁ ନିବେଦନ କରିବା ସତ୍ତ୍ୱେ କିଛି ସୁଫଳ ନ ମିଳିବାରୁ ସେ ଇଚ୍ଛାମୃତ୍ୟୁ ପାଇଁ ଆବେଦନ ଭଳି ଚରମ ନିଷ୍ପତ୍ତି ନେଇଥିବା ସମ୍ପୃକ୍ତ ଚାଷୀ କହିଛନ୍ତି।
