ନୂଆଦିଲ୍ଲୀ,୨୯।୯: ୱେଷ୍ଟଇଣ୍ଡିଜ ବିପକ୍ଷ ପ୍ରଥମ ଦିନିକିଆରେ ଭାରତୀୟ ଅଧିନାୟକ ଶୁବମନ ଗିଲ ଦମଦାର ଶତକ ହାସଲ କରିଛନ୍ତି। ଡାହାଣହାତୀ ବ୍ୟାଟର୍ ଗିଲ ୧୧୦ ରନ୍ର ଚମତ୍କାର ଇନିଂସ ଖେଳିଥିଲେ। ବିରାଟ କୋହଲିଙ୍କ ସହ ମିଶି ସେ ୧୩୨ ବଲ୍ରୁ ୧୫୧ ରନ୍ର ଭାଗୀଦାରି ଗଢ଼ି ଭାରତକୁ ସହଜ ବିଜୟ ଦେଇଥିଲେ।
ଗିଲଙ୍କ ଏହି ପ୍ରଦର୍ଶନ ଏହି ପ୍ରଦର୍ଶନ ପରେ ତାଙ୍କୁ ନେଇ ଚର୍ଚ୍ଚା ଜୋର ଧରିଛି। ବ୍ୟାଟର୍ ଭାବେ ନିଜକୁ ପ୍ରମାଣିତ କରିବା ସହ ଅଧିନାୟକ ଭାବେ ମଧ୍ୟ ସେ ଦଳକୁ ଆଗେଇ ନେଉଛନ୍ତି। ତେବେ ପୂର୍ବତନ ଭାରତୀୟ କ୍ରିକେଟର୍ ରବିଚନ୍ଦ୍ରନ ଅଶ୍ୱିନଙ୍କ ମତରେ, ଗିଲ ଗୋଟିଏ ଦୃଷ୍ଟିରୁ ଅନଲକି ବା ଦୁର୍ଭାଗ୍ୟଶାଳୀ।
ଅଶ୍ୱିନଙ୍କ ମତରେ, ଗିଲ ଦିନିକିଆ କ୍ରିକେଟ୍ରେ ଅତ୍ୟନ୍ତ ପ୍ରଭାବଶାଳୀ ବ୍ୟାଟର। କିନ୍ତୁ ବର୍ତ୍ତମାନ ଦିନିକିଆ ମ୍ୟାଚ ସଂଖ୍ୟା ଧୀରେଧୀରେ କମୁଥିବାରୁ ଏହି ଫର୍ମାଟ୍ରେ ଗିଲଙ୍କ ପାଇଁ ଅଧିକ ରେକର୍ଡ କରିବାର ସୁଯୋଗ ମଧ୍ୟ କମିପାରେ। ଏହା ତାଙ୍କୁ ବିରାଟ କୋହଲିଙ୍କ ଭଳି ଦିନିକିଆ କ୍ରିକେଟ୍ର ବଡ଼ ରେକର୍ଡ ନିକଟରେ ପହଞ୍ଚିବାରେ ପ୍ରଭାବ ପକାଇପାରେ।
ଗିଲଙ୍କ ସଟ ସିଲେକ୍ସନକୁ ମଧ୍ୟ ଅଶ୍ୱିନ ପ୍ରଶଂସା କରିଛନ୍ତି। ତାଙ୍କ ମତରେ, ବର୍ତ୍ତମାନ ଦିନିକିଆ କ୍ରିକେଟ୍ର ବିରାଟ କୋହଲିଙ୍କ ନିକଟତମ ଭାବେ ଯେଉଁ ବ୍ୟାଟରଙ୍କୁ ଦେଖାଯାଉଛି, ସେ ହେଉଛନ୍ତି ଗିଲ।
ଗିଲ ଦିନିକିଆ କ୍ରିକେଟ୍ରେ ୧୦ଟି ଶତକ ପୂରଣ କରିସାରିଛନ୍ତି। ସବୁଠାରୁ କମ ଇନିଂସରେ ୧୦ଟି ଦିନିକିଆ ଶତକ ହାସଲ କରିଥିବା ଭାରତୀୟ ବ୍ୟାଟର୍ ଭାବେ ସେ ରେକର୍ଡ କରିଛନ୍ତି। ବିଶ୍ୱସ୍ତରରେ ମଧ୍ୟ ସେ ଦ୍ରୁତତମ ୧୦ ଶତକ ହାସଲକାରୀଙ୍କ ମଧ୍ୟରେ ରହିଛନ୍ତି। ଗିଲ ୬୭ଟି ଦିନିକିଆ ଇନିଂସରେ ୧୦ଟି ଶତକ ହାସଲ କରିଥିବା ବେଳେ ହାଶିମ ଆମ୍ଲା ୫୭ ଏବଂ କ୍ୱିଣ୍ଟନ ଡି’କକ ୫୫ଟି ଇନିଂସରେ ଏହି ସଫଳତା ହାସଲ କରିଥିଲେ। ଗିଲ ଏପର୍ଯ୍ୟନ୍ତ ମାତ୍ର ୬୮ଟି ଦିନିକିଆ ମ୍ୟାଚ ଖେଳି ୩୪୮୯ ରନ ସଂଗ୍ରହ କରିଛନ୍ତି। ତାଙ୍କ ବ୍ୟାଟିଂ ହାରାହାରି ୬୦ରୁ ଅଧିକ। ସେ ୧୦ଟି ଶତକ ଓ ୨୦ଟି ଅର୍ଦ୍ଧଶତକ ହାସଲ କରିଥିବା ବେଳେ ତାଙ୍କ ଷ୍ଟ୍ରାଇକରେଟ ମଧ୍ୟ ପ୍ରାୟ ୧୦୧ ରହିଛି।
ଦିନିକିଆ କ୍ରିକେଟ୍ରେ ଗିଲଙ୍କ ଏହି ପ୍ରଦର୍ଶନ ତାଙ୍କ ଦକ୍ଷତାର ପ୍ରମାଣ ଦେଉଛି। ଆଗାମୀ ଦିନରେ ସେ ଏହି ଫର୍ମାଟ୍ରେ ଆଉ କେତେ ରେକର୍ଡ ନିଜ ନାମରେ କରିପାରୁଛନ୍ତି, ତାହା ଉପରେ କ୍ରିକେଟପ୍ରେମୀଙ୍କ ନଜର ରହିବ।
Dharitri – Odisha’s No.1 Odia Daily
