ବରଗଡ଼,୨୮।୬(ପ୍ରେମାନନ୍ଦ ଖମାରୀ): ବରଗଡ଼ର ପ୍ରାଚୀନ ଐତିହ୍ୟର ଚିହ୍ନଟ, ସଂରକ୍ଷଣ ଏବଂ ଏହାର ଆଧାରରେ ନୂତନ ଇତିହାସ ରଚନାର ଲକ୍ଷ୍ୟ ନେଇ ବରଗଡ଼ର ବୁଦ୍ଧିଜୀବୀମାନଙ୍କ ମିଳିତ ପ୍ରୟାସରେ ଗତ ୪ସପ୍ତାହ ଧରି ଆୟୋଜିତ ହେଉଥିବା ‘ବରଗଡ଼ ଐତିହ ପଦଯାତ୍ରା–୨୦୨୬’ର ଚତୁର୍ଥ ପର୍ଯ୍ୟାୟ ରବିବାର ସଫଳତାର ସହିତ ସମ୍ପନ୍ନ ହୋଇଯାଇଛି । ବରଗଡ଼ ସାମ୍ବାଦିକ ସଂଘର ସଭାପତି ସୁରେନ୍ଦ୍ର ହୋତାଙ୍କ ନେତୃତ୍ୱରେ ଆୟୋଜିତ ଏହି ପଦଯାତ୍ରା ରାନୀବନ୍ଧସ୍ଥିତ ଗୌରୀଶଙ୍କର ମନ୍ଦିରରେ ପୂଜାର୍ଚ୍ଚନାରୁ ଆରମ୍ଭ ହୋଇ ଗଣେଶ ମନ୍ଦିର, ପୁରୁଣା ସେଲଟେକ୍ସ କଲୋନୀସ୍ଥ ମୁକ୍ତେଶ୍ୱର ମନ୍ଦିର ପରିଦର୍ଶନ କରି ଶେଷରେ ଗାନ୍ଧୀ ସ୍ମୃତି ପାଠାଗାରରେ ଉଦଯାପିତ ହୋଇଥିଲା । ଗୌରୀଶଙ୍କର ମନ୍ଦିର ପରିସରରେ ବରିଷ୍ଠ ଆଇନଜୀବୀ ଅଚ୍ୟୁତାନନ୍ଦ ମହାପାତ୍ର ବରଗଡ଼ର ପ୍ରାଚୀନ ଇତିହାସ, ସେଣ୍ଟ୍ରାଲ ପ୍ରୋଭିନ୍ସ ସହିତ ଏହାର ସମ୍ପର୍କ ଓ ଗଡ଼ଜାତ ଅଞ୍ଚଳର ମିଶ୍ରଣର ଆଇନଗତ ପୃଷ୍ଠଭୂମି ଉପରେ ଆଲୋଚନା କରିଥିଲେ ।
ବରିଷ୍ଠ ଆଇନଜୀବୀ ତଥା ସୋସିଆଲ କ୍ଲବର ସଭାପତି ଏଡଭୋକେଟ ନିଧୁବନ ବିହାରୀ ପ୍ରସାଦ ପଣ୍ଡା ଗୌରୀଶଙ୍କର ମନ୍ଦିର, ବରଗଡ଼ ଶୀତଳଷଷ୍ଠୀ ଯାତ୍ରାର ଇତିହାସ ଓ ଆଧ୍ୟାତ୍ମିକ କ୍ଷେତ୍ରରେ ବୋଲବମ୍ ସେବା ସମିତିର ଭୂମିକା ସମ୍ପର୍କରେ ବିସ୍ତୃତ ମତ ରଖିଥିଲେ । ମୁକ୍ତେଶ୍ୱର ମନ୍ଦିରରେ ପହଞ୍ଚିବା ପରେ ମୁକ୍ତେଶ୍ୱର ସେବା ସମିତି ପକ୍ଷରୁ ପଦଯାତ୍ରୀମାନଙ୍କୁ ରିବୋଲ ଓ ହୁଳହୁଳି ମାଧ୍ୟମରେ ପାରମ୍ପରିକ ସ୍ୱାଗତ ଜଣାଯାଇଥିଲା। ସମିତିର ମୁଖ୍ୟ ନେପାଲେଶ୍ୱର ନନ୍ଦ ମୁକ୍ତେଶ୍ୱର ଓ ରାଜ ରାଜେଶ୍ୱରୀ ମନ୍ଦିରର ଇତିହାସ ସହିତ ଶିବ ପଞ୍ଚାକ୍ଷରୀ ମନ୍ତ୍ରର ପ୍ରଚାର ଏବଂ ଭୋଲାନାଥଙ୍କୁ ମାଦକ ଦ୍ରବ୍ୟ ଭୋଗ ଅର୍ପଣ ପ୍ରଥା ବିରୋଧରେ ସେମାନଙ୍କ ସାମାଜିକ ଅଭିଯାନ ସମ୍ପର୍କରେ ସୂଚନା ଦେଇଥିଲେ ।
ଏହି ଅବସରରେ ବିଶ୍ୱଶାନ୍ତି ଓ ଜଗତ କଲ୍ୟାଣ କାମନାରେ ବିଶେଷ ପୂଜା ଏବଂ ସାମୂହିକ ଆଳତି ଅନୁଷ୍ଠିତ ହୋଇଥିଲା । ଗାନ୍ଧୀ ସ୍ମୃତି ପାଠାଗାରରେ ଆୟୋଜିତ ଉଦଯାପନୀ ସମାରୋହରେ ପାଠାଗାରର ସଭାପତି ଅରୁଣ ମହାନ୍ତି ଅଧ୍ୟକ୍ଷତା କରିଥିଲେ । ସମ୍ପାଦକ ରବିନାରାୟଣ ପଣ୍ଡା ସ୍ୱାଗତ ଭାଷଣ ଦେଇଥିବାବେଳେ ବିଶିଷ୍ଟ ସାହିତ୍ୟିକ ମନୋରଞ୍ଜନ ସାହୁ ଗାନ୍ଧୀ ସ୍ମୃତି ପାଠାଗାରର ଇତିହାସ, ବରଗଡ଼ ପୁସ୍ତକ ମେଳାର ବିକାଶ ଓ ପାଠାଗାର ପ୍ରକାଶନ ସମ୍ପର୍କରେ ଆଲୋକପାତ କରିଥିଲେ । ଡ଼ଃ ତ୍ରିଲୋଚନ ପ୍ରଧାନ ବରଗଡ଼ ଐତିହ୍ୟ ପଦଯାତ୍ରାର ଉଦ୍ଦେଶ୍ୟ ଓ ସମସାମୟିକ ପ୍ରାସଙ୍ଗିକତା ବ୍ୟାଖ୍ୟା କରିଥିବାବେଳେ ବିଶିଷ୍ଟ ଗବେଷକ ଡ଼ଃ ଜଗଦୀଶ ମିଶ୍ର ପୂର୍ବ ପଦଯାତ୍ରାର ଅନୁଭୂତି ବର୍ଣ୍ଣନା କରି କହିଥିଲେ।
ଏହି ପଦଯାତ୍ରାରେ ସଂଗୃହୀତ ତଥ୍ୟ ବରଗଡ଼ର ଇତିହାସ ଗବେଷଣାକୁ ନୂଆଁ ଦିଗ ଦେବ । ଏହି ଅବସରରେ ତାଙ୍କ ରଚିତ ବରଗଡ଼ ଇତିହାସ ପୁସ୍ତକକୁ ଗାନ୍ଧୀ ସ୍ମୃତି ପାଠାଗାରକୁ ଅର୍ପଣ କରାଯାଇଥିଲା । ଜୟପ୍ରକାଶ ଶତପଥୀ, ସୁକୁମାର ବାବୁ, ଡଃ ରବିନାରାୟଣ ସାହୁ, ଡଃ ସତ୍ୟକେତନ ମହାନ୍ତି, ଲିଟୁ ମହାନ୍ତି, ଲଲିତ ମୋହନ ମେହେର, ମନୋଜ ଭୋଇ ପ୍ରମୁଖ ଆଲୋଚନାରେ ଅଂଶଗ୍ରହଣ କରିଥିଲେ । ଶେଷରେ ଆବାହକ ସୁରେନ୍ଦ୍ର ହୋତା ଧନ୍ୟବାଦ ଜ୍ଞାପନ କରି ଆଗାମୀ ଐତିହ୍ୟ ପଦଯାତ୍ରାରେ ଅଧିକରୁ ଅଧିକ ଜ୍ଞାନପିପାସୁଙ୍କୁ ସାମିଲ ହେବାକୁ ଆହ୍ୱାନ ଜଣାଇଥିଲେ ।
