ଲଣ୍ଡନ,୨୬ ।୯: ବ୍ରିଟେନରେ ହେବାକୁ ଯାଉଛି ଏକ ଭୟଙ୍କର ପରୀକ୍ଷଣ । ଜାଣିଶୁଣି ମାନବ ଶରୀରରେ କରୋନା ଭାଇରସକୁ ଛାଡି ଦିଆଯାଇ ଏହି ପରୀକ୍ଷା କରାଯିବ ବୋଲି ଜଣାପଡିଛି । ଯଦି ଏପରି ହେଲା ତେବେ ଏ ଦିଗରେ ବ୍ରିଟେନ ପ୍ରଥମ ଦେଶ ଭାବେ ପରିଗଣିତ ହେବ । ସ୍ୱେଚ୍ଛାସେବୀଙ୍କ ଉପରେ କରାଯିବାକୁ ଥିବା ଏହି ପରୀକ୍ଷଣର ମୁଖ୍ୟ ଉଦ୍ଦେଶ୍ୟ ସମ୍ଭାବିତ କରୋନା ଭାଇରସ ଭ୍ୟାକ୍ସିନର ପ୍ରଭାବକୁ ପରୀକ୍ଷା କରିବା । ଏହା ଲଣ୍ଡନରେ କରାଯିବ ବୋଲି କୁହାଯାଉଛି । ବ୍ରିଟେନ ସରକାର କହିଛନ୍ତି ସେ ହ୍ୟୁମାନ ଚ୍ୟାଲେଞ୍ଜ ଷ୍ଟଡି ଜରିଆରେ ଭ୍ୟାକ୍ସିନ ପ୍ରସ୍ତୁତ କରିବାକୁ ନେଇ ବିଚାର ବିମର୍ଷ କରୁଛନ୍ତି । ବିବିସିର ଏକ ରିପୋର୍ଟ ଅନୁଯାୟୀ, ଏପର୍ଯ୍ୟନ୍ତ ଏଭଳି କୌଣସି ଚୁକ୍ତି ସ୍ୱାକ୍ଷରିତ ହୋଇନାହିଁ । ସରକାରଙ୍କ ଜଣେ ପ୍ରବକ୍ତା କହିଛନ୍ତି ଆମେ ଆମ ସହଯୋଗୀଙ୍କ ସହ କାମ କରୁଛୁ ହେଲେ ସେମାନେ ଏହା ଜାଣିବା ପରେ ହ୍ୟୁମାନ ଚ୍ୟାଲେଞ୍ଜ ଷ୍ଟଡି ଜରିଆରେ ଭ୍ୟାକ୍ସିନ ପ୍ରସ୍ତୁତ କରିବାକୁ ନେଇ ସହଯୋଗ କରିବେ । ତେବେ ଏହାର ମୁଖ୍ୟ ଉଦ୍ଦେଶ୍ୟ ହେଉଛି ଯେତେଶୀଘ୍ର ସମ୍ଭବ କରୋନା ମହାମାରୀକୁ ମୁଳୋତ୍ପାଟନ କରିବା । ସୂଚନାଯୋଗ୍ୟ, କରୋନା ଭାଇରସ ସଂକ୍ରମଣକୁ ନେଇ ସାରା ବିଶ୍ୱରେ ଭ୍ୟାକ୍ସିନ ପ୍ରସ୍ତୁତ ଚାଲିଛି । ପାଖାପାଖି ୩୬ଟି କରୋନା ଭାଇରସ ଭ୍ୟାକ୍ସିନର କ୍ଲିନିକାଲ ଟ୍ରାଏଲ ଚାଲିଛି । ତେବେ ଅକ୍ସଫୋର୍ଡ ୟୁନିଭର୍ସିଟି, ଆମେରିକା ଓ ଚାଇନା ଭ୍ୟ।।କ୍ସିନ ଅନ୍ତିମ ପର୍ଯ୍ୟାୟରେ ଅଛି ବୋଲି କୁହାଯାଉଛି । ଅନ୍ୟପଟେ ରୁଷିଆ ପ୍ରଥମ କରୋନା ଭାଇରସ ପାଇଁ ଭ୍ୟାକ୍ସିନ ପ୍ରସ୍ତୁତ କରିଥିବା ଦାବି କରୁଥିବା ବେଳେ ଏବେବି ଏହାକୁ ନେଇ ଉଠୁଛି ନାନା ପ୍ରଶ୍ନ । ସବୁଠାରୁ ବଡ଼ କଥା ହେଲା ବ୍ରିଟେନ ଯେଉଁ ଭୟଙ୍କର ପରୀକ୍ଷଣ କରିବାକୁ ଯାଉଛି ଏ ଦିଗରେ ଯୁବବର୍ଗ ଓ ସେଚ୍ଛାସେବୀ ଆପଣାଛାଏଁ ଭାଗ ନେବାକୁ ଆଗେଇ ଆସୁଛନ୍ତି ।
