ମୁମ୍ୱାଇ,୧୮।୬: ଉଦ୍ଧବ ଠାକରେ ନିଜ ଦଳରେ ବିଭାଜନକୁ ନେଇ ପୁଣି ଥରେ ଚର୍ଚ୍ଚାରେ ଅଛନ୍ତି। କିନ୍ତୁ ଆପଣ ଜାଣନ୍ତି କି ସେ କେତେ କୋଟି ସମ୍ପତ୍ତିର ମାଲିକ ଏବଂ ତାଙ୍କ ଉପରେ ମୋଟ କେତେ ଋଣ ଅଛି?
ମହାରାଷ୍ଟ୍ର ରାଜନୀତିରେ ପୁଣି ଥରେ ଉଦ୍ଧବ ଠାକରେଙ୍କ ଅଡୁଆ ବଢ଼ୁଥିବା ଜଣାପଡ଼ୁଛି। ପଶ୍ଚିମବଙ୍ଗରେ ତୃଣମୂଳ କଂଗ୍ରେସ ପରେ ମହାରାଷ୍ଟ୍ରରେ ଉଦ୍ଧବ ଠାକରେଙ୍କ ନେତୃତ୍ୱାଧୀନ ଶିବସେନାର ଅନେକ ଏମପି ବିଦ୍ରୋହୀ ହେବା ନେଇ ଚର୍ଚ୍ଚା ଜୋର ଧରିଛି। ଖବର ମିଳିଛି ଯେ ଶିବସେନା (ୟୁବିଟି)ର ଅନେକ ସାଂସଦ ଦଳଠାରୁ ଅଲଗା ପଥ ଆପଣେଇ ପାରନ୍ତି, ଯାହାଫଳରେ ରାଜନୈତିକ ହଲଚଲ ତେଜିଯାଇଛି। ଏହି ରାଜନୈତିକ ଘଟଣାକ୍ରମ ମଧ୍ୟରେ ଲୋକଙ୍କ ନଜର ଉଦ୍ଧବ ଠାକରେଙ୍କ ବ୍ୟକ୍ତିଗତ ଏବଂ ଆର୍ଥିକ ସ୍ଥିତି ଉପରେ ମଧ୍ୟ ରହିଛି। ତାଙ୍କର ର୍ନିବାଚନୀ ଆଫିଡେଭିଟ (ହଲଫନାମା) ଅନୁଯାୟୀ, ଉଦ୍ଧବ ଠାକରେଙ୍କ ପାଖରେ ପ୍ରାୟ ୧୪୩.୨୬ କୋଟି ଟଙ୍କାର ମୋଟ ସମ୍ପତ୍ତି ଅଛି, ଯେଉଁଥିରେ ସ୍ଥାବର ଏବଂ ଅସ୍ଥାବର ଉଭୟ ପ୍ରକାରର ସମ୍ପତ୍ତି ସାମିଲ ରହିଛି।
ଜାଣିଲେ ଆଶ୍ଚର୍ଯ୍ୟ ହେବେ ଯେ ସମ୍ପତ୍ତି ସହିତ ଉଦ୍ଧବ ବାଲାସାହେବ ଠାକରେଙ୍କ ଉପରେ ପ୍ରାୟ ୧୫.୫୦ କୋଟି ଟଙ୍କାର ଦେୟ (ଋଣ) ମଧ୍ୟ ରହିଛି। ବ୍ୟାଙ୍କ ଓଭରଡ୍ରାଫ୍ଟ ଏବଂ ଅନ୍ୟାନ୍ୟ ଆର୍ଥିକ ଦାୟିତ୍ୱ ଏହି ଋଣର ଏକ ବଡ଼ ଅଂଶ ଅଟେ।
ବ୍ୟାଙ୍କ ଜମା, ସେୟାର, ମ୍ୟୁଚୁଆଲ ଫଣ୍ଡ, ବୀମା, ଅଳଙ୍କାର ଏବଂ ଅନ୍ୟାନ୍ୟ ବିନିଯୋଗକୁ ମିଶାଇ ଠାକରେ ପରିବାରର ଅସ୍ଥାବର ସମ୍ପତ୍ତିର ମୂଲ୍ୟ ପ୍ରାୟ ୬୧.୮୯ କୋଟି ଟଙ୍କା ବୋଲି କୁହାଯାଇଛି।
ଆଫିଡେଭିଟ ଅନୁଯାୟୀ, ବିଭିନ୍ନ କମ୍ପାନୀର ସେୟାର ଏବଂ ବିନିଯୋଗ ଯୋଜନାରେ ଉଦ୍ଧବ ଠାକରେଙ୍କର ବଡ଼ ଅଂଶଧନ ରହିଛି। କେବଳ ସେୟାର ଏବଂ ବିନିଯୋଗ ପୋର୍ଟଫୋଲିଓର ମୂଲ୍ୟ ହିଁ ୫୫ କୋଟି ଟଙ୍କାରୁ ଅଧିକ ବୋଲି କୁହାଯାଇଛି।
ଉଦ୍ଧବ ଠାକରେଙ୍କ ପରିବାର ପାଖରେ ସୁନା, ହୀରା, ରୂପା ଏବଂ ଅନ୍ୟାନ୍ୟ ମୂଲ୍ୟବାନ ଅଳଙ୍କାର ରହିଛି। ଏଗୁଡ଼ିକର ମୋଟ ମୂଲ୍ୟ ପ୍ରାୟ ୨.୧୧ କୋଟି ଟଙ୍କା ବୋଲି ଦର୍ଶାଯାଇଛି। ଚାଷ ଜମି, ଅଣ-କୃଷି ଜମି, ବ୍ୟବସାୟିକ ଏବଂ ଆବାସିକ ସମ୍ପତ୍ତି ସହିତ ସ୍ଥାବର ସମ୍ପତ୍ତିର ମୋଟ ବଜାର ମୂଲ୍ୟ ପ୍ରାୟ ୮୧.୩୭ କୋଟି ଟଙ୍କା ଅଟେ।
ଆଫିଡେଭିଟରେ ମୁମ୍ୱାଇର ବାନ୍ଦ୍ରା ଅଞ୍ଚଳର ଆବାସିକ ସମ୍ପତ୍ତି ବ୍ୟତୀତ ରାୟଗଡ଼ ଜିଲ୍ଲାରେ ଥିବା କୃଷି ଜମି ଏବଂ ଅନ୍ୟାନ୍ୟ ଜମିର ମଧ୍ୟ ଉଲ୍ଲେଖ ରହିଛି। ଅନେକ ସମ୍ପତ୍ତିର ମୂଲ୍ୟ କୋଟି କୋଟି ଟଙ୍କା ଆକଳନ କରାଯାଇଛି।
ତାଙ୍କ ଋଣ ମଧ୍ୟରେ ସବୁଠାରୁ ବଡ଼ ଅଂଶ ହେଉଛି ବ୍ୟାଙ୍କ ଓଭରଡ୍ରାଫ୍ଟ। ଏଚ୍ଡିଏଫ୍ସି ବ୍ୟାଙ୍କ (HDFC Bank) ଏବଂ ସାରସୱତ ବ୍ୟାଙ୍କ ସହ ଜଡ଼ିତ ଓଭରଡ୍ରାଫ୍ଟକୁ ମିଶାଇ ୧୨ କୋଟି ଟଙ୍କାରୁ ଅଧିକ ଦେୟ ରହିଛି।
