ଡେରାବିଶ, ୮ା୮(ବେବର୍ତ୍ତା ଅଜୟ ଦାସ): ରାଜ୍ୟ ଗଣଶିକ୍ଷା ବିଭାଗର କେନ୍ଦ୍ରାପଡ଼ା ଶିକ୍ଷା ଜିଲାରେ ବିଇଓଙ୍କ ଦୁଇଟି ବଦଳି ଅର୍ଡ଼ର ବିଜ୍ଞପ୍ତି ପ୍ରକାଶ ପାଇବା ପରେ ଶିକ୍ଷାବିତ୍ଙ୍କ ମହଲରେ ଅସନ୍ତୋଷ ଦେଖାଦେଇଛି। ଶିକ୍ଷା ଜିଲା ଅନ୍ତର୍ଗତ ଡେରାବିଶ ବ୍ଳକରେ ଦୀର୍ଘବର୍ଷ ହେବ ବିଇଓ ପଦବୀ ଖାଲିପଡ଼ିବା ପରେ ଗତ ୨୫ା୫ା୨୦୨୬ ଚିଠି ନଂ.୧୩୨୩୮ରେ କେନ୍ଦ୍ରାପଡ଼ା ହାଇସ୍କୁଲର ପ୍ରଧାନଶିକ୍ଷକ ମଦନ ମୋହନ କରଙ୍କୁ ଡେରାବିଶ ବିଇଓ ଭାବେ ବଦଳି କରାଯାଇଥିଲା। ମାତ୍ର ୨ମାସ ପରେ ୨୮ା୭ା୨୦୨୬ ରିଖ ଚିଠି ନଂ.୧୯୮୧୫ରେ ଅନ୍ୟ ଏକ ବଦଳି ଅର୍ଡ଼ରରେ କେନ୍ଦ୍ରାପଡ଼ା ବ୍ଳକ ଚଉଦକୁଲାଟ ଜଗନ୍ନାଥ ବିଦ୍ୟାପୀଠର ପ୍ରଧାନଶିକ୍ଷକ ରତିକାନ୍ତ ସେନାପତିଙ୍କୁ ଡେରାବିଶ ବିଇଓଭାବେ ବଦଳି ସମ୍ପର୍କିତ ବିଜ୍ଞପ୍ତି ପ୍ରକାଶ ପାଇଥିଲା। ମାତ୍ର ଏ ସମ୍ପର୍କରେ ଡେରାବିଶରେ ବିଇଓ ଭାବେ କାର୍ଯ୍ୟରତ କରଙ୍କ ନିକଟକୁ କୌଣସି ବିଭାଗୀୟ ନିର୍ଦ୍ଦେଶ ଆସି ନ ଥିବା ସେ ସୂଚନା ଦେଇଥିଲେ। ତେବେ ତା ୭ା୮ା୨୦୨୬ ଚିଠି ନଂ. ୨୦୭୮୦ରେ ଗଣଶିକ୍ଷା ବିଭାଗ ପକ୍ଷରୁ ଆଉ ଏକ ବଦଳି ଅର୍ଡ଼ର ପ୍ରକାଶ ପାଇଛି। ଏଥିରେ ପୂର୍ବରୁ ଡେରାବିଶ ବିଇଓ ଭାବେ ବଦଳି କରାଯାଇଥିବା ରତିକାନ୍ତ ସେନାପତିଙ୍କ ପୂର୍ବ ଆଦେଶ ବଦଳରେ ତାଙ୍କୁ କେନ୍ଦ୍ରାପଡ଼ା ବିଇଓ ଭାବେ ବଦଳି କରାଯାଇଛି।
ଏହାକୁ ନେଇ ଶିକ୍ଷାବିତ୍ ପ୍ରମୋଦ କୁମାର ବେହେରା ପ୍ରଶ୍ନ ଉଠାଇଛନ୍ତି। ତାଙ୍କ ସୂଚନା ଅନୁଯାୟୀ ଶୁକ୍ରବାର ବାହାରିଥିବା ବଦଳି ଆଦେଶରେ କେନ୍ଦ୍ରାପଡ଼ାରେ ଅବସ୍ଥାପିତ ବିଇଓ ନାରାୟଣ ମନ୍ତ୍ରୀ ଚଳିତ ୩୧ରେ ଅବସର ଗ୍ରହଣ କରିବେ। ବଦଳି ଆଦେଶ ଦିନଠାରୁ ଅବସର ଦିନ ମଧ୍ୟରେ ମାତ୍ର ୨୨ ଦିନ ସମୟ ରହିଛି। ଏହି ସମୟରେ ତାଙ୍କୁ ବଦଳି ନେଇ ପ୍ରଶ୍ନ ଉଠିଛି। ଶିକ୍ଷାଧିକାରୀ ପବିତ୍ର ମୋହନ ବାରିକଙ୍କୁ ତାଙ୍କ ମୋବାଇଲ ନଂ.୭୯୭୮୦୫୭୨୫୧ରେ ଯୋଗାଯୋଗ କରାଯିବାକୁ ଚେଷ୍ଟା କରାଯାଇଥିଲା। ହେଲେ ସେ ଫୋନ୍ ରିସିଭ ନ କରିବାରୁ ପ୍ରତିକ୍ରିୟା ମିଳିପାରିନାହିଁ।
