ପଟ୍ଟାଙ୍ଗି,୨।୭(ଶରତ କୁମାର ଧଳ): କୋରାପୁଟ ଜିଲା ପଟ୍ଟାଙ୍ଗି ଥାନା ଅନ୍ତର୍ଗତ ତେଲରାଇ ଛକ ନିକଟରେ ତଥା ଜାତୀୟ ରାଜପଥ କଡରେ ଦୁର୍ଘଟଣା ଘଟିଛି। ଏଥିରେ ଗୁରୁତର ଦୁଇ ଯୁବକଙ୍କୁ ସ୍ଥାନୀୟ ଲୋକେ ଉଦ୍ଧାର କରି ଆମ୍ବୁଲାନ୍ସ ଯୋଗେ ପଟ୍ଟାଙ୍ଗି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ସ୍ଥାନାନ୍ତରିତ କରିଛନ୍ତି।
ସୂଚନାନୁଯାୟୀ, ପଡୋଶୀ ଆନ୍ଧ୍ର ରାଜ୍ୟର କାକିନାଡା ଜିଲା ଅନ୍ତର୍ଗତ ଜି ମାଉଡି ଗ୍ରାମର ଦୁଇ ଯୁବକ (କେ ଆଦିତ୍ୟ ଏବଂ ଟି ବିରେନ୍ଦ୍ର) ଏକ ମୋଟର ସାଇକେଲ ନଂ AP୩୯NE ୬୫୩୭ ଯୋଗେ ଆନ୍ଧ୍ରରୁ ପଟ୍ଟାଙ୍ଗି ଆସିଥିଲେ। ଦୁହେଁ ରକ୍ତ ଜୁଡୁବୁଡୁ ଅବସ୍ଥାରେ ଉପରୋକ୍ତ ଛକ ବା ଜାତୀୟ ରାଜପଥ କଡରେ ପଡି ରହିଥିଲେ । ଉକ୍ତ ସ୍ଥାନ ଦେଇ ଯାତାୟାତ କରୁଥିବା କୈଣସି ଗାଡ଼ି ଅଟକି ଦୁହିଁଙ୍କୁ ଉଦ୍ଧାର କରି ସ୍ବାସ୍ଥ୍ୟକେନ୍ଦ୍ରକୁ ପଠାଇବା ପାଇଁ ଚେଷ୍ଟା କରି ନ ଥିଲେ । ହେଲେ ଘଟଣାସ୍ଥଳରୁ କିଛି ଦୂରରେ ରହିଥିବା ଚାଷଜମିରେ କାମ କରୁଥିବା ଲୋକମାନେ ଆମ୍ବୁଲାନ୍ସକୁ ଫୋନ କରି ଦୁହିଁଙ୍କୁ ସ୍ବାସ୍ଥ୍ୟକେନ୍ଦ୍ରକୁ ପଠାଇବାରେ ସହଯୋଗ କରିଥିଲେ। ପଟ୍ଟାଙ୍ଗି ସ୍ବାସ୍ଥ୍ୟକେନ୍ଦ୍ରରେ ଦୁହିଁଙ୍କ ପ୍ରାଥମିକ ଚିକିତ୍ସା କରାଯିବା ପରେ କୋରାପୁଟ ମେଡ଼ିକାଲ କଲେଜକୁ ସ୍ଥାନାନ୍ତରିତ କରାଯାଇଥିଲା। ଉକ୍ତ ମେଡ଼ିକାଲ କଲେଜରେ ଦୁହିଁଙ୍କ ସ୍ବାସ୍ଥ୍ୟାବସ୍ଥା ଗୁରୁତର ରହିଥିବାରୁ ସେମାନଙ୍କୁ ଆନ୍ଧ୍ର ରାଜ୍ୟର ବିଶାଖାପାଟଣା ସ୍ବାସ୍ଥ୍ୟକେନ୍ଦ୍ରକୁ ପଠାଇ ଦିଆଯାଇଥିବା ଜଣାପଡ଼ିଛି। ଅନ୍ୟପକ୍ଷରେ ଘଟଣା ସମ୍ପର୍କରେ ଖବର ପାଇ ଥାନାଧିକାରୀ ଚତୁର୍ଭୁଜ ନାୟକ
ଘଟଣା ସ୍ଥଳେ ପହଞ୍ଚି ପଡି ରହିଥିବା ମୋଟର ସାଇକେଲ କୁ ଜବତ କରି ଏହା ଦୁର୍ଘଟଣା ନା ଅନ୍ୟ କିଛି ଏବଂ ଆହତ ଦୁଇ ଯୁବକ କେଉଁ ଆଡେ ଯାଉଥିଲେ ବା ଆସୁଥିଲେ ତାହା ତଦନ୍ତ ପରେ ଜଣାପଡିବ ବୋଲି ପ୍ରକାଶ କରିଛନ୍ତି ।
