କେନ୍ଦୁଝର,୫ା୭(ଡି.ଏନ୍.ଏ.)-ଜାତୀୟ ରାଜପଥ ନଂ.୨୦ ଏବଂ ୪୯ ଚାରିଲେନ୍ ହେବାରୁ ରାସ୍ତାର ଉଭୟ ପାର୍ଶ୍ୱରେ ଥିବା ବହୁ ପୁରାତନ ଗଛ କଟାଯାଇଛି। ହେଲେ ବୃକ୍ଷରୋପଣକୁ ଅଣଦେଖା କରାଯାଉ ଥିବାରୁ ସ୍ଥାନୀୟ ଅଞ୍ଚଳବାସୀ ଅସନ୍ତୋଷ ପ୍ରକାଶ କରିଛନ୍ତି। କେନ୍ଦୁଝର ଦେଇ ଯାଇଥିବା ଏହି ଦୁଇ ପ୍ରମୁଖ ଜାତୀୟ ରାଜପଥର ଉଭୟ ପାର୍ଶ୍ୱରେ ଗଛ ନ ଥିବାରୁ ବାଟୋଇ ଟିକେ ଛାଇ ପାଉ ନାହାନ୍ତି। ପ୍ରଦୂଷଣ ପାଇଁ ଅସହ୍ୟ ଗରମ ମଧ୍ୟ ହେଉଛି। ଚାଲି ଚାଲି ଯିବା କଷ୍ଟଦାୟକ ହେଉଛି। ବୃକ୍ଷରୋପଣ ଏବଂ ନୂତନ ସବୁଜିମା ସୃଷ୍ଟି ପାଇଁ ଜାତୀୟ ରାଜପଥ ବିଭାଗ ସ୍ବତନ୍ତ୍ର ପଦକ୍ଷେପ ନେଉ ନ ଥିବା ଅଞ୍ଚଳବାସୀ ଅଭିଯୋଗ କରିଛନ୍ତି। ବ୍ୟାପକ ବୃକ୍ଷରୋପଣ ସହିତ ପ୍ରକୃତିର ସୁରକ୍ଷା ନିମନ୍ତେ ସରକାର ତୁରନ୍ତ ପଦକ୍ଷେପ ନେବା ଜରୁରୀ ବୋଲି ଲୋକେ ଦାବି କରିଛନ୍ତି।
ରାସ୍ତା ପାର୍ଶ୍ୱର ବହୁ ଫଳନ୍ତି ଗଛ ସହ ଶାଳ, ଶାଗୁଆନ, ନିମ୍ବ, ଧଉରା, ପିଆଶାଳ ଆଦି ଗଛ ପ୍ରଶସ୍ତୀକରଣ ସମୟରେ କଟାଯାଇଛି। ୨୦ନଂ. ଜାତୀୟ ରାଜପଥ ପାଣିକୋଇଲିଠାରୁ ରାଜାମୁଣ୍ଡା ଏବଂ ଜାତୀୟ ରାଜପଥ ୪୯ନଂ. ତୁରମୁଙ୍ଗାଠାରୁ-ବିଞ୍ଝବାହାଳ ପର୍ଯ୍ୟନ୍ତ ରାସ୍ତାର ଉଭୟ ପାର୍ଶ୍ୱରେ ଥିବା ଗଛ କଟାଯାଇଛି। ଜଙ୍ଗଲ ବିଭାଗ ସୂତ୍ରରୁ ମିଳିଥିବା ତଥ୍ୟ ଅନୁସାରେ ୨୦ନଂ. ଜାତୀୟ ରାଜପଥ ରାସ୍ତା ସମ୍ପ୍ରସାରଣ ସମୟରେ ଜଙ୍ଗଲ କିସମ ଜମିରୁ ୪୬୪୯୫ଟି ଗଛ, ଅଣ ଜଙ୍ଗଲ ଜମି ଓ ବେସରକାରୀ ଜମିରୁ ପ୍ରାୟ ୫୦ହଜାର ଗଛ କଟାଯାଇଛି। ସେହିପରି ଜାତୀୟ ରାଜପଥ ନଂ.୪୯ର ସମ୍ପ୍ରସାରଣ ପାଇଁ ଜଙ୍ଗଲ ଜମିରୁ ୬୫୨୯୮ଟି ଗଛ ଏବଂ ଅଣ ଜଙ୍ଗଲ ଜମିରୁ ୬୦ହଜାର ଗଛ କଟାଯାଇଛି।
