ନୂଆଦିଲ୍ଲୀ, ୨୧।୧୦: ୟୁଏଇରେ ଚାଲିଥିବା ଆଇପିଏଲ୍ ତ୍ରୟୋଦଶ ସଂସ୍କରଣର ଅଧାରୁ ଅଧିକ ମ୍ୟାଚ୍ ଖେଳାଯାଇ ସାରିଛି। ଚଳିତ ଥର ଅନେକ କୋଟିପତି ଖେଳାଳି ସେମାନଙ୍କ ପ୍ରଦର୍ଶନରେ ନିଜ ଟିମ୍କୁ ବହୁତ ନିରାଶ କରିଛନ୍ତି। ଏହି ଖେଳାଳିମାନଙ୍କ ମଧ୍ୟରେ କୋଲକାତା ନାଇଟ୍ ରାଇଡର୍ସର ପ୍ୟାଟ୍ କୁମିନ୍ସ, କିଙ୍ଗ୍ସ ଇଲେଭେନ ପଞ୍ଜାବର ଗ୍ଲେନ ମ୍ୟାକ୍ସଓ୍ବେଲ ଏବଂ ଚେନ୍ନାଇ ସୁପର୍ କିଙ୍ଗ୍ସର କେଦାର ଯାଦବ ପ୍ରମୁଖ ରହିଛନ୍ତି।
ନିଲାମୀରେ ସବୁଠାରୁ ମହଙ୍ଗା ବିଦେଶୀ ଖେଳାଳି ହେବାର ସୌଭାଗ୍ୟ ଲାଭ କରିଥିଲେ ଅଷ୍ଟ୍ରେଲିଆର ଦ୍ରୁତ ବୋଲର କୁମିନ୍ସ। କୋଲକାତା ତାଙ୍କୁ ୧୫.୫ କୋଟି ଟଙ୍କାରେ ଚଳିତ ନିଲାମୀରେ କିଣିଥିଲା। କିନ୍ତୁ ସେ ବର୍ତ୍ତମାନ ସୁଦ୍ଧା ୯ ମ୍ୟାଚ୍ ଖେଳି ମାତ୍ର ୩ ଉଇକେଟ୍ ନେଇଛନ୍ତି। ତାଙ୍କର ଏହି ନୈରାଶ୍ୟଜନକ ପ୍ରଦର୍ଶନର ପ୍ରଭାବ କୋଲକାତା ଦଳ ଉପରେ ପଡ଼ିଛି। ତେବେ ସେ ୧୨୬ ରନ ସଂଗ୍ରହ କରି ବ୍ୟାଟିଂରେ ପ୍ରଭାବୀ ପ୍ରଦର୍ଶନ କରିଛନ୍ତି। ଅନ୍ତର୍ଜାତୀୟ କ୍ରିକେଟ୍ରେ ଜଣେ ଶ୍ରେଷ୍ଠ ବୋଲର ମାନ୍ୟତା ପାଇଥିବା କୁମିନ୍ସ ଆଇପିଏଲ୍ରେ ଶ୍ରେଷ୍ଠତ୍ୱ ପ୍ରଦର୍ଶନ କରିବାରେ ବିଫଳ ରହିଛନ୍ତି। ସେହିଭଳି ମ୍ୟାକ୍ସଓ୍ବେଲଙ୍କୁ ଖେଳାଳି ନିଲାମୀରେ ପଞ୍ଜାବ ୧୦.୭୫ କୋଟି ଟଙ୍କାରେ କିଣିଥିଲା। କିନ୍ତୁ ସେ ଉଭୟ ବ୍ୟାଟିଂ ଓ ବୋଲିଂରେ ପ୍ରଭାବହୀନ ରହିଛନ୍ତି। ବର୍ତ୍ତମାନ ସୁଦ୍ଧା ସେ ୧୦ ମ୍ୟାଚ୍ ଖେଳି ମାତ୍ର ୯୦ ରନ୍ ସଂଗ୍ରହ କରିଛନ୍ତି। ମ୍ୟାକ୍ସଓ୍ବେଲ ସାମ୍ନା କରିଥିବା ୮୭ ବଲ ମଧ୍ୟରେ ଗୋଟିଏ ହେଲେ ଛକା ମାରିବାରେ ସଫଳ ହୋଇପାରି ନାହାନ୍ତି। ସେହିଭଳି ସେ ୧୯ ଓଭର ବୋଲିଂ କରି ମାତ୍ର ୨ଟି ଉଇକେଟ୍ ନେଇଛନ୍ତି।
ଚେନ୍ନାଇର କେଦାର ଯାଦବ ନିଲାମୀରେ ୮ କୋଟି ଟଙ୍କାରୁ ଅଧିକ ମୂଲ୍ୟରେ କ୍ରୟ ହୋଇଥିଲେ ମଧ୍ୟ ପ୍ରଦର୍ଶନର ଛାପ ଛାଡ଼ିପାରି ନାହାନ୍ତି। ଅଦ୍ୟାବିଧି ସେ ୫ ଇନିଂସରେ ବ୍ୟାଟିଂ କରି ମାତ୍ର ୬୨ ରନ ସଂଗ୍ରହ କରିଛନ୍ତି। କୋଲକାତା ବିପକ୍ଷରେ ୧୨ ବଲରୁ ୭ ରନ କରି ବେଶ୍ ସମାଲୋଚନାର ଶିକାର ହୋଇଥିଲେ। ଓ୍ବେଷ୍ଟଇଣ୍ଡିଜର ସେଲଡନ୍ କଟ୍ରେଲଙ୍କୁ ମଧ୍ୟ ପଞ୍ଜାବ ୮.୫ କୋଟି ଟଙ୍କାରେ ନିଲାମୀରେ କ୍ରୟ କରିଥିଲା। କିନ୍ତୁ ଏହି ବାମହାତୀ ବୋଲର ୬ ମ୍ୟାଚ୍ ଖେଳି ମାତ୍ର ୪ଟି ଉଇକେଟ୍ ନେଇଛନ୍ତି। ଚଳିତ ସିଜନରେ ରାଜସ୍ଥାନ ରୟାଲ୍ସ ପକ୍ଷରୁ ଖେଳୁଥିବା ରବିନ ଉଥପ୍ପା ମଧ୍ୟ ୮ଟି ମ୍ୟାଚ୍ରୁ ୧୨୮ ରନ ସଂଗ୍ରହ କରି ଫ୍ରାଞ୍ଚାଇଜକୁ ନିରାଶ କରିଛନ୍ତି। ରାଜସ୍ଥାନ ତାଙ୍କୁ ୩ କୋଟି ଟଙ୍କାରେ କିଣିଥିଲା।
