ଦେବଗଡ,୧୯।୧୨(ଶଶାଙ୍କ ଶେଖର ଝାଙ୍କର): ଦେବଗଡ ପୌରାଞ୍ଚଳର ଜନଗହଳି ପୂର୍ଣ୍ଣ ଶ୍ରୀ ଅରବିନ୍ଦ ସ୍କୁଲ ଛକରୁ ସ୍ପଷ୍ଟ ଦିବାଲୋକରେ ଏକ କାରର କାଚ ଭାଙ୍ଗି ୭୮ ହଜାର ଟଙ୍କା ଚୋରି କରି ନେଇଥିବା ଅଭିଯୋଗ ହୋଇଛି । ଅଭିଯୋଗ ଅଧାରରେ ଦେବଗଡ ଥାନା ପୋଲିସ ଏକ ମାମଲା ଋଜୁ କରି ଘଟଣାର ତଦନ୍ତ ଆରମ୍ଭ କରିଛି ।
ଅଭିଯୋଗ ଅନୁଯାୟୀ, ରିଆମାଳ ଥାନାଂଚଳ ଗୁଣ୍ଡିଆପାଲି ଗ୍ରାମର କେଶବ କୁମାର ପ୍ରଧାନ ତାଙ୍କ ସାଥୀ ଉକ୍ତ ଗ୍ରାମର ଶରତ ଚନ୍ଦ୍ର ଦଳବେହେରାଙ୍କ ପୁଅ ସୁନୀଲ ଦଳବେହେରାଙ୍କ ସହିତ ଏକ ସିଆଜ କାର(ଓଡି-୦୨-ବିଭି-୮୫୩୦) ଯୋଗେ ଦେବଗଡ ସ୍ଥିତ ଏକ୍ସିସ ବ୍ୟାଙ୍କକୁ ଆସି ନିଜ ଏକାଂଉଟରୁ ନଗଦ ୭୮ ହଜାର ଟଙ୍କା ଉଠାଇଥିଲେ। କେଶବ ଏହି ଟଙ୍କାକୁ ଉକ୍ତ ସିଆଜ କାରରେ ରଖି ଦେଇ କାରଟିକୁ ଶ୍ରୀ ଅରବିନ୍ଦ ସ୍କୁଲ ନିକଟରେ ଛିଡା କରିବା ସହ ଜଳପାନ ପାଇଁ ଯାଇଥିଲେ। ଏହି ସମୟରେ କେତେକ ଦୁର୍ବୃତ୍ତ ଉକ୍ତ କାରର କାଚ ଭାଙ୍ଗି କାର ମଧ୍ୟରୁ ୭୮ ହଜାର ଟଙ୍କା ସହିତ ତାଙ୍କର ବ୍ୟାଙ୍କ ପାସବୁକ ଓ ଅନ୍ୟାନ୍ୟ କାଗଜପତ୍ର ଚୋରି କରି ନେଇଥିବା ଜାଣିବାକୁ ପାଇଥିଲେ। ଏନେଇ କେଶବ ୧୧୨କୁ ଫୋନ କରି ପୋଲିସର ସହାୟତା ଲୋଡିବା ସହ ଦେବଗଡ ଥାନାରେ ଲିଖିତ ଅଭିଯୋଗ କରିଥିଲେ। ଦେବଗଡ ଥାନା ପୋଲିସ ଏନେଇ ଏକ ମାମଲା ରୁଜୁ କରିବା ସହ ଘଟଣାର ତଦନ୍ତ ଚଳାଇଥିଲେ ହେଁ ଖବର ଲେଖାଯିବା ପର୍ଯ୍ୟନ୍ତ ଏ ଘଟଣାରେ କାହାରିକୁ ଧରିବାରେ ସଫଳ ହୋଇନାହିଁ ।
ସୂଚନା ଯୋଗ୍ୟ ଯେ, ଦେବଗଡ ଥାନା ପୋଲିସର ଅବହେଳା ଓ ନିଷ୍କ୍ରିୟତା ଯୋଗୁ ଏହି ଅଂଚଳରେ ଚୋରୀ, ବେଆଇନ ମଦ କାରବାର ଓ ଜୁଆଖେଳ ଭଳି ଅପରାଧ ଦିନକୁ ଦିନ ବୃଦ୍ଧି ପାଇବାସହ ପୋଲିସ ଉପରେ ଲୋକଙ୍କର ଭରସା ତୁଟିବାରେ ଲାଗିଛି । ଏଣୁ ଜିଲା ଆରକ୍ଷୀ ଅଧିକ୍ଷକ ଏବଂ ବିବାଗୀୟ ଉଚ୍ଚ କର୍ତ୍ତୃପକ୍ଷ ଏଥିପ୍ରତି ସ୍ବତନ୍ତ୍ର ଦୃଷ୍ଟି ଦେବାସହ ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସାଧାରଣରେ ଦାଦି ହେଉଛି ।
