ଜୋହାନ୍ସବର୍ଗ,୧୭।୧୧: କ୍ରିକେଟ ପଡ଼ିଆରେ ଅନେକ ଖେଳାଳି ନିଜ ଅନନ୍ୟ ଅନ୍ଦାଜରେ ଶତକ ପାଳନ କରିଥାନ୍ତି। କିନ୍ତୁ ବାଂଲାଦେଶର ଉଇକେଟ୍କିପର ବ୍ୟାଟର ଲିଟନ ଦାସ ଏଥର ନିଜ ଶତକକୁ ଏକ ସ୍ମରଣୀୟ ମୁହୂର୍ତ୍ତରେ ପରିଣତ କରିଛନ୍ତି। ଦକ୍ଷିଣ ଆଫ୍ରିକା ବିପକ୍ଷ ଜୋହାନ୍ସବର୍ଗର ଦ ୱାଣ୍ଡରର୍ସ ଷ୍ଟାଡିୟମରେ ଖେଳାଯାଉଥିବା ଟେଷ୍ଟ ମ୍ୟାଚ୍ରେ ଶତକ ହାସଲ କରିବା ପରେ ସେ ନିଜ ପକେଟରୁ ଏକ ଚିଠି ବାହାର କରିଥିଲେ। ଏହି ଚିଠିରେ ନିଜ ଝିଅ ପାଇଁ ଲେଖିଥିଲେ ଏକ ସୁନ୍ଦର ବାର୍ତ୍ତା।
ମ୍ୟାଚ୍ର ଦ୍ୱିତୀୟ ଦିନରେ ମାର୍କୋ ଜାନସେନଙ୍କ ବଲ୍ରେ ଛକା ମାରି ଲିଟନ ନିଜର ଶତକ ପୂରଣ କରିଥିଲେ। ଏହାପରେ ପକେଟରୁ ଚିଠି ବାହାର କରି ଦର୍ଶକଙ୍କୁ ଦେଖାଇଥିଲେ। ସେଥିରେ ଲେଖାଥିଲା, ‘ହାପି ବର୍ଥଡେ, ମାଇଁ ପ୍ରିନ୍ସେସ। ଏହି ଶତକ ତୁମ ପାଇଁ।’ ଝିଅର ଜନ୍ମଦିନରେ ଏଭଳି ଅନନ୍ୟ ଉପହାର ଦେଇ ଲିଟନ ସମସ୍ତଙ୍କ ହୃଦୟ ଜିତିଛନ୍ତି।
ସାଉଥ ଆଫ୍ରିକା ବିପକ୍ଷ ଏହି ମ୍ୟାଚ୍ରେ ଲିଟନ ଦାସ ଚମତ୍କାର ବ୍ୟାଟିଂ କରିଥିଲେ। ସେ ୧୭୯ଟି ବଲ୍ର ସମ୍ମୁଖୀନ ହୋଇ ୧୪ଟି ଚୌକା ଓ ଗୋଟିଏ ଛକା ସହ ୧୨୦ ରନ ସଂଗ୍ରହ କରିଥିଲେ। ଏହା ତାଙ୍କ ଟେଷ୍ଟ କ୍ୟାରିୟରର ଅଷ୍ଟମ ଶତକ।
ଉଇକେଟ୍କିପର ଭାବେ ଟେଷ୍ଟ କ୍ରିକେଟ୍ରେ ଏହା ତାଙ୍କର ସପ୍ତମ ଶତକ। ଏହି ଉପଲବ୍ଧି ସହ ସେ ମୁଶଫିକୁର ରହିମଙ୍କୁ ପଛରେ ପକାଇଛନ୍ତି। ମୁଶଫିକୁର ଉଇକେଟ୍କିପର ଭାବେ ୬ଟି ଟେଷ୍ଟ ଶତକ ହାସଲ କରିଥିଲେ। ଏହି ମ୍ୟାଚ୍ରେ ବାଂଲାଦେଶ ଦଳ ଏକ ସମୟରେ ବଡ଼ ସଙ୍କଟରେ ପଡ଼ିଥିଲା। ମାତ୍ର ୧୨୧ ରନ୍ରେ ଦଳ ୫ଟି ଉଇକେଟ ହରାଇଥିଲା। ଏଭଳି ସ୍ଥିତିରେ ଲିଟନ ଦାସ ଓ ତୌହିଦ ହୃଦୋୟ ଦଳର ଦାୟିତ୍ୱ ସମ୍ଭାଳିଥିଲେ।
ଉଭୟ ଷଷ୍ଠ ଉଇକେଟ ପାଇଁ ୨୦୬ ରନ୍ର ମହତ୍ତ୍ୱପୂର୍ଣ୍ଣ ଭାଗୀଦାରି କରି ବାଂଲାଦେଶକୁ ସଙ୍କଟରୁ ଉଦ୍ଧାର କରିଥିଲେ। ତୌହିଦ ମଧ୍ୟ ୧୩୭ ରନ୍ର ଦମଦାର ଇନିଂସ ଖେଳି ନିଜ ଟେଷ୍ଟ କ୍ୟାରିୟରର ଦ୍ୱିତୀୟ ଶତକ ହାସଲ କରିଥିଲେ। ଏହି ଦୁଇ ବ୍ୟାଟରଙ୍କ ଲଢ଼ୁଆ ପ୍ରଦର୍ଶନ ଯୋଗୁ ବାଂଲାଦେଶ ପ୍ରଥମ ପାଳିରେ ୪୦୦ ରନ କରିବାରେ ସଫଳ ହୋଇଥିଲା।
Dharitri – Odisha’s No.1 Odia Daily

