ସମ୍ବଲପୁର,୧୭।୧୧(ପ୍ରମୋଦ ବହିଦାର): ଡେବ୍ରିଗଡ଼ ବନ୍ୟପ୍ରାଣୀ ଅଭୟାରଣ୍ୟରେ ବନ୍ୟଜନ୍ତୁ ଶିକାର ପାଇଁ ଫାଶ ବସାଇବା ଯୋଜନାକୁ ବନ ବିଭାଗ ପଣ୍ଡ କରିବା ସହ ୪ ଜଣ ଅଭିଯୁକ୍ତଙ୍କୁ ଗିରଫ କରିଛି। ଗିରଫ ହୋଇଥିବା ଅଭିଯୁକ୍ତମାନେ ହେଲେ କିଶୋର ଖମାରୀ (୪୬), ହୀରାଧର ଭୁଏ (୪୨), ଆଶିଷ ଭୁଏ (୨୯) ଏବଂ ଜିତେନ୍ଦ୍ର ଭୁଏ (୨୫) ଓ ସମସ୍ତ ଅଭିଯୁକ୍ତ ବରଗଡ଼ ଜିଲା ଅନ୍ତର୍ଗତ ଡେବ୍ରିଗଡ଼ ଅଭୟାରଣ୍ୟ ସଂଲଗ୍ନ ତିଲେଇମାଳ ଗ୍ରାମର ବାସିନ୍ଦା ବୋଲି ଜଣି ପଡ଼ିଛି।
ସୋମବାର ଅଭୟାରଣ୍ୟ କର୍ତ୍ତୃପକ୍ଷ ସମସ୍ତ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିବା ସହ ବିଚାର ବିଭାଗୀୟ ହାଜତକୁ ପଠାଇ ଦେଇଛନ୍ତି। ଚଢ଼ାଉ ସମୟରେ ଅଭିଯୁକ୍ତମାନଙ୍କ ନିକଟରୁ ୫ କିଲୋଗ୍ରାମ ବାଇଣ୍ଡିଂ ତାର, ବିଭିନ୍ନ ଫାଶ, ଗୋଟିଏ ଟାଙ୍ଗିଆ ଆଦି ବ୍ଯାପକ ଶିକାରୀ ସାଗ୍ରୀ ସହ ଗୋଟିଏ ବାଇକ ଏବଂ ୩ଟି ମୋବାଇଲ୍ ଫୋନ୍ ଜବତ କରାଯାଇଛି। ବନ୍ୟଜନ୍ତୁ ଯାତାୟାତ କରୁଥିବା ରାସ୍ତାରେ ଏହି ବାଇଣ୍ଡିଂ ତାରରେ ଫାଶ ବିଛାଇ ଶିକାର କରିବାକୁ ଅଭିଯୁକ୍ତମାନେ ଯୋଜନା କରୁଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି। ଏହାସହ ଘଟଣାର ଅଧିକ ତଦନ୍ତ ଜାରି ରହିଛି ବୋଲି ହୀରାକୁଦ ବନ୍ୟପ୍ରାଣୀ ବନଖଣ୍ଡ ଅଧିକାରୀ(ଡିଏଫ୍ଓ) ଅଂଶୁପ୍ରଜ୍ଞା ଦାସ ସୂଚନା ଦେଇଛନ୍ତି।
ଡିଏଫ୍ଓଙ୍କ ସୂଚନା ଅନୁସାରେ ଗୁପ୍ତ ସୂଚନା ଆଧାରରେ ଗତ ନଭେମ୍ବର ୧୫ ତାରିଖ ରବିବାର ଲଖନପୁର ବନ୍ୟପ୍ରାଣୀ ରେଞ୍ଜ ଅଧୀନସ୍ଥ ୪ଟି ଗ୍ରାମ ନିକଟସ୍ଥ ଅଭୟାରଣ୍ୟ ଅଞ୍ଚଳ ଏବଂ ସନ୍ଦିଗ୍ଧଙ୍କ ଘରେ ବନ ବିଭାଗ ପକ୍ଷରୁ ଚଢ଼ାଉ କରାଯାଇଥିଲା। ଶିକାର ପାଇଁ ଲୁଚାଇ ରଖାଯାଇଥିବା ଲୁହା ସାମଗ୍ରୀ ଖୋଜିବା ପାଇଁ ଏହି ଅଭିଯାନରେ ମେଟାଲ୍ ଡିଟେକ୍ଟରର ବ୍ୟବହାର କରାଯାଇଥିଲା। ସେହିପରି ମୁଖ୍ୟ ଅଭିଯୁକ୍ତଙ୍କୁ ଠାବ କରିବା ପାଇଁ ବରଗଡ଼ ପୋଲିସର ମୋବାଇଲ୍ ଟ୍ରାକିଂ ସହାୟତା ବେଶ୍ ଗୁରୁତ୍ୱପୂର୍ଣ୍ଣ ସାବ୍ୟସ୍ତ ହୋଇଥିଲା। ତେବେ ଫସଲ ଅମଳ ସମୟରେ ବହୁ ସଂଖ୍ୟାରେ ବନ୍ୟଜନ୍ତୁ ଚାଷଜମି ଆଡ଼କୁ ଆସିଥାଆନ୍ତି। ଏହାକୁ ଦୃଷ୍ଟିରେ ରଖି ଜନ୍ତୁଶିକାର ଏବଂ ଫସଲ ନଷ୍ଟ ରୋକିବା ଭଳି ପ୍ରତିଷେଧମୂଳକ ବୂଯବସ୍ଥା ସ୍ବରୂପ ଅଭୟାରଣ୍ୟର ପ୍ରାୟ ୪୦ ପ୍ରତିଶତ ସୀମାରେ ବାଡ଼ ଦିଆଯାଇଛି। ଅଭୟାରଣ୍ୟର ସୁରକ୍ଷା ପାଇଁ ୨୫୦ ଜଣ ସୁରକ୍ଷା କର୍ମୀ ଏବଂ ୨୭ଟି ପାଟ୍ରୋଲିଂ ଟିମ୍ ଦିନରାତି ନିୟୋଜିତ ଅଛନ୍ତି। ବନ କର୍ମଚାରୀମାନେ ପ୍ରତି ମାସରେ ୬ ହଜାର କିଲୋମିଟରରୁ ଅଧିକ ପାଦଚଲା ପାଟ୍ରୋଲିଂ କରିବା ସହ ସମ୍ବେଦନଶୀଳ ପ୍ରବେଶ ପଥରେ କ୍ୟାମେରା ଟ୍ରାପ୍ ଓ ସ୍ୱତନ୍ତ୍ର ଦଳ ଜରିଆରେ ନଜର ରଖିଛନ୍ତି। ଏହା ବ୍ୟତୀତ ୬୭ଟି ଇକୋ-ଡେଭଲପମେଣ୍ଟ କମିଟି ଏବଂ ସ୍ଥାନୀୟ ଗ୍ରାମବାସୀଙ୍କ ସୂଚନା ଶିକାର ରୋକିବାରେ ପ୍ରମୁଖ ଭୂମିକା ଗ୍ରହଣ କରୁଛି। ନିକଟରେ ଅଭୟାରଣ୍ୟକୁ ଅଣ୍ଡିରା ମହାବଳ ବାଘଟି ଆସିବା ପରେ ପରିସୀମା ଅଞ୍ଚଳର ୧୦୦ରୁ ଅଧିକ ଗ୍ରାମରେ ସଚେତନତା ପୋଷ୍ଟର ଲଗାଯାଇଛି ଏବଂ ଶିକାର ସମ୍ପର୍କିତ ସୂଚନା ଦେଲେ ନଗଦ ପୁରସ୍କାର ଘୋଷଣା କରାଯାଇଛି।
ତେବେ ବନ୍ୟପ୍ରାଣୀ ସୁରକ୍ଷା କେବଳ ଗିରଫଦାରୀ କିମ୍ବା କାର୍ଯ୍ୟାନୁଷ୍ଠାନ ମଧ୍ୟରେ ସୀମିତ ନୁହେଁ, ବରଂ ବନ୍ୟଜନ୍ତୁଙ୍କ କ୍ଷତି ହେବା ପୂର୍ବରୁ ବିପଦକୁ ପ୍ରତିହତ କରିବା ଆମର ମୂଳ ଲକ୍ଷ୍ୟ। ବନ୍ୟପ୍ରାଣୀମାନେ ଯେପରି ସୁରକ୍ଷିତ ଭାବେ ଚଳପ୍ରନଚଳ ଓ ବଂଶବିସ୍ତାର କରିପାରିବେ, ସେଥିପାଇଁ ସେମାନଙ୍କ ବାସସ୍ଥଳୀକୁ ସୁରକ୍ଷିତ ରଖିବାକୁ ପ୍ରାଥମିକତା ଦିଆଯାଉଛି ବୋଲି ଡିଏଫ୍ଓ ଦାସ କହିଛନ୍ତି।
Dharitri – Odisha’s No.1 Odia Daily

