ନୂଆଦିଲ୍ଲୀ,୧୭।୬: ଦେଶରେ ସରକାରୀ ଚାକିରି ପାଇଁ ପ୍ରସ୍ତୁତି କରୁଥିବା ଯୁବକଯୁବତୀଙ୍କ ସଂଖ୍ୟା କ୍ରମାଗତ ଭାବେ ବଢ଼ିବାରେ ଲାଗିଛି, କିନ୍ତୁ ପ୍ରତିଯୋଗିତା ଯୋଗୁ ସମସ୍ତଙ୍କୁ ସରକାରୀ ଚାକିରି ମିଳିବା ସହଜ ହେଉନାହିଁ। ଏଭଳି ପରିସ୍ଥିତିରେ ସରକାରଙ୍କର ଅନେକ ଯୋଜନା ଯୁବପିଢ଼ିଙ୍କୁ ନିଯୁକ୍ତି ଦେବା ସହ ନିଜସ୍ୱ ବ୍ୟବସାୟ ଆରମ୍ଭ କରିବାରେ ବଡ଼ ସହାୟତା ପ୍ରଦାନ କରୁଛନ୍ତି। ଏହି ସବୁ ଯୋଜନା ମାଧ୍ୟମରେ ଲୋକେ ସ୍ୱରୋଜଗାର ଆରମ୍ଭ କରି ନିଜର ଆୟ ବୃଦ୍ଧି କରିପାରୁଛନ୍ତି।
ପ୍ରଧାନମନ୍ତ୍ରୀ ମୁଦ୍ରା ଯୋଜନାରୁ ଆରମ୍ଭ କରନ୍ତୁ ବ୍ୟବସାୟ:-
ପ୍ରଧାନମନ୍ତ୍ରୀ ମୁଦ୍ରା ଯୋଜନା (PMMY) ଅଧୀନରେ ଛୋଟ ଛୋଟ ବ୍ୟବସାୟ ଆରମ୍ଭ କରିବା ପାଇଁ ଆର୍ଥିକ ସହାୟତା ଯୋଗାଇ ଦିଆଯାଉଛି। ଏହି ଯୋଜନାରେ କୌଣସି ବଡ଼ ଗ୍ୟାରେଣ୍ଟି ବିନା ଋଣ (Loan) ଉପଲବ୍ଧ ହୋଇଥାଏ। ଯୁବକଯୁବତୀମାନେ ଦୋକାନ, ସର୍ଭିସ ସେଣ୍ଟର, କ୍ଷୁଦ୍ର ଶିଳ୍ପ, ପରିବହନ (Transport), ଖାଦ୍ୟ ବ୍ୟବସାୟ କିମ୍ବା ଅନ୍ୟାନ୍ୟ କାର୍ଯ୍ୟ ଆରମ୍ଭ କରିବା ପାଇଁ ଏହି ଯୋଜନାର ଲାଭ ଉଠାଇ ପାରିବେ। ମୁଦ୍ରା ଯୋଜନାରେ ଶିଶୁ, କିଶୋର ଏବଂ ତରୁଣ ଭଳି ୩ଟି ଶ୍ରେଣୀରେ ଋଣ ପ୍ରଦାନ କରାଯାଏ।
ପ୍ରଧାନମନ୍ତ୍ରୀ ରୋଜଗାର ସୃଜନ କାର୍ଯ୍ୟକ୍ରମ (PMEGP):-
ପ୍ରଧାନମନ୍ତ୍ରୀ ରୋଜଗାର ସୃଜନ କାର୍ଯ୍ୟକ୍ରମ (PMEGP) ଜରିଆରେ ସରକାର ନୂଆ କ୍ଷୁଦ୍ର ଶିଳ୍ପ ଏବଂ ବ୍ୟବସାୟ ଆରମ୍ଭ କରୁଥିବା ଲୋକଙ୍କୁ ପ୍ରୋତ୍ସାହିତ କରୁଛନ୍ତି। ଗ୍ରାମାଞ୍ଚଳ ଏବଂ ସହରାଞ୍ଚଳରେ ନିଯୁକ୍ତି ସୁଯୋଗ ସୃଷ୍ଟି କରିବା ପାଇଁ ଏହି ଯୋଜନା ଅଧୀନରେ ଆର୍ଥିକ ସହାୟତା ଦିଆଯାଉଛି। ଯେଉଁମାନେ ନିଜସ୍ୱ ଶିଳ୍ପ ପ୍ରତିଷ୍ଠା କରିବାକୁ ଚାହୁଁଛନ୍ତି, ସେମାନେ ଏହି ଯୋଜନାରୁ ବେଶ୍ ଲାଭବାନ ହୋଇପାରିବେ।
କୌଶଳ ବିକାଶ ଜରିଆରେ ସ୍ୱାବଲମ୍ବୀ ହେଉଛନ୍ତି ଯୁବପିଢ଼ି:-
ପ୍ରଧାନମନ୍ତ୍ରୀ କୌଶଳ ବିକାଶ ଯୋଜନା (PMKVY) ମାଧ୍ୟମରେ ଯୁବକଯୁବତୀଙ୍କୁ ବିଭିନ୍ନ କ୍ଷେତ୍ରରେ ତାଲିମ (Training) ପ୍ରଦାନ କରାଯାଉଛି। ଏଥିରେ ଯୁବପିଢ଼ିଙ୍କୁ ସେମାନଙ୍କ ରୁଚି ଏବଂ ଯୋଗ୍ୟତା ଅନୁଯାୟୀ କୌଶଳ ଶିକ୍ଷା ଦିଆଯାଉଛି, ଯାହାଦ୍ୱାରା ସେମାନେ ଚାକିରି କିମ୍ବା ସ୍ୱରୋଜଗାର ପାଇଁ ପ୍ରସ୍ତୁତ ହୋଇପାରିବେ। ଏହି ଯୋଜନାରେ ଡିଜିଟାଲ୍ କାମ, ବୈଷୟିକ କ୍ଷେତ୍ର, ସର୍ଭିସ୍ ସେକ୍ଟର ସମେତ ଅନେକ ପାଠ୍ୟକ୍ରମ ଉପଲବ୍ଧ ରହିଛି।
ଷ୍ଟାର୍ଟଅପ୍ ଏବଂ ଇନୋଭେସନକୁ ପ୍ରୋତ୍ସାହନ:-
ସରକାର ‘ଷ୍ଟାର୍ଟଅପ୍ ଇଣ୍ଡିଆ’ ପଦକ୍ଷେପ ମାଧ୍ୟମରେ ନୂତନ ବ୍ୟବସାୟିକ ଚିନ୍ତାଧାରା (Business Ideas) ଏବଂ ଷ୍ଟାର୍ଟଅପ୍କୁ ବେଶ୍ ପ୍ରୋତ୍ସାହିତ କରୁଛନ୍ତି। ଏଥିରେ ନୂତନ ଉଦ୍ୟୋଗୀମାନଙ୍କୁ ମାର୍ଗଦର୍ଶନ, ନେଟୱର୍କିଂ ଏବଂ ଅନ୍ୟାନ୍ୟ ସୁବିଧା ସୁଯୋଗ ଯୋଗାଇ ଦିଆଯାଉଛି। ଯଦି କୌଣସି ଯୁବକ ନୂତନ ଆଇଡିଆ ସହ ବ୍ୟବସାୟ ଦୁନିଆରେ ଆଗକୁ ବଢ଼ିବାକୁ ଚାହୁଁଛନ୍ତି, ତେବେ ଏହି ଯୋଜନା ସେମାନଙ୍କ ପାଇଁ ଅତ୍ୟନ୍ତ ସହାୟକ ହେବ।
ସ୍ୱୟଂ ସହାୟକ ଗୋଷ୍ଠୀ (SHG) ଏବଂ CSC ସେଣ୍ଟରରୁ ରୋଜଗାର ସୁଯୋଗ:-
ମହିଳାମାନଙ୍କ ପାଇଁ ସୁଯୋଗ: ଗ୍ରାମାଞ୍ଚଳରେ ସ୍ୱୟଂ ସହାୟକ ଗୋଷ୍ଠୀ (SHG) ମାଧ୍ୟମରେ ମହିଳା ଏବଂ କ୍ଷୁଦ୍ର ଉଦ୍ୟୋଗୀମାନଙ୍କୁ ସିଲେଇ, ଖାଦ୍ୟ ପ୍ରକ୍ରିୟାକରଣ, ହସ୍ତଶିଳ୍ପ, କୃଷି ଭିତ୍ତିକ କାର୍ଯ୍ୟ ଏବଂ ଛୋଟ ବ୍ୟବସାୟ ସହ ଯୋଡ଼ା ଯାଉଛି।
CSC (କମନ ସର୍ଭିସ ସେଣ୍ଟର): ଯଦି ଆପଣଙ୍କର କମ୍ପ୍ୟୁଟର ବିଷୟରେ ସାଧାରଣ ଜ୍ଞାନ ଅଛି, ତେବେ ଆପଣ ନିଜ ଗାଁରେ ଏକ କମନ ସର୍ଭିସ ସେଣ୍ଟର (ସିଏସସି) ଖୋଲିପାରିବେ। ଏଥିରେ ଆପଣ ଭୋଟର କାର୍ଡ ଆବେଦନ, ଆଧାର କାର୍ଡ ସମ୍ବନ୍ଧୀୟ କାର୍ଯ୍ୟ, ପାନ୍ କାର୍ଡ ଏବଂ ବ୍ୟାଙ୍କିଙ୍ଗ୍ ସେବା ଭଳି ବିଭିନ୍ନ ସରକାରୀ ଓ ବେସରକାରୀ କାମ କରି ଭଲ ରୋଜଗାର କରିପାରିବେ।
ରୋଜଗାର ପାଇଁ ସରକାରୀ ଯୋଜନାର ଲାଭ ଉଠାନ୍ତୁ:-
ଆଜିର ସମୟରେ କେବଳ ସରକାରୀ ଚାକିରି ହିଁ ରୋଜଗାରର ଏକମାତ୍ର ବିକଳ୍ପ ନୁହେଁ। ସରକାରଙ୍କ ଯୋଜନା ସହାୟତାରେ ଯୁବପିଢ଼ି ନିଜେ ସ୍ୱାବଲମ୍ବୀ ହେବା ସହ ଅନ୍ୟମାନଙ୍କୁ ମଧ୍ୟ ନିଯୁକ୍ତି ଦେଇପାରୁଛନ୍ତି। ସଠିକ୍ ସୂଚନା, ତାଲିମ ଏବଂ ଯୋଜନାର ସଠିକ୍ ବ୍ୟବହାର ଦ୍ୱାରା ସ୍ୱରୋଜଗାରର ଏକ ନୂତନ ଏବଂ ସଫଳ ରାସ୍ତା ପ୍ରସ୍ତୁତ କରାଯାଇପାରିବ।
