ଅନୁଗୋଳ ଅଫିସ,,୧୫।୩ ଅନୁଗୋଳ ଜିଲାରେ ପୌର ନିର୍ବାଚନ ପାଇଁ ପ୍ରାର୍ଥୀ ତାଲିକା ଚୂଡ଼ାନ୍ତ ହୋଇଛି। ସୋମବାର ପ୍ରାର୍ଥତ୍ପତ୍ର ପ୍ରତ୍ୟାହାର ସମୟ ସୀମା ଶେଷ ହେବା ପରେ ପ୍ରଶାସନ ପକ୍ଷରୁ ଚୂଡ଼ାନ୍ତ ପ୍ରାର୍ଥୀ ତାଲିକା ପ୍ରକାଶ କରାଯାଇଛି। ଜିଲାର ଅନୁଗୋଳ ପୌରପାଳିକା, ତାଳଚେର ପୌରପାଳିକା ଓ ଆଠମଲ୍ଲିକ ଏନ୍ଏସି ନିର୍ବାଚନ ପାଇଁ ମୋଟ୍ ୨୦୪ଜଣ ପ୍ରାର୍ଥୀ ରହିଛନ୍ତି। ସେମାନଙ୍କ ମଧ୍ୟରେ ୨୦ଜଣ ଅଧ୍ୟକ୍ଷ ପ୍ରାର୍ଥୀ ଥିବାବେଳେ ୧୮୪ଜଣ ହେଉଛନ୍ତି କାଉନସିଲର ପ୍ରାର୍ଥୀ।
ଅନୁଗୋଳ ପୌରପାଳିକାରେ ରହିଛି ୨୩ଟି ଓ୍ବାର୍ଡ। ଏହି ପୌର ସଂସ୍ଥାର ଅଧ୍ୟକ୍ଷ ପଦବୀ ପାଇଁ ବିଜେଡି, ଭାଜପା, କଂଗ୍ରେସ ଓ ସ୍ବାଧୀନରୁ ମୋଟ୍ ୮ଜଣ ପ୍ରାର୍ଥୀ ନିର୍ବାଚନ ଲଢ଼ୁଛନ୍ତି। ଏଥିସହ ୭୫ଜଣ କାଉନସିଲର ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରୁଥିବା ସ୍ପଷ୍ଟ ହୋଇଛି। ସେହିପରି ତାଳଚେର ପୌରପାଳିକାର ୨୧ ଓ୍ବାର୍ଡର କାଉନସିଲର ପଦବୀ ପାଇଁ ୬୯ଜଣ ପ୍ରାର୍ଥୀ ରହିଥିବା ବେଳେ ପୌର ଅଧ୍ୟକ୍ଷ ପଦବୀ ନିମନ୍ତେ ୭ଜଣ ଲଢ଼େଇ କରୁଛନ୍ତି। ଆଠମଲ୍ଲିକ ଏନ୍ଏସିରେ ୧୧ ଓ୍ବାର୍ଡ ରହିଛି। ଏଠାରେ ଅଧ୍ୟକ୍ଷ ପଦ ପାଇଁ ୫ଜଣ ନିର୍ବାଚନ ମଇଦାନରେ ରହିଛନ୍ତି। କାଉନସିଲର ପଦବୀ ପାଇଁ ୪୦ଜଣଙ୍କ ମଧ୍ୟରେ ପ୍ରତିଦ୍ୱନ୍ଦ୍ୱିତା ହେଉଛି। ତେବେ ଜିଲାରେ କଂଗ୍ରେସ ଦୁର୍ବଳ ସ୍ଥିତିରେ ଥିଲେ ମଧ୍ୟ ଏଥର ତ୍ରିମୁଖୀ ଲଢ଼େଇ ହେବା ଦେଖିବାକୁ ମିଳିବ ବୋଲି ଚର୍ଚ୍ଚା ହେଉଛି।
