ବଇଣ୍ଡା,୬।୬(ଡି.ଏନ.ଏ.) ୪ ବର୍ଷ ହେଲା ସାହିରେ ପାଇପ୍ ବିଛାଯିବା ସହ ଷ୍ଟାଣ୍ଡପୋଷ୍ଟ ନିର୍ମାଣ କରାଯାଇଛି। ଏପରି କି ବହୁ ଘରକୁ ପାଇପ୍ ସଂଯୋଗ ଦିଆଯାଇଛି। ହେଲେ ପ୍ରଶାସନର ତଦାରଖ ଅଭାବରୁ କାମ ସମ୍ପୂର୍ଣ୍ଣ ହୋଇପାରୁ ନାହିଁ। ଫଳରେ ଦୀର୍ଘବର୍ଷ ହେଲା ଅନୁଗୋଳ ଜିଲା ଆଠମଲ୍ଲିକ ଏନ୍ଏସିର ୨ ନମ୍ବର ୱାର୍ଡବାସୀ ପାଇପ୍ ପାଣିରୁ ବଞ୍ଚିତ ରହିଛନ୍ତି।
ଏହି ୱାର୍ଡରେ ଥିବା ହରିଡାନାଳି ଓ କାଠପେଣ୍ଠ ସାହିରେ ୨୨୦ରୁ ଊର୍ଦ୍ଧ୍ୱ ପରିବାର ବସବାସ କରୁଛନ୍ତି। ପାନୀୟ ଜଳର ବ୍ୟବସ୍ଥା ପାଇଁ ଏଠାରେ ୬ଟି ନଳକୂଅ ଓ ଖୋଲା କୂଅ ରହିଛି। କିନ୍ତୁ ପ୍ରତିବର୍ଷ ଗ୍ରୀଷ୍ମ ଋତୁରେ ଜଳସ୍ତର ହ୍ରାସ କାରଣରୁ ନଳକୂଅଗୁଡ଼ିକରୁ ଆବଶ୍ୟକ ମୁତାବକ ପାଣି ମିଳିପାରୁ ନାହିଁ। ରାଜ୍ୟ ସରକାର ପାଇପ୍ ପାଣି ଯୋଗାଣ ଉପରେ ଗୁରୁତ୍ୱ ଦେଉଥିବା ବେଳେ ଏହି ଓ୍ବାର୍ଡକୁ ପାଇପ୍ ସଂଯୋଗ କରିବାକୁ ୨୦୧୮ରୁ କାର୍ଯ୍ୟ ଆରମ୍ଭ ହୋଇଥିଲା। ବହୁ ସ୍ଥାନରେ ପାଇପ୍ ବିଛାଯାଇଥିବା ବେଳେ କେତେକ ସ୍ଥାନରେ ଷ୍ଟାଣ୍ଡପୋଷ୍ଟ ନିର୍ମାଣ କରାଯାଇଛି। ହେଲେ ୪ ବର୍ଷ ହେଲା କାର୍ଯ୍ୟ ଶେଷ ହୋଇପାରୁ ନାହିଁ। ଫଳରେ ନିକଟରେ ଥିବା ଅନ୍ୟ ଓ୍ବାର୍ଡବାସୀ ପାଇପ୍ ପାଣିର ସୁବିଧା ପାଇପାରୁଥିବା ବେଳେ ୨ ନଂ. ଓ୍ବାର୍ଡବାସୀ ନୂଳକୂଅ ଓ ଖୋଲା କୂଅ ଉପରେ ନିର୍ଭର କରୁଛନ୍ତି। ଏ ନେଇ ୱାର୍ଡବାସୀ ୧ ଫେବୃୟାରୀ ୨୦୨୧ ଓ ୫ ଏପ୍ରିଲ ୨୦୨୨ରେ ଆଠମଲ୍ଲିକ ଉପଜିଲାପାଳ, ଆଠମଲ୍ଲିକ ଏନ୍ଏସି କାର୍ଯ୍ୟାଳୟରେ ଅଭିଯୋଗ କରିଥିଲେ। ହେଲେ ସମସ୍ୟାର ସମାଧାନ ଦିଗରେ ପ୍ରଶାସନ ପକ୍ଷରୁ ସେପରି ଆଗ୍ରହ ପ୍ରକାଶ ପାଉ ନ ଥିବା ଓ୍ବାର୍ଡବାସୀ ଅଭିଯୋଗ କରିଛନ୍ତି। ଓ୍ବାର୍ଡରେ ଥିବା ହରିଡାନାଳି ସାହି ଆଦିବାସୀ ବହୁଳ ଅଞ୍ଚଳ ହୋଇଥିଲେ ମଧ୍ୟ ପ୍ରଶାସନ ପାଇପ୍ ପାଣି ବ୍ୟବସ୍ଥା କରୁ ନ ଥିବା ଯୋଗୁ ଅସନ୍ତୋଷ ପ୍ରକାଶ ପାଇଛି। ତୁରନ୍ତ ଏଥିପ୍ରତି ଦୃଷ୍ଟି ଦେଇ କାମ ସମ୍ପୂର୍ଣ୍ଣ ସହ ପାଣି ଯୋଗାଇ ଦେବାକୁ ସାଧାରଣରେ ଦାବି ହୋଇଛି।
