କାମାକ୍ଷାନଗର, ୨ ।୪ (ଡି.ଏନ୍.ଏ.) ଢେଙ୍କାନାଳ ଜିଲା କଙ୍କଡ଼ାହାଡ଼ ବ୍ଲକ ଦଶିପୁର ପଞ୍ଚାୟତରେ ପ୍ରଧାନମନ୍ତ୍ରୀ ଆବାସ ଯୋଜନାରେ ଅନିୟମିତତା ହୋଇଥିବା ଅଭିଯୋଗ ହୋଇଛି। ଯୋଜନାରେ ତାଲିକାଭୁକ୍ତ ହିତାଧିକାରୀଙ୍କୁ ବାଦ୍ଦେଇ ଚଞ୍ଚକତା କରି ଅନ୍ୟଜଣଙ୍କୁ କାର୍ଯ୍ୟାଦେଶ ପ୍ରଦାନ କରାଯାଇଛି। ଏ ନେଇ ୮୦ ବର୍ଷୀୟ ବୃଦ୍ଧ ଗିରିଆ ନାଏକ ବିଡିଓଙ୍କ ଦ୍ୱାରସ୍ଥ ହୋଇ ନ୍ୟାୟ ଭିକ୍ଷା କରିଛନ୍ତି। ଏଥିସହ ଏଭଳି ବେଆଇନ କାର୍ଯ୍ୟ ସମ୍ପର୍କରେ ଜିଲାପାଳ, ଉପଜିଲାପାଳଙ୍କ ଦୃଷ୍ଟି ଆକର୍ଷଣ ମଧ୍ୟ କରିଛନ୍ତି।
ଗିରିଆଙ୍କ କହିବା କଥା, ୨୦୧୮-୧୯ବର୍ଷରେ ଆଇଡି ନଂ. ଓଆର୍-୩୩୬୮୭୮୭ ଅନୁଯାୟୀ ତାଙ୍କୁ ପ୍ରଧାନମନ୍ତ୍ରୀ ଆବାସ ଯୋଜନାରେ ଗୃହ ନିର୍ମାଣ ପାଇଁ କାର୍ଯ୍ୟାଦେଶ ମିଳିଥିଲା। ସେହି ସମୟରେ ଦାୟିତ୍ୱରେ ଥିବା ଅଧିକାରୀ ତାଙ୍କ ନାମକୁ କୌଶଳକ୍ରମେ କାଟି ଗ୍ରାମର ଅନ୍ୟଜଣଙ୍କୁ ୨ କିସ୍ତିରେ ଯଥାକ୍ରମେ ୨୦ ହଜାର ଏବଂ ୫୦ ହଜାର ଟଙ୍କା ପ୍ରଦାନ କରିଛନ୍ତି। ଫଳରେ ଯୋଗ୍ୟତା ଥିବା ସତ୍ତ୍ୱେ ସେ ବାସଗୃହ ପାଇବାରୁ ବଞ୍ଚତ୍ତ ହୋଇଥିବା କହିଛନ୍ତି। ଗିରିଆ ହେଉଛନ୍ତି ଅନୁସୂଚିତ ଜାତିବର୍ଗର। ବୟସର ସାୟାହ୍ନରେ ଘର ନିର୍ମାଣ କରିବା ତାଙ୍କ ପକ୍ଷେ ସମ୍ଭବ ନୁହେଁ। ତେଣୁ ସେ ପରିବାର ଲୋକଙ୍କୁ ନେଇ ଝାଟିମାଟି ଘରେ ମୁଣ୍ଡ ଗୁଞ୍ଜିଛନ୍ତି। ସାମାନ୍ୟ ବର୍ଷା ହେଲେ ତାଙ୍କୁ ପରଦୁଆରେ ଆଶ୍ରୟ ନେବାକୁ ପଡୁଛି। ଦୀର୍ଘ ୪ବର୍ଷ ହେଲା ସେ ବାରମ୍ବାର ବ୍ଲକ ପ୍ରଶାସନର ଦ୍ୱାରସ୍ଥ ହୋଇ ଗୁହାରି କରିଥିଲେ ମଧ୍ୟ କୌଣସି ସୁଫଳ ମିଳୁନାହିଁ। ଅଧିକାରୀଙ୍କ ଚଞ୍ଚକତା ପାଇଁ ଜଣେ ଯୋଗ୍ୟ ହିତାଧିକାରୀ ହକ୍ରୁ ବଞ୍ଚତ୍ତ ହେଉଥିବାବେଳେ ଏହାକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି ଗିରିଆ ଏବଂ ତାଙ୍କ ପରିବାର ସଦସ୍ୟ।
ଏ ନେଇ ବିଡିଓ ବୁଲ୍ବୁଲ୍ ବେହେରା କୁହନ୍ତି, ସେ ନୂତନ ଭାବେ ବ୍ଲକର ଦାୟିତ୍ୱ ଗ୍ରହଣ କରିଛନ୍ତି। ତାଙ୍କ ଯୋଗଦାନ ପୂର୍ବରୁ ଏହି ଘଟଣା ଘଟିଛି। ସମ୍ପୃକ୍ତ ବ୍ୟକ୍ତିଙ୍କୁ ଟଙ୍କା ଫେରାଇବା ପାଇଁ ନୋଟିସ୍ କରାଯାଇଛି। ତଦନ୍ତ ପରେ ପ୍ରକୃତ ରହସ୍ୟ ଉନ୍ମୋଚନ ହେବ ବୋଲି ସେ କହିଛନ୍ତି।
