ଧରାକୋଟ,୬ା୮(ଡି.ଏନ୍.ଏ.): ଗଞ୍ଜାମ ଜିଲାର ଲାଇଫ ଲାଇନ ଭାବରେ ପରିଗଣିତ ଜାନିବିଲି ଅନିକଟ। ବ୍ରିଟିଶ ମାନେ ୧୮୯୧ରେ ଜିଲାର ଜଳ ସେଚନ ଓ ବ୍ରହ୍ମପୁର ସହରର ପିଇବା ପାଣି ସକାଶେ ୮୧୦ ଫୁଟ ଦୀର୍ଘର ଜାନିବିଲି ଆନିକଟ ନିର୍ମାଣ କରିଥିଲେ। ଋଷିକୂଲ୍ୟା ନଦୀ ଉପରେ ନିର୍ମିତ ଏହି ଅନିକାଟରୁ ୨୫ ମିଟର ଓସାରର ମୁଖ୍ୟ କେନାଲ ଦ୍ୱାରା ଜଳସେଚନ ଓ ପିଇବା ପାଣି ଯୋଗାଣ ନିର ବଚ୍ଛିନ୍ନ ଭାବରେ ହୋଇ ଆସୁଛି। ଏହା ମଧ୍ୟରେ ବାରମ୍ବାର ବନ୍ୟା ପାଣିରେ ଆନିକଟକ କ୍ଷତିଗ୍ରସ୍ତ ହୋଇଛି। ଏଣୁ ଭଞ୍ଜନଗର ଜଳସେଚନ ବିଭାଗର ଅଧୀନରେ ରହିଥିବା ଏହି ଆନିକଟ ୧୩୧ ବର୍ଷର ପୁରୁଣା ହୋଇ ଥିବାରୁ ବିଭାଗ ତରଫରୁ ପୁରୁଣା ଆନିକଟଠାରୁ ୨୧୦ ମିଟର ତଳସ୍ତର ପଟକୁ ଏକ ନୂତନ ବ୍ୟାରେଜ ନିର୍ମାଣ ପାଇଁ ପ୍ରସ୍ତାବ ବୈଷୟିକ କମିଟିର ଅନୁମୋଦନ ଲାଭ କରିଛି । ଏହାର ନିର୍ମାଣରେ ମୋଟ ୧୮୫ କୋଟି ଟଙ୍କା ବ୍ୟୟ ହେବ। ବ୍ୟାରେଜର ଲମ୍ବା ୨୦୦ ମିଟର ହେବା ସହ ଏଥିରେ ୧୨ ଗେଟ ଓ ନୂଆ ହେଡ ନିର୍ମାଣ ହେବ। ଧରାକୋଟ, ଶେରଗଡ଼, ସାନଖେମୁଣ୍ଡି, ଆସିକା, ହିଞ୍ଜିଳି, କୁକୁଡ଼ାଖଣ୍ଡି, ଛତ୍ରପୁର ଓ ରଙ୍ଗେଇଲୁଣ୍ଡା ବ୍ଲକର ୫୩ ହଜାର ହେକ୍ଟର ଚାଷ ଜମି ଜଳସେଚିତ ହୋଇପାରିବ। ବ୍ରହ୍ମପୁର ସହରକୁ ଜଳଯୋଗାଣ ସୁଗମ ହୋଇପାରିବ। ବ୍ୟାରେଜ ଉପରେ ୫ ମିଟର ଚଉଡାର ଏକ ସର୍ଭିସ ବ୍ରିଜ ନିର୍ମାଣ ହେବ। ଫଳରେ ଜାହାଡ଼ା, ସିଙ୍ଗାପୁର ଦେଇ ଭଞ୍ଜନଗର ଓ ସୋରଡ଼ା ସହ ଧରାକୋଟର ସିଧାସଳଖ ସଂଯୋଗ ହୋଇପାରିବ। ଯାହାଦ୍ବାରା ଆର୍ଥିକ ଓ ବ୍ୟବସାୟକ ଦୃଷ୍ଟିରୁ ଅଞ୍ଚଳର ଲୋକେ ବେଶ ଉପକୃତ ହେବେ। ଧରାକୋଟ ସଦମହକୁମାରୁ ଲୋକେ ତ୍ୱରିତ ସେବା ପାଇ ପାରିବେ। ଜାନିବିଲିଠାରୁ ବ୍ରହ୍ମପୁରକୁ ପାଇପ ଲାଇନ ଦ୍ୱାରା ପ୍ରତିଦିନ ୬୭.୫ ଏମ୍ଏଲ୍ଟି ଜଳ ଯୋଗାଣ ହେଉଛି। ଏହା ମଧ୍ୟ ସୁଗମ ହୋଇଯିବ। ସବୁଠାରୁ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ହେଲା ଗଞ୍ଜାମ ଜିଲାର ପିଇବା ପାଣି, ଜଳସେଚନ ଓ ବନ୍ୟା ନିୟନ୍ତ୍ରଣରେ ବ୍ୟାପକ ସୁଧାର ଆସିବ। ଯାହା ଦ୍ୱାରା ଜିଲାବାସୀ ପ୍ରତ୍ୟକ୍ଷ ଓ ପରୋକ୍ଷ ଭାବେ ଉପକୃତ ହେବେ। ଖୁବ ଶୀଘ୍ର ବ୍ୟାରେଜ ନିର୍ମାଣ ପାଇଁ ଟେଣ୍ଡର ପ୍ରକ୍ରିୟା ଆରମ୍ଭ ହେବ ବୋଲି ସହକାରୀ ନିର୍ବାହୀ ଯନ୍ତ୍ରୀ ଶିବରାମ ବେହେରା ଓ ସହକାରୀ ଯନ୍ତ୍ରୀ ବିଜୟ କୁମାର ସାହୁ ସୂଚନା ଦେଇଛନ୍ତି। ଏଥିସହ ଜାନବିଲିଠାରେ ପରିତ୍ୟକ୍ତ ଅବସ୍ଥାରେ ରହିଥିବା ଜଳସେଚନ ବିଭାଗର ପରିଦର୍ଶନ ବଙ୍ଗଳାର ମଧ୍ୟ ପୁନରୁଦ୍ଧାର ହେବାର ସୂଚନା ମିଳିଛି।
