ପଟ୍ଟାମୁଣ୍ଡାଇ, ୬।୮(ସ୍ବ.ପ୍ର.): କଟକ-ଚାନ୍ଦବାଲି ରାସ୍ତା ରାଜ୍ୟ ରାଜପଥର ମାନ୍ୟତା ପାଇଥିବାରୁ ଏହା ବ୍ୟସ୍ତ ବହୁଳରେ ପରିଣତ ହୋଇଛି। ଏହି ରାସ୍ତା ଉପରେ କଟକ-ଚୌଦ୍ୱାର, ସାଲେପୁର, ମାହାଙ୍ଗା, ପାଟକୁରା, କେନ୍ଦ୍ରାପଡ଼ା, ରାଜନଗର, ଆଳି ଓ ଚାନ୍ଦବାଲି ଆଦି ୮ଟି ନିର୍ବାଚନମଣ୍ଡଳୀର ଲୋକ ନିର୍ଭର କରୁଛନ୍ତି। ଦୁର୍ଘଟଣା ରୋକିବାକୁ ସରକାର ଅନେକ ପଦକ୍ଷେପ ନେବା ସହ ବିଭିନ୍ନ ଜାଗାରେ ଗାଡିର ଗତି ନିୟନ୍ତ୍ରଣ ପାଇଁ ହମ୍ପସ ଓ ସ୍ପିଡ ବ୍ରେକର ନିର୍ମାଣ କରାଯାଇଛି। ବହୁ ଜାଗାରେ ହମ୍ପସ ପୂର୍ବରୁ କୌଣସି ସଂକେତ ନ ଥିବାରୁ ଅସୁବିଧା ହେଉଛି। ଏହା ଛଡା କଟକ-ଚାନ୍ଦବାଲି ରାସ୍ତାର ବହୁ ଜନଗହଳି ସ୍ଥାନରେ ଟ୍ରାଫିକ ବ୍ୟବସ୍ଥା ନାହିଁ। ଫଳରେ ଯାତାୟାତ କ୍ଷେତ୍ରରେ ଅସୁବିଧା ସୃଷ୍ଟି ହେଉଛି। କଟକ-ଚାନ୍ଦବାଲି ରାସ୍ତାର ପଟ୍ଟାମୁଣ୍ଡାଇ ବାଇପାସ ବିଜୁ ପଟ୍ଟନାୟକ ଛକ ଏବେ ଏକ ବ୍ୟସ୍ତ ବହୁଳ ଛକରେ ପରିଣତ ହୋଇଛି। ଏଠାରେ ସ୍ପିଡ ବ୍ରେକର ଲଗାଇବାକୁ ସାଧାରଣରେ ଦାବି ହେଉଛି।
ଏହା ପଟ୍ଟାମୁଣ୍ଡାଇ ସହରର ପ୍ରବେଶ ପଥ ହୋଇଥିବାରୁ ଏହି ଛକର ଗୁରୁତ୍ୱ ବଢ଼ିଯାଇଛି। ଏଥିସହ ପଟ୍ଟାମୁଣ୍ଡାଇ ବାଇପାସ ବିଜୁ ପଟ୍ଟନାୟକ ଛକ ଦେଇ ବସ, ଟ୍ରକ୍, ଟ୍ରେକର ଆଦି ବିଭିନ୍ନ ଯାନବାହାନ ଆଳି, ରାଜନଗର ଓ ରାଜକନିକା ଅଞ୍ଚଳକୁ ଯାତାୟାତ କରିଥାଏ। ବିଜୁ ପଟ୍ଟନାୟକ ଛକ ରାସ୍ତାର ଉଭୟ ପାଶର୍ବରେ ପଟ୍ଟାମୁଣ୍ଡାଇ ଆଳି, ରାଜନଗର ଓ ଚୌଦକୁଲାଟ ରାସ୍ତା ସଂଯୋଗ ରହିଛି। ଫଳରେ ଆଳି, ରାଜନଗର ଆଦି ଅଞ୍ଚଳରୁ ଆସୁଥିବା ବିଭିନ୍ନ ଯାତ୍ରୀ ଓ ମାଲବାହୀ ଗାଡି ଓ ପଟ୍ଟାମୁଣ୍ଡାଇ ସହର ମଧ୍ୟରୁ ଆସୁଥିବା ଗାଡି କୌଣସି ସଂକେତ ନ ପାଇ ପ୍ରାୟ ସମୟରେ ମୁହାଁମୁହିଁ ହେବା ପରିସ୍ଥିତି ସୃଷ୍ଟି ହେଉଛି। ଫଳରେ ଅନେକ ସମୟରେ ଛୋଟ ବଡ଼ ଦୁର୍ଘଟଣା ଘଟୁଛି। ଏ ନେଇ ସାଧାରଣରେ ଉଦ୍ବେଗ ପ୍ରକାଶ ପାଇଛି। କଟକ-ଚାନ୍ଦବାଲି ରାସ୍ତାର ପଟ୍ଟାମୁଣ୍ଡାଇ ବାଇପାସ୍ ବିଜୁ ପଟ୍ଟନାୟକ ଛକଠାରେ ଦୁର୍ଘଟଣା ରୋକିବା ପାଇଁ ଏକ ସ୍ପିଡ଼ ବ୍ରେକର ଲଗାଇବା ନିମନ୍ତେ ଉକତ୍ଳମଣି ଯୁବକ ସଂଘ ପକ୍ଷରୁ ସରକାରଙ୍କଠାରେ ଦାବି କରାଯାଇଛି। ଉକତ୍ଳ ମଣି ଯୁବକ ସଂଘ ଉପସଭାପତି ଗୁଡ଼ୁ ବିଶ୍ୱାଳଙ୍କ ନେତୃତ୍ୱରେ ଏକ ପ୍ରତିନିଧିଦଳ କେନ୍ଦ୍ରାପଡ଼ା ଜିଲାପାଳ ଅମ୍ରିତ ଋତୁରାଜଙ୍କୁ ଭେଟି ଦାବିପତ୍ର ପ୍ରଦାନ କରିଛନ୍ତି। ଜିଲାପାଳ ଏ ଦିଗରେ ସରକାରୀ ସ୍ତରରେ ଆଲୋଚନା କରି ଯଥା ସମ୍ଭବ ପଦକ୍ଷେପ ନେବାକୁ ପ୍ରତିଶ୍ରୁତି ଦେଇଛନ୍ତି।
