ଅନୁଗୋଳ ଅଫିସ,୧୬ା୧୨: ଅନୁଗୋଳ ସଦର ଥାନା ଡେରଜାଙ୍ଗ ପ୍ରୋଜେକ୍ଟଠାରେ ୨୦୨୧ ସେପ୍ଟେମ୍ବରରେ ଡକାୟତ ଜଗନ ସେନାପତିଙ୍କୁ ପିଟି ପିଟି ହତ୍ୟା କରାଯାଇଥିଲା। ଏହି ଘଟଣାର ୧୪ ମାସ ପରେ ମୁଖ୍ୟ ଅଭିଯୁକ୍ତ ବିନୟ କୁମାର ଦାସଙ୍କୁ ପୋଲିସ ଗିରଫ କରିଛି। ହେମସୁରପଡ଼ାରେ ବିନୟ ଆତ୍ମଗୋପନ କରିଥିବା ଖବରପାଇ ପୋଲିସ ତାଙ୍କୁ ଧରିବା ସହ କୋର୍ଟ ଚାଲାଣ କରିଛି। ଏହାକୁ ମିଶାଇ ହତ୍ୟା ଘଟଣାରେ ଗିରଫଙ୍କ ସଂଖ୍ୟା ୯ରେ ପହଞ୍ଚତ୍ଥିବା ଥାନା ଅଧିକାରୀ ସତ୍ୟବ୍ରତ ରାଉତ ସୂଚନା ଦେଇଛନ୍ତି। ରାଉତ କହିଛନ୍ତି, ୨୦୨୧ ସେପ୍ଟେମ୍ବର ୧୮ରେ ଜଗନ ସେନାପତିଙ୍କ ମୃତଦେହ ଡେରଜାଙ୍ଗ ପ୍ରୋଜେକ୍ଟ ଉପରେ ଠାବ କରାଯାଇଥିଲା। ଜଗନଙ୍କ ପରିବାର ଲୋକେ ଲିଖିତ ଅଭିଯୋଗ କରିବା ପରେ ପୋଲିସ ନଂ. ୫୬୮/୨୧ରେ ମାମଲା ରୁଜୁ କରି ତଦନ୍ତ ଚଳାଇଥିଲା। ଜଗନ ଉକ୍ତ ଦିନ ରାତିରେ ଡେରଜାଙ୍ଗ ପ୍ରୋଜେକ୍ଟ ନିକଟ ଗାଁରେ ପଶି ମହିଳାଙ୍କୁ ଗାଳିଗୁଲଜ ସହ ଅସଦାଚରଣ କରିଥିଲା। ଉକ୍ତ ଗ୍ରାମରୁ ବିଭିନ୍ନ ସମୟରେ ସେ ଚୋରି କରୁଥିଲା। ଜଗନର କାର୍ଯ୍ୟକୁ ନେଇ ଉତ୍ତ୍ୟକ୍ତ ଥିବା ଗ୍ରାମର କେତେଜଣ ଲୋକ ଠେଙ୍ଗାରେ ପିଟି ପିଟି ଜଗନଙ୍କୁ ହତ୍ୟା କରିଥିବା ତଦନ୍ତରୁ ଜଣାପଡ଼ିଥିଲା। ପୋଲିସ ଗ୍ରାମର ୮ ଜଣଙ୍କୁ ପୂର୍ବରୁ ଗିରଫ କରିଥିଲା।
