ଛେଣ୍ଡିପଦା,୯ା୭(ସ୍ବ.ପ୍ର.) ଅନୁଗୋଳ ଜିଲା ଛେଣ୍ତିପଦା ଥାନା ପିପଳବାହାଳ ଗ୍ରାମର ମାନସ ସାହୁଙ୍କୁ ଶୋଇଥିବା ଅବସ୍ଥାରେ ଗତ ମେ ୨୦ ତାରିଖରେ ପଥରରେ ଛେଚି ଦିଆଯାଇଥିଲା। ଚିକିତ୍ସାଧୀନ ଅବସ୍ଥାରେ ମାନସଙ୍କ ମୃତ୍ୟୁ ହୋଇଯାଇଥିଲା। ଦୀର୍ଘ ଦେଢ଼ ମାସ ପରେ ପୋଲିସ ଘଟଣାର ପର୍ଦ୍ଦାଫାଶ କରିବା ସହ ମାନସଙ୍କ ସାଙ୍ଗର ଭାଇ ଅଭିଯୁକ୍ତ ଅମର ନାଥ ମାଝିଙ୍କୁ ଗୁରୁବାର ବିଳମ୍ବିତ ରାତିରେ ଗିରଫ କରିଛି।
ପୋଲିସ କହିଛି, ମାନସଙ୍କ ସାଙ୍ଗ ହେଉଛନ୍ତି ସେହି ଗ୍ରାମର ଦେବାନନ୍ଦ ମାଝି। ଅତି ଘନିଷ୍ଠ ହୋଇଥିବାରୁ ଦେବାନନ୍ଦଙ୍କ ଘରକୁ ମାନସ ଯିବା ଆସିବା କରନ୍ତି। କିନ୍ତୁ ଏହାକୁ ଦେବାନନ୍ଦଙ୍କ ବାପା ପସନ୍ଦ କରୁ ନ ଥିଲେ। ସେ ବାରଣ କରିଥିଲେ ମଧ୍ୟ ମାନସ ଯିବାଆସିବା ଜାରି ରଖିଥିଲେ। ଏହାକୁ ନେଇ ଦେବାନନ୍ଦଙ୍କ ସାନଭାଇ ତଥା ଅଭିଯୁକ୍ତ ଅମରନାଥ ମାଝି ଓ ମାନସଙ୍କ ମଧ୍ୟରେ ଅନେକଥର ବଚସା ହୋଇଥିଲା। ଏପରି କି ଦୁହେଁ ପରସ୍ପରକୁ ମାରିଦେବା ପାଇଁ ଧମକ ଦେଇଥିଲେ। ମେ ୨୦ ତାରିଖ ବିଳମ୍ବିତ ରାତିରେ ଅମରନାଥ ଫେରିବାବେଳେ ମାନସ ଦୋଳ ମଣ୍ତପ ପଡିଆ କୋଠଘରେ ଶୋଇଥିବା ଦେଖିବାକୁ ପାଇଥିଲେ। ତେଣୁ ପୂର୍ବ ରାଗକୁ ନେଇ ଅମରନାଥ ଏକ ପଥରରେ ମାନସଙ୍କ ମୁଣ୍ତକୁ ଛେଚି ଫେରାର ହୋଇଯାଇଥିଲେ। ମାନସଙ୍କୁ ପରିବାର ଲୋକେ ପ୍ରଥମେ ଅନୁଗୋଳ ଓ ପରେ କଟକ ମେଡିକାଲରେ ଭର୍ତ୍ତି କରିଥିଲେ। ସେଠାରେ ମାସାଧିକ କାଳ ଚିକିତ୍ସା ସତ୍ତ୍ୱେ ତାଙ୍କର ମୃତ୍ୟୁ ହୋଇଯାଇଥିଲା। ଛେଣ୍ଡିପଦା ପୋଲିସ ନଂ ୨୪୬/୨୨ରେ ମାମଲା ରୁଜୁ କରି ଅଭିଯୁକ୍ତଙ୍କୁ ଧରିବାକୁ ବିଭିନ୍ନ ସ୍ଥାନରେ ଚଢାଉ କରିଥିଲା। କିଶୋରନଗର ବ୍ଲକ ହଣ୍ଡପା ଥାନା ଜିଞ୍ଜିରିଡା ଅଞ୍ଚଳରେ ଅମରନାଥ ଲୁଚିଥିବା ବିଶ୍ୱସ୍ତ ସୂତ୍ରରୁ ଖବର ମିଳିବା ପରେ ପୋଲିସ ସେଠାରେ ଚଢାଉ କରି ଅମରନାଥଙ୍କୁ ଗିରଫ କରିଥିଲା। ଅମରନାଥ ପଥରରେ ଛେଚି ମାନସଙ୍କୁ ହତ୍ୟା କରିଥିବା ସ୍ବୀକାର କରିଛନ୍ତି ବୋଲି ପୋଲିସ ପ୍ରକାଶ କରିଛି।
