ପାଟଣା,୧୭।୭(ସ୍ବ.ପ୍ର.)-ବଦଳୁନି ‘ସୌଭାଗ୍ୟ’ ଯୋଜନାରେ ଭାଗ୍ୟ। ଏହି ଯୋଜନାରେ ସାମିଲ ହୋଇ ୨୪ ପରିବାର ବିଜୁଳି ଆଲୁଅରୁ ବଞ୍ଚିତ ହୋଇଛନ୍ତି। ଟ୍ରାନ୍ସଫର୍ମର ବସିଛି, ଖୁଣ୍ଟ ପୋତି ତାର ବି ଟଣାଯାଇଛି। ହେଲେ ଖୁଣ୍ଟରେ ହିଁ ଝୁଲି ରହିଛି ‘ସୌଭାଗ୍ୟ’ ଯୋଜନା ସହ ହିତାଧିକାରୀଙ୍କ ଭାଗ୍ୟ। ଫଳରେ ଦୀର୍ଘ ୨ବର୍ଷ ହେଲା ସେହି ତାର, ଖୁଣ୍ଟ ଦେଖି ବିଜୁଳି ବଦଳରେ ଡିବିରିରେ କାମ ଚଳାଉଛନ୍ତି କେନ୍ଦୁଝର ଜିଲା ପାଟଣା ବ୍ଲକ ଚାକୁଣ୍ଡାପାଳ ପଞ୍ଚାୟତ ଶରଧାପୁର ଗ୍ରାମବାସୀ। ବାରମ୍ବାର ବିଭାଗୀୟ ଅଧିକାରୀଙ୍କୁ ଅଭିଯୋଗ କରିବା ସତ୍ତ୍ୱେ କେହି ଗୁରୁତ୍ୱ ଦେଉ ନ ଥିବା ସେମାନେ କହିବା ସହ ତୁରନ୍ତ ସମସ୍ୟା ସମାଧାନ କରିବାକୁ ଗାଁ ଲୋକେ ଦାବି କରିଛନ୍ତି।
ଏନେଇ ଗ୍ରାମର କୀର୍ତ୍ତନ ବିହାରୀ ନାଏକ ଓ ସୁକାନ୍ତ ବେହେରା ପ୍ରମୁଖଙ୍କ ଅଭିଯୋଗ ମୁତାବକ ୨୦୧୮ରୁ ସମସ୍ତ ପରିବାରକୁ ‘ସୌଭାଗ୍ୟ’ ଯୋଜନାରେ ବିଜୁଳି ଯୋଗାଯିବା ଖୁଣ୍ଟ ପୋତାଯାଇ ଟ୍ରାନ୍ସଫର୍ମର ବସାଯାଇଛି। ଏଥିସହ ଘରକୁ ଘର ତାର ମଧ୍ୟ ଟଣାଯାଇଛି। ହେଲେ କାହିଁକି କେଜାଣି କୋଉଠି କାମ ଅଟକିଛି ବିଜୁଳି ଜଳୁନି। କେତେ ବର୍ଷ ପୂର୍ବରୁ ଏକ ସଂସ୍ଥା ସୋଲାର ଲାଇଟ ଦେଇଥିଲା ଯେ ସେସବୁ ଖରାପ ହୋଇଗଲାଣି। ପିଲା ଛୁଆ ଡିବିରି ଆଲୁଅରେ ବହୁତ ହଇରାଣ ହୋଇ ପାଠ ପଢୁଛନ୍ତି। ଏଣେ ଗାଁକୁ ଲାଗି ଜଙ୍ଗଲ ଥିବାରୁ ଅନ୍ଧାରହେଲେ ଜଙ୍ଗଲ ଜନ୍ତୁଙ୍କ ଭୟ ଯୋଗୁ ପଦାକୁ ବାହାରି ହେଉନାହିଁ। ନଳକୂଅ ଖରାପ ହେଲେ କାଞ୍ଝାରି ନଦୀ ବାଲିରେ ଚୁଆ ଖୋଳି ପାଣି ଆଣିବାକୁ ପଡୁଛି। ନଳ ପାଣି ଆସିବ ବୋଲି ପାଇପ ପଡିଥିଲା ଯେ, ପାଇପ ଚୋରି ହୋଇଗଲା ପଛେ ଗାଁ କୁ ପାଣି ଆସି ପାରିଲା ନାହିଁ। ଗାଁରେ ଅଙ୍ଗନଓ୍ବାଡି କେନ୍ଦ୍ରଟିଏ ବି ହୋଇ ପାରୁନି। ପିଲାମାନଙ୍କୁ ପାଠ ପଢିବା ପାଇଁ ବିଲ ଖମାର ରାସ୍ତା ଡେଇଁ ୨ କି.ମି. ଦୂରରେ ଥିବା ବୟା ମୁଣ୍ଡା ଇରିଙ୍ଗର ସାହି ପ୍ରାଥମିକ ବିଦ୍ୟାଳୟକୁ ଚାଲି ଚାଲି ଯିବାକୁ ପଡୁଛି। ଏଭଳି ଅନେକ ସର୍ବନିମ୍ନ ମୌଳିକ ସୁବିଧା ସୁଯୋଗ ପାଇବାରୁ ଏହି ସାହିର ପିଲାମାନେ ବଞ୍ଚିତ ହେଉଛନ୍ତି। ସ୍ବାଧୀନତାର ୭୨ ବର୍ଷ ପରେ ବି ଏଠିକାର ଅଧିବାସୀଙ୍କ ବିକାଶ କଥା ଦୂରେ ଥାଉ ମୌଳିକ ସମସ୍ୟା ଗୁଡିକର ସମାଧାନ ଏଯାଏ ହୋଇପାରିନାହିଁ। ଏସମ୍ପର୍କରେ ବିଦ୍ୟୁତ ବିଭାଗ ଉପଖଣ୍ଡ ଅଧିକାରୀ କାର୍ତ୍ତିକ ଚନ୍ଦ୍ର ସାହୁଙ୍କୁ ପଚାରିବାରୁ ଏକ ଠିକା ସଂସ୍ଥା ତରଫରୁ ସରକାରଙ୍କ ‘ସୌଭାଗ୍ୟ’ ଯୋଜନାରେ ଉକ୍ତ ଗାଁକୁ ବିଦ୍ୟୁତକରଣ କାର୍ଯ୍ୟ ହାତକୁ ନିଆଯାଇଛି। ପ୍ରାୟ ୯୦% କାମ ସମ୍ପୂର୍ଣ୍ଣ ହୋଇଛି। ସମ୍ପୃକ୍ତ ସଂସ୍ଥା ଯେତେଶୀଘ୍ର କାର୍ଯ୍ୟ ଶେଷ କରି ବିଦ୍ୟୁତ ବିଭାଗକୁ କାଗଜପତ୍ର ହସ୍ତାନ୍ତର କରିବ ସେତେ ଶୀଘ୍ର ବିଦ୍ୟୁତ ସଂଯୋଗ ହୋଇ ପାରିବ ବୋଲି ସେ ତାଙ୍କ ପ୍ରତିକ୍ରିୟାରେ କହିଛନ୍ତି।
