ଅକଲାଣ୍ଡ,୪।୧୧: ଇଡେନ ପାର୍କରେ ବିରାଟ କୋହଲିଙ୍କ ଚମତ୍କାର ଫିଲ୍ଡିଂ ଏବେ ଚର୍ଚ୍ଚାରେ। ନ୍ୟୁଜିଲାଣ୍ଡ ବିପକ୍ଷ ପ୍ରଥମ ଦିନିକିଆ ମ୍ୟାଚ୍ରେ କୋହଲି ନିଜର ଚମତ୍କାର ଫିଲ୍ଡିଂ ଦକ୍ଷତା ଦେଖାଇ ନାଥନ ସ୍ମିଥଙ୍କୁ ପାଭିଲିୟନ ଫେରାଇଛନ୍ତି। ଗୋଟିଏ ହାତରେ ଧରିଥିବା ଏହି ଚମତ୍କାର କ୍ୟାଚ୍ର ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି।
ମ୍ୟାଚ୍ର ୨୯ତମ ଓଭରରେ ଏହି ରୋମାଞ୍ଚକର ଘଟଣା ଘଟିଥିଲା। ଭାରତ ପକ୍ଷରୁ ଅଂଶୁଲ କାମ୍ବୋଜ ବୋଲିଂ କରୁଥିବା ବେଳେ ନ୍ୟୁଜିଲାଣ୍ଡ ପକ୍ଷରୁ ନାଥନ ସ୍ମିଥ ବ୍ୟାଟିଂ କରୁଥିଲେ। ଓଭରର ତୃତୀୟ ବଲ୍ଟି କାମ୍ବୋଜ ଅଫ ଷ୍ଟମ୍ପ ବାହାରେ ଫୁଲ ଲେନ୍ଥରେ ପକାଇଥିଲେ। ସ୍ମିଥ ଆଗକୁ ଆସି ରକ୍ଷଣାତ୍ମକ ଢଙ୍ଗରେ ବଲ୍କୁ ଖେଳିବାକୁ ଚେଷ୍ଟା କରିଥିଲେ। କିନ୍ତୁ ବଲ୍ଟି ବ୍ୟାଟ୍ର ବାହାର ପାର୍ଶ୍ୱରେ ବାଜି ଦ୍ୱିତୀୟ ସ୍ଲିପ ଆଡକୁ ଚାଲିଯାଇଥିଲା। ସେଠାରେ ଫିଲ୍ଡିଂ କରୁଥିବା ବିରାଟ କୋହଲି ଡାହାଣ ପଟକୁ ଚମତ୍କାର ଡାଇଭ ମାରି ଗୋଟିଏ ହାତରେ ବଲ୍ଟିକୁ ଧରି ନେଇଥିଲେ। କୋହଲିଙ୍କ ଏହି ଅସାଧାରଣ କ୍ୟାଚ ଦେଖି ସମସ୍ତେ ଆଶ୍ଚର୍ଯ୍ୟ ହୋଇଯାଇଥିଲେ।
ତେବେ କ୍ୟାଚ୍ଟିକୁ ନେଇ ପଡ଼ିଆରେ ଥିବା ଅମ୍ପାୟାରମାନଙ୍କ ମନରେ ସାମାନ୍ୟ ସନ୍ଦେହ ରହିଥିଲା। ତେଣୁ ସେମାନେ ତୃତୀୟ ଅମ୍ପାୟାରଙ୍କ ସହାୟତା ନେଇଥିଲେ। ରିପ୍ଲେ ଯାଞ୍ଚ ପରେ କୋହଲିଙ୍କ କ୍ୟାଚକୁ ସଠିକ ବୋଲି ଘୋଷଣା କରାଯାଇଥିଲା। ଏହାପରେ ନାଥନ ସ୍ମିଥଙ୍କୁ ଆଉଟ ଘୋଷଣା କରାଯିବା ସହ ଭାରତୀୟ ଖେଳାଳିମାନେ ଖୁସିରେ ଝୁମି ଉଠିଥିଲେ।
ପ୍ରଥମ ଦିନିକିଆ ମ୍ୟାଚ୍ରେ ନାଥନ ସ୍ମିଥ ବ୍ୟାଟିଂରେ ବିଶେଷ କିଛି କରିପାରି ନଥିଲେ। ନ୍ୟୁଜିଲାଣ୍ଡ ପକ୍ଷରୁ ଅଷ୍ଟମ ସ୍ଥାନରେ ବ୍ୟାଟିଂ କରିବାକୁ ଆସିଥିବା ସ୍ମିଥ ୯ଟି ବଲ୍ର ସାମ୍ନା କରି ମାତ୍ର ୧ ରନ କରିଥିଲେ। ଦଳର ସ୍କୋର ୧୧୫ ରନ ଥିବା ବେଳେ ସେ ୨୯ତମ ଓଭରରେ ସପ୍ତମ ବ୍ୟାଟର୍ ଭାବେ ଆଉଟ ହୋଇଥିଲେ।
ନାଥନ ସ୍ମିଥ ନ୍ୟୁଜିଲାଣ୍ଡ ଦଳର ଜଣେ ବୋଲିଂ ଅଲରାଉଣ୍ଡର। ଏହି ମ୍ୟାଚ ପୂର୍ବରୁ ସେ ନ୍ୟୁଜିଲାଣ୍ଡ ପକ୍ଷରୁ ୨୧ଟି ଦିନିକିଆ ମ୍ୟାଚ ଖେଳିଥିଲେ। ବୋଲିଂରେ ୨୧ଟି ଇନିଂସ୍ରୁ ୩୫.୭୯ ହାରରେ ୨୪ଟି ଉଇକେଟ ନେଇଥିବା ବେଳେ ବ୍ୟାଟିଂରେ ୧୫ଟି ଇନିଂସରୁ ୧୦.୪୫ ହାରରେ ୧୧୫ ରନ କରିଥିଲେ।
VIRAT KOHLI MAGIC – A ONE HANDED STUNNER 🥶 https://t.co/Ei4gl8eewM
— Johns. (@CricCrazyJohns) November 4, 2026
Dharitri – Odisha’s No.1 Odia Daily
