ଗୋଲାମୁଣ୍ଡା,୪ା୧୧(ବଟକୃଷ୍ଣ ପଣ୍ଡା): କଳାହାଣ୍ଡି ଜିଲା ଗୋଲାମୁଣ୍ଡା ବ୍ଲକ ଅନ୍ତର୍ଗତ ଲେତେର ପଞ୍ଚାୟତର ତୁର୍ଲାପଡା(ବାଗମୁଣ୍ଡା ) ଗ୍ରାମରେ ବୁଧବାର ‘ଅନ୍ତ୍ୟୋଦୟ ନଗର’ ପ୍ରକଳ୍ପର ସମୀକ୍ଷା କରିଛନ୍ତି ଜିଲାପାଳ ପାଓ୍ବାର ସଚିନ ପ୍ରକାଶ। ଏହି ଅବସରରେ ଜିଲାପାଳ ସେଠାରେ ନିର୍ମାଣାଧୀନ ‘ଅନ୍ତ୍ୟୋଦୟ ଗୃହ’ର ହିତାଧିକାରୀମାନଙ୍କୁ ଭେଟି ସେମାନଙ୍କ ସୁବିଧା-ଅସୁବିଧା ବିଷୟରେ ସିଧାସଳଖ ପଚାରି ବୁଝିଥିଲେ। ଏଥିସହିତ ଚାଲିଥିବା ଆବାସ ନିର୍ମାଣ କାର୍ଯ୍ୟର ଅଗ୍ରଗତିର ସମୀକ୍ଷା କରିବା ସହ ହିତାଧିକାରୀଙ୍କ ସ୍ଥାୟୀ ଜୀବିକା ନିର୍ବାହ ଏବଂ ଆୟ ବୃଦ୍ଧି ପାଇଁ କରାଯାଉଥିବା ବିଭିନ୍ନ ସରକାରୀ ଯୋଜନାର ତଦାରଖ କରିଥିଲେ। ସମସ୍ତ କାର୍ଯ୍ୟକୁ ନିର୍ଦ୍ଧାରିତ ସମୟ ମଧ୍ୟରେ ଶେଷ କରିବାକୁ ଜିଲାପାଳ ସମ୍ପୃକ୍ତ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଥିଲେ। ସେହିପରି ଘର ତିଆରି ସହିତ ସେମାନେ କିପରି ସାବଲମ୍ବୀ ହୋଇପାରିବେ, ସେ ନେଇ ବିଭାଗୀୟ ଅଧିକାରୀଙ୍କ ସହ ଜିଲାପାଳ ଆଲୋଚନା କରିଥିଲେ।
ଏହି ଗସ୍ତ ସମୟରେ ଜିଲାପାଳଙ୍କ ସହିତ ଗୋଲାମୁଣ୍ଡା ବିଡିଓ ତ୍ରିପୁର ମହାନନ୍ଦ, ତହସିଲଦାର ଚନ୍ଦନ କୁମାର ନାୟକ, ଜିଲା ଗ୍ରାମୀଣ ଗୃହ ଯୋଜନାର ଏପିଡି ଅମୁଲ୍ୟ ବାଉଳ, ଏଇଇ ମନୋରଞ୍ଜନ ମହାପାତ୍ର, ସ୍ଥାନୀୟ ନୋଡାଲ ଅଧିକାରୀ ଚିତ୍ତରଞ୍ଜନ ଜେନା, ଏପିଓ କ୍ଷେତ୍ରମୋହନ ମାଝୀ, ପିଇଓ ଅଲେଖ ସା, ବିପିସି ମଧୁସୁଦନ ସାହୁ ଜନ ପ୍ରତିନିଧି ଏବଂ ବ୍ଲକ ପ୍ରଶାସନର ବହୁ ବରିଷ୍ଠ ଅଧିକାରୀ ଉପସ୍ଥିତ ଥିଲେ।
ସୂଚନାଯୋଗ୍ୟ ଯେ, ବାଗମୁଣ୍ଡାଠାରେ ‘ଅନ୍ତ୍ୟୋଦୟ ନଗର’ ପ୍ରତିଷ୍ଠା ପାଇଁ ସରକାରଙ୍କ ତରଫରୁ ୧ ଏକର ଜମି ଯୋଗାଇ ଦିଆଯାଇଛି। ଏହି ଜମିରେ ଅନ୍ତ୍ୟୋଦୟ ଗୃହ ଯୋଜନାର ୧୩ ଜଣ ନିରାଶ୍ରୟା ବିଧବା ହିତାଧିକାରୀଙ୍କୁ ଥଇଥାନ କରାଯାଉଛି। ଏହି ଜମିର ସଠିକ, ସୁଚିନ୍ତିତ ଓ ବ୍ୟବସ୍ଥିତ ବିକାଶ ଉପରେ ଜିଲାପାଳ ବିଶେଷ ଗୁରୁତ୍ୱ ଦେଇଛନ୍ତି।
କେବଳ ବାସଗୃହ ନୁହେଁ, ବରଂ ଏହି ୧୩ ଜଣ ମହିଳା ହିତାଧିକାରୀଙ୍କ ପାଇଁ ସମ୍ମାନଜନକ ଜୀବନଧାରଣ, ସ୍ଥାୟୀ ଜୀବିକାର ସୁଯୋଗ ଏବଂ ସାମାଜିକ ତଥା ଅର୍ଥନୈତିକ ସୁରକ୍ଷା ସୁନିଶ୍ଚିତ କରିବା ହିଁ ପ୍ରଶାସନର ମୂଳ ଲକ୍ଷ୍ୟ ରହିଛି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଓ କଳାହାଣ୍ଡି ଜିଲାପାଳ ପାୱାର ସଚିନ ପ୍ରକାଶ ଏବଂ ଜିଲା ମୁଖ୍ୟ ଉନ୍ନୟନ ଅଧିକାରୀ ସୋମ୍ୟ ରଞ୍ଜନ ପ୍ରଧାନଙ୍କ ଆଗ୍ରହ କ୍ରମେ ଏହି ମୁରବି ବିହୀନ ପରିବାର ଙ୍କ ପାଇଁ ଏହି ନଗର ନିର୍ମାଣ ହେବାକୁ ଯାଉଛି ବୋଲି ଆରମ୍ଭରୁ ଅନ୍ତ୍ୟୋଦୟ ନଗର ନିର୍ମାଣ ପାଇଁ ପ୍ରସ୍ତାବ ଦେଇଥିବା ଗୋଲାମୁଣ୍ଡା ବ୍ଲକ ଅଧ୍ୟକ୍ଷ ବିନ୍ଦୁ ମହାନନ୍ଦ ମତାମତ ଦେଇଛନ୍ତି।
