ବୁଗୁଡ଼ା,୧୪ା୮(ଡି.ଏନ୍.ଏ.): ଲଗାଣ ବର୍ଷା ଯୋଗୁ ବୁଗୁଡ଼ା ବ୍ଲକ ଅନ୍ତର୍ଗତ ବାଘୁଆ ଜଳଭଣ୍ଡାରର ଜଳ ବିପଦ ସଙ୍କେତ ନିକଟରେ ପହଞ୍ଚିବା ପରେ ଜଳଭଣ୍ଡାରର ସୁରକ୍ଷା ଦୃଷ୍ଟିରୁ ତାର ଦୁଇଟି ଗେଟ୍ ଖୋଲାଯାଇ ୨୦୨୨ର ପ୍ରଥମ ବନ୍ୟା ଜଳକୁ ନଦୀରେ ଶନିବାର ରାତିରେ ଛଡ଼ାଯାଇଥିବା ଜଣାପଡ଼ିଛି। ଓଡିଶା ସରକାରଙ୍କ ମୁଖ୍ୟ ଶାସନ ସଚିବ ଏବଂ ଜଳ ସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀ ବିଜୟ କୁମାର ମିଶ୍ରଙ୍କ ନିର୍ଦ୍ଦେଶ କ୍ରମେ ଉକ୍ତ ବନ୍ୟା ଜଳ ନିଷ୍କାସନ କରାଯାଇଥିବା ବାଘୁଆ ଉପବିଭାଜନ ସହ ନିର୍ବାହୀ ଯନ୍ତ୍ରୀ ବିଷ୍ଣୁ ଚରଣ ସାହୁ ସୂଚନା ଦେଇଛନ୍ତି। ତାଙ୍କର କହିବା ଅନୁଯାୟୀ, ଜଳଭଣ୍ଡାରରର ଜଳ ଧାରଣ ବିପଦ ସଙ୍କେତ ୧୧୩. ୮୫ ମିଟର ଥିବାବେଳେ ବର୍ତ୍ତମାନ ଏହା ୧୧୩.୬୦ ମିଟରରେ ପହଞ୍ଚି ବିପଦ ସଙ୍କେତର ନିକଟତର ହେଲାଣି। ତେଣୁ ଜଳଭଣ୍ଡାର ସୁରକ୍ଷା ଦୃଷ୍ଟିରୁ ବନ୍ୟାଜଳକୁ ଗେଟ୍ ଦେଇ ନଦୀଶଯ୍ୟାରେ ଛଡ଼ା ଯାଇଛି। ବର୍ତ୍ତମାନ ସୁଦ୍ଧା ଜଳଭଣ୍ଡାର ଭିତରକୁ ବର୍ଷା ଜଳ ପ୍ରତି ସେକେଣ୍ଡରେ ୩୦ ଘନ ମିଟର ପଶୁଥିବା ବେଳେ ପ୍ରତି ଗେଟ୍ ଦେଇ ମଧ୍ୟ ଅନୁରୂପ ସେକେଣ୍ଡରେ ୩୦ ଘନ ମିଟର ଜଳ ନିଷ୍କାସନ କରାଯାଉଛି। ନଦୀରେ ବନ୍ୟା ଜଳ ଛଡ଼ାଯିବା ପୂର୍ବରୁ ନଦୀକୂଳିଆ ଅଞ୍ଚଳର ଗ୍ରାମବାସୀଙ୍କୁ ମାଇକ୍ ଯୋଗେ ନଦୀ ଭିତରକୁ ନ ଯିବା ଏବଂ ଗୃହ ପାଳିତ ପଶୁମାନଙ୍କୁ ନ ଛାଡ଼ିବା ସକାଶେ ସତର୍କ ସୂଚନା ପ୍ରଶାସନ ପକ୍ଷରୁ ଜାରି କରାଯାଇଛି।
