କୋଲକାତା,୩।୨(ପି.ଟି.): ଏବେ ବିଭିନ୍ନ ଭୁଲ କାରଣ ପାଇଁ ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ୍) ଚର୍ଚ୍ଚାରେ ରହିଛି। ଇଷ୍ଟ ବେଙ୍ଗଲର ହାଇପ୍ରୋଫାଇଲ ଇଂଲଣ୍ଡ କୋଚ୍ ରୋବି ଫୋଲର ରେଫରିଙ୍କ ବିରୋଧରେ ବର୍ଣ୍ଣବୈଷମ୍ୟ ମନ୍ତବ୍ୟ ଦେଇ ଦଣ୍ଡିତ ହୋଇଛନ୍ତି। ଶୃଙ୍ଖଳାଗତ କମିଟି ମଙ୍ଗଳବାର ତାଙ୍କୁ ୫ଟି ମ୍ୟାଚ୍ରୁ ବାସନ୍ଦ କରିଛି। ଏଥିସହ ତାଙ୍କ ଉପରେ ୬ ଲକ୍ଷ ଟଙ୍କାର ଜରିମାନା ମଧ୍ୟ ଧାର୍ଯ୍ୟ କରାଯାଇଛି।
ଜାନୁୟାରୀ ୨୯ରେ ଏଫ୍ସି ଗୋଆ ବିପକ୍ଷରେ ଇଷ୍ଟ ବେଙ୍ଗଲ ୧-୧ ଗୋଲରେ ମ୍ୟାଚ୍ ଡ୍ର ରଖିଥିଲା। ଏଥିରେ ଫୋଲର ନୈରାଶ୍ୟ ଜାହିର କରିଥିଲେ। ସେ ରେଫରିଙ୍କ ନିଷ୍ପତ୍ତିରେ ଅସନ୍ତୋଷ ବ୍ୟକ୍ତ କରିଥିଲେ। ରେଫରି ଇଂଲିଶ ବିରୋଧୀ କିମ୍ବା ଇଷ୍ଟବେଙ୍ଗଲ ବିରୋଧୀ ହୋଇପାରନ୍ତି ବୋଲି ସେ ମନ୍ତବ୍ୟ ଦେଇଥିଲେ। ଏହାକୁ ମ୍ୟାଚ୍ କମିଶନର ଗୁରୁତ୍ୱ ଦେଇ ଶୃଙ୍ଖଳାଗତ କମିଟିକୁ ଏ ନେଇ ଅବଗତ କରାଇଥିଲେ। ଏ ନେଇ ଶୁଣାଣି ହେବା ପରେ କମିଟି ଦୃଷ୍ଟାନ୍ତମୂଳକ ନିଷ୍ପତ୍ତି ନେଇ ଫୋଲରଙ୍କୁ ଦଣ୍ଡିତ କରିଛି। ଫୋଲର ଦୋଷୀ ସାବ୍ୟସ୍ତ ହୋଇଛନ୍ତି ଓ ତାଙ୍କୁ ଅତିକମ୍ରେ ୫ଟି ମ୍ୟାଚ୍ରୁ ବାସନ୍ଦ କରାଯିବା ସହ ୬ ଲକ୍ଷ ଟଙ୍କା ଜରିମାନା ଧାର୍ଯ୍ୟ କରାଯାଇଛି ବୋଲି ଆଇଏସ୍ଏଲର ଜଣେ ଅଧିକାରୀ କହିଛନ୍ତି। ବର୍ଣ୍ଣବୈଷମ୍ୟ ମନ୍ତବ୍ୟ ଦେଇ ଲିଭରପୁଲର ଏହି ପୂର୍ବତନ ଖେଳାଳି ଫୋଲର ଅଲ ଇଣ୍ଡିଆ ଫୁଟବଲ ଫେଡେରେଶନ (ଏଆଇଏଫ୍ଏଫ୍) ଆଚରଣବିଧିର ୫୯.୧ (ଏ)ର ଉଲ୍ଲଂଘନ କରିଛନ୍ତି ବୋଲି କୁହାଯାଇଛି। ଲିଗ୍ର ଚଳିତ ସଂସ୍କରଣରେ ଫୋଲର ଏହାପୂର୍ବରୁ ଏକାଧିକବାର ରେଫରିଙ୍କ ନିଷ୍ପତ୍ତିରେ ଅସନ୍ତୋଷ ଜାହିର କରିଛନ୍ତି। ଲିଗ୍ରେ ଇଷ୍ଟବେଙ୍ଗଲ ୧୪ଟି ମ୍ୟାଚ୍ ଖେଳି ୨ ବିଜୟ, ୭ ଡ୍ର ଓ ୫ ପରାଜୟ ସହ ୧୩ ପଏଣ୍ଟ ପାଇ ତାଲିକାର ଦଶମ ସ୍ଥାନରେ ରହି ଓଡ଼ିଶା ଉପରେ ରହିଛି।
