ପୁରୀ ଅଫିସ,୮।୨: ଶ୍ରୀମନ୍ଦିର ରତ୍ନଭଣ୍ଡାର ଚାବି ହଜିବା ପ୍ରସଙ୍ଗରେ ଜଷ୍ଟିସ୍ ରଘୁବୀର ଦାଶ କମିଶନଙ୍କ ତଦନ୍ତକୁ ନେଇ କୌଣସି ସୂଚନା ଦେବାକୁ ଜିଲା ପ୍ରଶାସନ ମନା କରିଛି। ପ୍ରକାରାନ୍ତରେ ପ୍ରଶାସନ ଏଭଳି ଭାବେ ତଦନ୍ତ ତଥ୍ୟକୁ ଘଣ୍ଟ ଘୋଡ଼ାଉଛି। ଫଳରେ ଏହି ଘଟଣାର ପ୍ରକୃତ ତଥ୍ୟ ଲୋକଲୋଚନକୁ ଆସିବା ନେଇ ସନ୍ଦେହ ସୃଷ୍ଟି ହୋଇଛି।
ଚାବି ହଜିବା ପରେ ରାଜ୍ୟ ସରକାର ଏହି ଘଟଣାର ତଦନ୍ତ ପାଇଁ ଜଷ୍ଟିସ ରଘୁବୀର ଦାଶଙ୍କ ଅଧ୍ୟକ୍ଷତାରେ ଏକ କମିଶନ ଗଠନ କରିଥିଲେ। କମିଶନ ପୁରୀ ଆସି ଘଟଣାର ସବିଶେଷ ତଦନ୍ତ କରିବା ସହ ୨୦୧୮ ନଭେମ୍ବର ୨୮ରେ ୩୨୪ ପୃଷ୍ଠାର ଏକ ରିପୋର୍ଟ ରାଜ୍ୟ ଗୃହ ବିଭାଗକୁ ପ୍ରଦାନ କଲେ। ଏହି ଘଟଣାକୁ ୩ବର୍ଷ ପୂରି ସାରିଥିଲେ ମଧ୍ୟ ରିପୋର୍ଟ ବିଧାନସଭାରେ ଉପସ୍ଥାପିତ ନ ହେବା କାରଣରୁ ସାର୍ବଜନୀନ ହୋଇପାରୁନାହିଁ। ତେବେ ରିପୋର୍ଟ ପ୍ରସ୍ତୁତି ପୂର୍ବରୁ ପୁରୀରେ କମିଶନଙ୍କ ଯାଞ୍ଚ ପ୍ରକ୍ରିୟାରେ ଜିଲା ପ୍ରଶାସନ ଓ ଶ୍ରୀମନ୍ଦିର ପ୍ରଶାସନ ସହଯୋଗ କରିଥିଲେ। ସମ୍ପ୍ରତି ସୂଚନା ଅଧିକାର ଆଇନ ବଳରେ ଜିଲା ପ୍ରଶାସନକୁ ଏନେଇ ତଥ୍ୟ ମଗାଯାଇଥିବା ବେଳେ ଏନେଇ କୌଣସି ଉତ୍ତର ରଖାଯାଇନାହିଁ। ଜିଲା ପ୍ରଶାସନ କାହିଁକି ଏନେଇ ମୁହଁ ଖୋଲୁନାହିଁ ସେନେଇ ପ୍ରଶ୍ନ ଉଠାଇଛନ୍ତି ସୂଚନା ଅଧିକାର କର୍ମୀ ଦିଲୀପ କୁମାର ବରାଳ। ସେ କହିଛନ୍ତି, ତଦନ୍ତ କମିଶନଙ୍କୁ ପୁରୀ ଜିଲା ପ୍ରଶାସନ ତରଫରୁ ଯେଉଁ କାଗଜପତ୍ର, ଚିଠି, ରିପୋର୍ଟ ପ୍ରଦାନ କରାଯାଇଛି ତାହାର ନକଲ ଦେବାକୁ ଜିଲା ପ୍ରଶାସନ ନାରାଜ। ଗୋଟିଏ ପଟେ ୨୨ ଲକ୍ଷ ୭୭ ହଜାର ୯୧୮ ଟଙ୍କା ଖର୍ଚ୍ଚ ବିନିମୟରେ ପ୍ରସ୍ତୁତ ହୋଇଥିବା ରିପୋର୍ଟ ସାର୍ବଜନୀନ ହୋଇପାରୁ ନ ଥିବା ବେଳେ ଅନ୍ୟ ପଟେ ପୁରୀ ଜିଲା ପ୍ରଶାସନ ତଦନ୍ତରେ କେଉଁ କେଉଁ ିତଥ୍ୟ ଯୋଗାଇଛି ସେସମ୍ପର୍କରେ ସୂଚନା ଦେବାକୁ ମନା କରୁଛି। ଏଭଳି ସ୍ଥିତିରେ ସାଧାରଣ ଲୋକେ ଦ୍ୱନ୍ଦ୍ୱରେ ରହୁଛନ୍ତି। ରତ୍ନଭଣ୍ଡାର ପ୍ରସଙ୍ଗରେ ସତ୍ୟତା ଜାଣିବାର ଅଧିକାର ଜଗନ୍ନାଥପ୍ରେମୀଙ୍କର ରହିଛି। ସେ ଆହୁରି କହିଛନ୍ତି, ଜିଲା ରେକର୍ଡ ରୁମ୍ରୁ ନକଲି ଚାବି ମିଳିବା କଥା ତତ୍କାଳୀନ ଜିଲାପାଳ ଅରବିନ୍ଦ ଅଗ୍ରୱାଲ ଗଣମାଧ୍ୟମରେ ପ୍ରକାଶ କରିଥିଲେ। ମାତ୍ର ନକଲି ଚାବି ମିଳିଥିବା ନେଇ ଜିଲାପାଳଙ୍କ କାର୍ଯ୍ୟାଳୟରୁ କୌଣସି ଚିଠି ଶ୍ରୀଜଗନ୍ନାଥ ମନ୍ଦିର କାର୍ଯ୍ୟାଳୟକୁ ଲେଖାଯାଇନାହିଁ। ଅର୍ଥାତ୍ ତଦନ୍ତ କମିଶନଙ୍କୁ ମଧ୍ୟ ଏସମ୍ପର୍କରେ ଜଣାଯାଇ ନ ଥିବା ସନ୍ଦେହକୁ ଆସୁଛି। ଜିଲା ପ୍ରଶାସନ ସମସ୍ତ ଆବଶ୍ୟକ ତଥ୍ୟ ସମ୍ପର୍କରେ ତଦନ୍ତ କମିଶନଙ୍କୁ ଅବଗତ କରାଇଛି ନା କୌଣସି ପ୍ରକାର ଅନିୟମିତତା ହୋଇ ତାହା ଜାଣିବା ପାଇଁ ଜିଲା ପ୍ରଶାସନ ସ୍ପଷ୍ଟ ଭାବେ ସୂଚନା ଦେବା ଦରକାର। ଅନ୍ୟପକ୍ଷରେ ତଦନ୍ତ, ଯାଞ୍ଚ ଓ ରିପୋର୍ଟ ଦାଖଲ ନେଇ କୌଣସି ତଥ୍ୟ ଜିଲା ପ୍ରଶାସନ ପାଖରେ ନାହିଁ ବୋଲି ଜିଲା ସୂଚନା ଅଧିକାରୀ ଗୋପୀନାଥ ମିଶ୍ରଙ୍କଠାରୁ ମିଳିଥିବା ତଥ୍ୟରୁ ଜଣାପଡ଼ିଛି।
