ଯାଜପୁର ଅଫିସ, ୧୧ା୧: ଯାଜପୁର ଜିଲାରେ ମୃତ ବ୍ୟକ୍ତିଙ୍କ ନାମରେ ନକଲି ଟିପ ଚିହ୍ନ ଦେଇ ଭତ୍ତା ଉଠା ଯାଉଥିବାବେଳେ ପ୍ରକୃତ ହିତାଧିକାରୀ ଏହି ଯୋଜନାର ସୁଫଳ ପାଇବାରୁ ବଞ୍ଚି ହୋଇଛନ୍ତି। ଏପରି ଏକ ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି ରସଲପୁର ବ୍ଳକ ଅଧୀନ ମଙ୍ଗରାଜପୁର ପଞ୍ଚାୟତ ଖଣ୍ଡାସ ଗ୍ରାମରେ। ଏହି ଗ୍ରାମର ଦଳିତ ସାହିରେ ବାସକରୁଥିବା ଶ୍ରୀଧର ମଳିକଙ୍କ ପୁଅ ଭୋଳାନାଥ(୧୬)ଶତ ପ୍ରତିଶତ ଭିନ୍ନକ୍ଷମ। ହେଲେ ଏ ଯାଏଁ ଜିଲା ପ୍ରଶାସନଙ୍କ ଦୃଷ୍ଟି ତାଙ୍କ ଉପରେ ପଡିନାହିଁ। ସରକାରୀ ସହାୟତାରୁ ସେ ବଞ୍ଚିତ ହୋଇଛନ୍ତି। ଶ୍ରୀଧର ବହୁଦିନ ହେବ ଚାଳ ଛପର ଘରେ ଜରିପାଲ ପକାଇ ଅତି ଦୟନୀୟ ଅବସ୍ଥାରେ ରହି ଆସୁଛନ୍ତି। ବାପା ଶ୍ରୀଧର ଦିନ ମଜୁରିଆ ଭାବେ କାମ କରନ୍ତି। ସେଥିରୁ ଯେଉଁ ଅର୍ଥ ଉର୍ପାଜନ କରନ୍ତି ସେଥିରେ ପରିବାର ଚଳାଇବା କଷ୍ଟସାଧ୍ୟ ହୋଇପଡ଼ୁଛି। ଭୋଲାନାଥ ଜନ୍ମରୁ ଦୁଇ ଆଖି ହରାଇ ଭିନ୍ନକ୍ଷମ ଜୀବନ ବିତାଉଛନ୍ତି। ଭିନ୍ନକ୍ଷମ ଯୋଜନାରେ ଏ ଯାଏଁ ତାଙ୍କୁ ଭତ୍ତା ମିଳିପାରି ନାହିଁ। ବରଂ ବିଞ୍ଝାରପୁର ବ୍ଲକରେ ୨୦ ଜଣ ମୃତ ବ୍ୟକ୍ତିଙ୍କ ନାମରେ ବିଭିନ୍ନ ଯୋଜନାରେ ନକଲି ଟିପ ଚିହ୍ନ ଦେଇ ଭତ୍ତା ଉଠାଯାଉଥିବା ଅଭିଯୋଗ ହୋଇ ସାରିଛି। ଏହି ବ୍ଳକର ସୟଦପୁର ପଞ୍ଚାୟତରେ ମଧୁବାବୁ ପେନସନ ଯୋଜନା, ବିଧବାଭତ୍ତା ଓ ଭିନ୍ନକ୍ଷମ ଭତ୍ତାର ଆକ୍ୟୁଟାନ୍ସ (ପ୍ରାପ୍ତି ପତ୍ର) ରେଜିଷ୍ଟାରରୁ ଏଭଳି ଦୁର୍ନୀତି ହୋଇଥିବା ସଂକ୍ରାନ୍ତରେ ଗତ ୨୪ ତାରିଖରେ ଧରିତ୍ରୀରେ ତଥ୍ୟଭିତ୍ତିକ ଖବର ପ୍ରକାଶ ପାଇଥିଲା। କିନ୍ତୁ ଏଯାଏ ଯାଜପୁର ଜିଲା ପ୍ରଶାସନ ପକ୍ଷରୁ ଉପଯୁକ୍ତ ତଦନ୍ତ କରାଯାଇ ଏଥିରେ ସମ୍ପୃକ୍ତ ଦୋଷୀଙ୍କ ବିରୋଧରେ ଆଖିଦୃଶିଆ କାର୍ଯ୍ୟାନୁଷ୍ଠାନ ଗ୍ରହଣ ହୋଇ ପାରିନାହିଁ।
ଅନ୍ୟପକ୍ଷେ ପିଲାଟି ଦିନରୁ ଭୋଳାନାଥଙ୍କ ବାଦ୍ୟ ଯନ୍ତ୍ର ଉପରେ ଆଗ୍ରହ ଥିବା ହେତୁ ସେ ଭୁବନେଶ୍ୱରସ୍ଥିତ ଲୁଇସ୍ ବ୍ରେଲି ସ୍କୁଲରେ ପ୍ରାୟ ୩ ବର୍ଷ ହେବ ନାମ ଲେଖାଇ ତବଲା ବାଦ୍ୟଯନ୍ତ୍ର ଉପରେ ଶିକ୍ଷା ଗ୍ରହଣ କରୁଥିବା ସେ କହିଛନ୍ତି। ଥିଲାବାଲାଙ୍କୁ ସରକାରୀ ସହାୟତା ମିଳୁଥିବା ବେଳେ ଗରିବ ଲୋକଙ୍କୁ ମିଳୁନାହିଁ ବୋଲି ଅଞ୍ଚଳବାସୀ ପ୍ରକାଶ କରିଛନ୍ତି । ଘର ଖଣ୍ଡେ ପାଇବା ପାଇଁ ପଞ୍ଚାୟତ କାର୍ଯ୍ୟାଳୟଠାରୁ ଆରମ୍ଭ କରି ଜିଲା କାର୍ଯ୍ୟାଳୟ ପର୍ଯ୍ୟନ୍ତ ଦୌଡି କେବଳ ମିଥ୍ୟା ପ୍ରତିଶ୍ରୁତିରେ ସେ ନୟାନ୍ତ ହୋଇ ଫେରୁଥିବା ପରିବାର ବର୍ଗ କହିଛନ୍ତି। ଏହି ଅସହାୟ ଭିନ୍ନକ୍ଷମ ପରିବାର ବର୍ଗଙ୍କୁ ସହାୟତା ଯୋଗାଇ ଦେବା ପାଇଁ ସ୍ଥାନୀୟ ଗ୍ରାମବାସୀ ଦାବି କରିଛନ୍ତି।
