ୱାପାକୋନେଟା, ଓହିୟୋ, ୬ା୮ (ଏ.ପି.): ଚନ୍ଦ୍ରପୃଷ୍ଠରେ ପ୍ରଥମ ମାନବ ଭାବେ ପାଦ ଥାପି ଇତିହାସ ରଚିଥିବା ନୀଲ୍ ଆର୍ମଷ୍ଟ୍ରଙ୍ଗ୍ଙ୍କ ପିଲାଦିନର ସ୍ବପ୍ନ ଓ ଉଡ଼ାଣର ମୂଳଦୁଆ ପଡ଼ିଥିବା ଆମେରିକାର ଓହିୟୋସ୍ଥିତ ଦୁଇମହଲା ବାସଭବନଟି ଏବେ ବିକ୍ରି ହେବାକୁ ଯାଉଛି। ଗତ ପ୍ରାୟ ୪୦ ବର୍ଷ ଧରି ଏହି ଐତିହାସିକ ଘରଟିକୁ ଜଣେ ଅବସରପ୍ରାପ୍ତ ଇତିହାସ ଶିକ୍ଷୟିତ୍ରୀ ନିଜ ଅଧୀନରେ ରଖି ଏହାର ମୂଳ ସୌନ୍ଦର୍ଯ୍ୟ ଓ ସ୍ମୃତିକୁ ସଂରକ୍ଷିତ କରି ରଖିଥିଲେ।
ଓହିୟୋର ୱାପାକୋନେଟାସ୍ଥିତ ‘୬୦୧ ଡବ୍ଲ୍ୟୁ. ବେଣ୍ଟନ୍ ଷ୍ଟ୍ରିଟ୍’ର ଏହି ଘରଟି ଆର୍ମଷ୍ଟ୍ରଙ୍ଗ୍ଙ୍କ ଜୀବନର ଅତ୍ୟନ୍ତ ଗୁରୁତ୍ୱପୂର୍ଣ୍ଣ ସ୍ଥାନ ଥିଲା। ୧୯୪୪ରେ ଆର୍ମଷ୍ଟ୍ରଙ୍ଗ୍ଙ୍କ ପରିବାର ଏହି ଘରକୁ କିଣିଥିଲେ। ଏହି ଘରର ଡାଇନିଂ ରୁମ୍ରେ ବସି ନୀଲ୍ କାଠ ଓ ଗୋନ୍ଦ ସାହାଯ୍ୟରେ ବିମାନ ମଡେଲ ତିଆରି କରୁଥିଲେ ଏବଂ ନିଜ ଶୋଇବା ଘରର ପଛ ଝରକା ଦେଇ ସେଗୁଡ଼ିକୁ ଉଡ଼ାଉଥିଲେ। ମାତ୍ର ୧୬ ବର୍ଷ ବୟସରେ ସେ ପ୍ରଥମ କରି ଏକାକୀ ବିମାନ ଉଡ଼ାଇ ପାଇଲଟ ଲାଇସେନ୍ସ ପାଇଥିଲେ।
୧୯୮୮ ମସିହାରେ କାରେନ ମାଇକ୍ସେଲ ନାମ୍ନୀ ଜଣେ ଶିକ୍ଷୟିତ୍ରୀ ଏହି ଘରଟିକୁ କିଣିଥିଲେ। ଏହା ଆର୍ମଷ୍ଟ୍ରଙ୍ଗଙ୍କ ଘର ବୋଲି ଜାଣିବା ପରେ ସେ ଏହାର ପୁରାତନ ଶୈଳୀକୁ ଅକ୍ଷୁଣ୍ଣ ରଖିବାକୁ ନିଷ୍ପତ୍ତି ନେଇଥିଲେ। ଗତ କିଛି ଦଶନ୍ଧି ମଧ୍ୟରେ ଏହି ଘରକୁ ୯ ଜଣ ମହାକାଶଚାରୀ ପରିଦର୍ଶନରେ ଆସିଛନ୍ତି। ୧୯୬୯ ମସିହାର ଆପୋଲୋ-୧୧ ମିଶନ୍ରେ ଆର୍ମଷ୍ଟ୍ରଙ୍ଗ୍ଙ୍କ ସହଯାତ୍ରୀ ଥିବା ବଜ୍ ଆଲ୍ଡ୍ରିିନ୍ ୨୦୧୨ରେ ଆର୍ମଷ୍ଟ୍ରଙ୍ଗ୍ଙ୍କ ଦେହାନ୍ତ ପରେ ଏହି ଘରର ଉପର ମହଲା ଶୋଇବା ଘରକୁ ଆସି ଭାବବିହ୍ବଳ ହୋଇପଡ଼ିଥିଲେ। ଏହି ଘରେ ରହିବା ସମୟରେ ମାଇକ୍ସେଲ୍ଙ୍କୁ ଉପହାର ସ୍ବରୂପ ଚନ୍ଦ୍ରର ଏକ ପଥରଖଣ୍ଡ ଏବଂ ଆପୋଲୋ-୧୧ କ୍ୟାପସୁଲ୍ର ସୁନା ଫଏଲ୍ର ଏକ ଅଂଶ ମଧ୍ୟ ମିଳିଛି।
ବର୍ତ୍ତମାନ ୮୨ ବର୍ଷୀୟା ମାଇକ୍ସେଲ୍ ଏହି ଐତିହାସିକ ଘରର ମୂଲ୍ୟ ୪,୩୦,୦୦୦ ଆମେରିକୀୟ ଡଲାର ରଖିଛନ୍ତି। ବୟସ ଅଧିକ ହେବା କାରଣରୁ ସେ ଏହି ଘରକୁ ବିକ୍ରି କରିବାକୁ ଚାହୁଁଛନ୍ତି। ସେ ଅନୁଭବ କରୁଛନ୍ତି ଯେ ଏହି ଐତିହାସିକ ସମ୍ପତ୍ତିର ଯତ୍ନ ନେବା ଦାୟିତ୍ୱ ଏବେ ଅନ୍ୟ କାହାକୁ ଦେବା ପାଇଁ ସମୟ ଆସିଯାଇଛି। ସ୍ଥାନୀୟ ‘ଆର୍ମଷ୍ଟ୍ରଙ୍ଗ୍ ଏୟାର ଆଣ୍ଡ୍ ସ୍ପେସ୍ ମ୍ୟୁଜିୟମ’ ନିକଟରେ ଏହାକୁ କିଣିବା ପାଇଁ ପର୍ଯ୍ୟାପ୍ତ ପାଣ୍ଠି ନ ଥିବାରୁ, କୌଣସି କ୍ରେତା ଏହାକୁ କିଣି ମ୍ୟୁଜିୟମକୁ ଦାନ କରନ୍ତୁ କିମ୍ବା ଏହାର ଐତିହାସିକ ମହତ୍ତ୍ୱକୁ ବଜାୟ ରଖନ୍ତୁ ବୋଲି ସେ ଆଶା ପ୍ରକଟ କରିଛନ୍ତି।
