କଥାରେ ଅଛି ପ୍ରେମ ସ୍ଥାନ, କାଳ ପାତ୍ର କିଛି ମାନେନା। ପ୍ରେମ ଦେଖେନା ବୟସ କି ଜାତି ନୀତି। ଠିକ୍ ଏମିତି ଏକ ଘଟଣା ଘଟିଛି ଜର୍ମାନୀର ଜଣେ ମନୋବିଜ୍ଞାନ ଛାତ୍ରୀଙ୍କ କ୍ଷେତ୍ରରେ। ଛାତ୍ରୀ ଜଣଙ୍କ ୟୁଟ୍ୟୁବ୍ରେ ପ୍ରଫେସରଙ୍କ ଭିଡିଓ ଦେଖି ପ୍ରେମରେ ପଡ଼ିଯାଇଛନ୍ତି। ପ୍ରଫେସରଙ୍କୁ ୫୪ ବର୍ଷ ହୋଇଥିବା ବେଳେ ଛାତ୍ରୀଙ୍କୁ ବର୍ତ୍ତମାନ୨୭ ବର୍ଷ।
ଜେନା ନାମକ ଏହି ଛାତ୍ରୀ ଜଣକ କେବେ ଭାବି ନ ଥିଲେ ଯେ ୟୁଟ୍ୟୁବ୍ ସାହାଯ୍ୟରେ ତାଙ୍କ ପ୍ରେମସମ୍ପର୍କ ଆରମ୍ଭ ହେବ। ଯେତେବେଳେ ତାଙ୍କୁ ୧୮ ବର୍ଷ ହୋଇଥିଲା, ସେ ମନୋବିଜ୍ଞାନ ପ୍ରଫେସର ପିଟର ହେନ୍ରିଚଙ୍କ ଏକ ଭିଡିଓ ଦେଖିଥିଲେ। ଏହା ପରେ ଦୁହେଁ ଇମେଲ ମାଧ୍ୟମରେ ଚାଟିଂ ଆରମ୍ଭ କରିଥିଲେ। ପ୍ରାୟ ତିନିମାସ ପରେ ଉଭୟଙ୍କର ଦେଖାସାକ୍ଷାତ ହୋଇଥିଲା। ସେମାନେ ଡିସେମ୍ବର ୨୦୧୭ରେ ପ୍ରଥମ ଥର ପାଇଁ ଭେଟିଥିଲେ। ପ୍ରଥମ ଦେଖାରେ ପ୍ରେମରେ ପଡ଼ିଯାଇଥିଲେ।
ଜେନା କୁହନ୍ତି, ମୁଁ ବିଶ୍ୱବିଦ୍ୟାଳୟରେ ଦର୍ଶନ କିମ୍ବା ସାଇକୋଲୋଜି ଅଧ୍ୟୟନ କରିବାକୁ ଚାହୁଁଥିଲି। କାରଣ ମୁଁ ଏହି ଦୁଇଟି ବିଷୟ ପ୍ରତି ବହୁତ ଆଗ୍ରହୀ ଥିଲି। ଏହି କାରଣରୁ, ମୁଁ ମୋର ଖାଲି ସମୟରେ ଏହି ବିଷୟଗୁଡ଼ିକ ସହିତ ଜଡ଼ିତ ୟୁଟ୍ୟୁବ୍ରୁ ଭିଡିଓ ଦେଖୁଥାଏ। କିଛି ବର୍ଷ ତଳେ ମୁଁ ଏପରି ଏକ ଭିଡିଓ ଦେଖିଥିଲି ଏବଂ ଏହି ଭିଡିଓରେ ପ୍ରଫେସରଙ୍କ କଥା ମତେ ବହୁତ ପ୍ରଭାବିତ କରିଥିଲା। ମୁଁ ତାଙ୍କ ସ୍ବର ଏବଂ ଶୈଳୀକୁ ପସନ୍ଦ କରି ତାଙ୍କୁ ଇମେଲ କରିଥିଲି।
ତେବେ ଏହି ସମ୍ପର୍କକୁ ନେଇ ଜେନା ଏବଂ ପିଟର ଅନେକ ସମସ୍ୟାର ସମ୍ମୁଖୀନ ହେଉଛନ୍ତି। କାରଣ ଏହି ସମ୍ପର୍କ ହେତୁ ଜେନାଙ୍କ ମାତାପିତା ସେମାନଙ୍କ ଉପରେ ଅସନ୍ତୁଷ୍ଟ ଅଛନ୍ତି। ଏଥିସହିତ, ପିଟରଙ୍କ ମାତାପିତା ଜେନାଙ୍କ ବିଷୟରେ ଭଲ ଭାବେ ଜାଣି ନାହାନ୍ତି। ଏହି ପରିପ୍ରେକ୍ଷୀରେ, ଜେନା କହିଛନ୍ତି ଯେ, ବୟସର ବ୍ୟବଧାନ ହେତୁ ସେ ଅନେକ ନକାରାତ୍ମକତାର ଶିକାର ହେବାକୁ ପଡୁଛି।
ଜେନା ଏବଂ ପିଟର ବର୍ତ୍ତମାନ ପରସ୍ପରଠାରୁ ବହୁତ ଦୂରରେ ରହୁଛନ୍ତି। ଜେନା କହିଛନ୍ତି, ଯେତେ ଦୂରରେ ଥିଲେ ବି ପିଟରଙ୍କ ସହ ସେ ଯୋଗାଯୋଗରେ ଅଛନ୍ତି। ଜେନା ଏହା ମଧ୍ୟ କହିଛନ୍ତି ଯେ, ପିଟରଙ୍କ ସହ ତାଙ୍କର ବୁଝାମଣା ବହୁତ ଭଲ। ଏହି କାରଣରୁ ସେ ସମାଜକୁ ଖାତିର ନ କରି ତାଙ୍କ ହୃଦୟ ଜିଣିବାକୁ ଚାହୁଁଛନ୍ତି।
