ନୂଆଦିଲ୍ଲୀ,୧୪।୧: କ୍ରିକେଟ ଇତିହାସରେ ଏଭଳି ଅନେକ ଘଟଣା ଘଟିଛି, ଯେଉଁଠି ମ୍ୟାଚ୍ ଶେଷରେ କର ବା ମର ସ୍ଥିତି ଉପୁଜିଛି। ହେଲେ ବ୍ୟାଟ୍ସମ୍ୟାନ୍ମାନେ ଶେଷ ବଲ୍ରେ ଚଉକା ନଚେତ ଛକା ମାରି ମ୍ୟାଚ୍କୁ ଜିତିନେଇଛନ୍ତି। ଏଭଳି ଏକ ଘଟଣାକ୍ରମରେ ଏକ ମ୍ୟାଚ୍ରେ ଶେଷ ବଲ୍ରେ ୧୨ ରନ୍ର ଆବଶ୍ୟକତା ରହିଥିଲା। ପଡ଼ିଆରେ ଥିବା ବ୍ୟାଟ୍ସମ୍ୟାନ୍ ଏହି ଅସମ୍ଭବକୁ ସମ୍ଭବ କରି ଦେଖାଇଥିଲେ। ଆଶ୍ଚର୍ଯ୍ୟ ଲାଗିଲେ ବି ଏହା ସତ।
୧୪ ବର୍ଷ ପୂର୍ବେ ନ୍ୟୁଜିଲାଣ୍ଡର ଘରୋଇ ଟି୨୦ ଟୁର୍ନାମେଣ୍ଟରେ ଏଭଳି ମୁକାବିଲା ଦେଖିବାକୁ ମିଳିଥିଲା। ଏଥିରେ ନର୍ଦନ ଡିଷ୍ଟ୍ରିକ୍ଟସ୍ ଏବଂ ଅକ୍ଲାଣ୍ଡର ଟିମ୍ଙ୍କ ମଧ୍ୟରେ ଖେଳ ଚାଲୁଥିଲା। ମ୍ୟାଚ୍ରେ ଅନେକ ଷ୍ଟାର ଅନ୍ତରାଷ୍ଟ୍ରୀୟ କ୍ରିକେଟର ଖେଳୁଥିଲେ। ସେଥିରୁ ଜଣେ ଥିଲେ ଆନ୍ଦ୍ରେ ଆଡମ୍ସ। ନର୍ଦନ ଡିଷ୍ଟ୍ରିକ୍ଟସ୍ ଟିମ୍ ଟସ୍ ଜିତି ୧୬୦ ରନ୍ କରିଥିଲେ। ଅକ୍ଲାଣ୍ଡକୁ ଜିତିବା ପାଇଁ ୧୬୧ ରନ୍ର ଆବଶ୍ୟକତା ରହିଥିଲା। ଜବାବରେ ଅକଲ୍ୟାଣ୍ଡ ଟିମ୍ ୯୭ରନ୍ରେ ୫ ଉଇକେଟ ହରାଇଥିଲା। ତାଙ୍କୁ ୩୪ ବଲ୍ରେ ୬୪ ରନ୍ ଆବଶ୍ୟକତା ରହିଥିଲା। ରୋବ ନିକୋଲ ଏବଂ କିଲି ଟୋଡ୍ଙ୍କ ଯୋଡ଼ି ଶେଷ ଓଭର ପର୍ଯ୍ୟନ୍ତ ଖେଳକୁ ନେଇଥିଲେ। ହେଲେ ଶେଷ ଓଭରର ଦ୍ୱିତୀୟ ବଲ୍ରେ କିଲି ଟୋଡ୍ ଆଉଟ୍ ହୋଇଯାଇଥିଲେ। ସେତେବେଳେ ୧୪୭/୬ ସ୍କୋର ରହିଥିଲା। ପରେ ଟିମ୍କୁ ୪ ବଲ୍ରେ ୧୪ ରନ୍ ଏବଂ ଶେଷରେ ଗୋଟିଏ ବଲ୍ରେ ୧୨ ରନ୍ କରିବା ଆବଶ୍ୟକତା ଥିଲା।
ଟିମ୍ର ଷ୍ଟାର ବୋଲର୍ ଗ୍ରେମ୍ ଏଲଡ୍ରିଜ୍ ଶେଷ ବଲ୍ ପକାଇବା ବେଳକୁ ତାହା ଏକ ନୋ-ବଲ୍ ହୋଇଥିଲା। ଏଥିରେ ଚଉକା ମାରିଥିଲେ ଆଡମ୍ସ। ନ୍ୟୁଜିଲାଣ୍ଡ ଘରୋଇ କ୍ରିକେଟରେ ନୋ ବଲ୍ରେ ୨ ରନ୍ ମିଳୁଥିବାରୁ ମୋଟ ୬ ରନ୍ ମିଳିଥିଲା। ପରେ ଗୋଟିଏ ବଲ୍ରେ ୬ ରନ୍ କରିବାକୁ ରହିଥିଲା। ଛକାର ଆବଶ୍ୟକତା ଥିବା ବେଳେ ଆଡମ୍ସ ତାହା କରିଦେଖାଇଥିଲେ। ଏହିଭଳି ଭାବେ ସେ ଗୋଟିଏ ବଲ୍ରେ ୧୨ ରନ୍ ହାସଲ କରିଥିଲେ।
