ଭୁବନେଶ୍ୱର,୨୩ା୬(ସୁଚିସ୍ମିତା ସାହୁ): ପ୍ରଥମରୁ ଅଷ୍ଟମଶ୍ରେଣୀ ପର୍ଯ୍ୟନ୍ତ ତ୍ରୁଟିପୂର୍ଣ୍ଣ ପୁସ୍ତକଗୁଡ଼ିକୁ କିପରି ତ୍ରୁଟିଶୂନ୍ୟ କରାଯାଇ ପିଲାଙ୍କ ପାଖରେ ପହଞ୍ଚାଯିବ ସେନେଇ ବିକଳ୍ପ ସମ୍ପର୍କରେ ସୋମବାର ଲୋକସେବା ଭବନରେ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ ଏକ ଉଚ୍ଚସ୍ତରୀୟ ବୈଠକ କରିଥିବା ସୂଚନା ମିଳିଛି। ବୈଠକରେ ବିଭାଗୀୟ ସଚିବ ଏନ୍. ଥିରୁମାଳା ନାଏକ, ଓସେପା ରାଜ୍ୟ ପ୍ରକଳ୍ପ ନିର୍ଦ୍ଦେଶିକା ଅନନ୍ୟା ଦାସ ଏବଂ ଏସ୍ସିଇଆର୍ଟି ନିର୍ଦ୍ଦେଶିକା ମଧୁସ୍ମିତା ସାହୁଙ୍କ ସମେତ ଅନ୍ୟ ଅଧିକାରୀ ଉପସ୍ଥିତ ଥିଲେ। ସମ୍ପାଦନା ମଣ୍ଡଳୀ ଦ୍ୱାରା ତ୍ରୁଟିପୂର୍ଣ୍ଣ ପୁସ୍ତକକୁ ସଂଶୋଧନ କରାଯାଉଛି। ସଂଶୋଧିତ ବହିର କିଛି କପି ଛପାଇବାକୁ ଯୋଜନା ଚାଲିଥିବାବେଳେ ସେହି ପୁସ୍ତକରେ ଡିଜିଟାଲ୍ ବାର୍କୋଡ୍ ରଖିବାକୁ ନିଷ୍ପତ୍ତି ନିଆଯାଇଛି। ସେହି ବାର୍କୋଡ୍କୁ ସ୍କାନ୍ କରିବା ପରେ ସଂଶୋଧିତ ପୁସ୍ତକର ସଫ୍ଟ କପି ମିଳିବ, ଯାହାକୁ ପ୍ରିଣ୍ଟ କରି ଶିକ୍ଷୟିତ୍ରୀଶିକ୍ଷକ ପିଲାଙ୍କୁ ପଢ଼ାଇପାରିବେ। ଏହି ବହିକୁ ଛାତ୍ରୀଛାତ୍ର ଓ ଅଭିଭାବକ ମଧ୍ୟ ଡାଉନଲୋଡ୍ କରିପାରିବେ। ଅପରପକ୍ଷରେ ରାଜ୍ୟର ବହୁ ଅଞ୍ଚଳରେ ଏବେଯାଏ ମଧ୍ୟ ଠିକ୍ ଭାବେ ଇଣ୍ଟରନେଟ ସୁବିଧା ନାହିଁ। ସବୁ ପିଲାଙ୍କ ନିକଟରେ ସ୍ମାର୍ଟଫୋନ ନ ଥିବାରୁ ସେମାନେ କିଭଳି ଏହି ବହି ଡାଉନ୍ଲୋଡ କରିବେ ବୋଲି ଶିକ୍ଷାବିତ୍ମାନେ ପ୍ରଶ୍ନ ଉଠାଇଛନ୍ତି।
