ଭୁବନେଶ୍ୱର,୨୫ା୧୧(ବ୍ୟୁରୋ):ଚଳିତ ଅଧିବେଶନରେ କୋଭିଡ୍ କଟକଣା ହଟିଯାଇଛି। ୨ବର୍ଷ ପରେ ପୂର୍ବଭଳି ସଦସ୍ୟମାନେ ନିଜ ସିଟ୍କୁ ଫେରିଛନ୍ତି । ଗୁରୁବାର ବିଧାନସଭା ଆରମ୍ଭ ହୋଇଥିଲା। ତେବେ ସଦସ୍ୟମାନଙ୍କ ସଂଖ୍ୟା କମ୍ ରହିଥିଲା। ପଦ୍ମପୁର ଉପନିର୍ବାଚନ ଚାଲିଥିବାରୁ ବିରୋଧୀ ଓ ଶାସକ ଦଳର ବହୁ ସଦସ୍ୟ ଗୃହରେ ଅନୁପସ୍ଥିତ ଥିଲେ। ନବନିର୍ବାଚତ ଭାଜପା ବିଧାୟକ ସୂର୍ଯ୍ୟବଂଶୀ ସୂରଜ ପ୍ରଥମ ଥର ଲାଗି ବିଧାନସଭାକୁ ଆସିଛନ୍ତି । ସେ ନିଜ ବାପାଙ୍କ ସିଟ୍ରେ ବସିବା ପରେ ଭାବବିହ୍ବଳ ହୋଇ ପଡ଼ିଥିଲେ। ଅନ୍ୟପକ୍ଷରେ ଶୋକ ପ୍ରସ୍ତାବ ଆଲୋଚନା ପରେ ବାଚସ୍ପତି ବିକ୍ରମ କେଶରୀ ଆରୁଖ ଘୋଷଣା କରିଥିଲେ ଯେ ଯେଉଁ ସଦସ୍ୟମାନେ ଲିଖିତ ଆକାରରେ ଦେବେ ସେମାନଙ୍କୁ ଭର୍ଚୁଆଲରେ ବିଧାନସଭା କାର୍ଯ୍ୟକ୍ରମରେ ଯୋଗ ଦେବାର ସୁଯୋଗ ମିଳିବ। ଏହି ପରିପ୍ରେକ୍ଷୀରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ବିଜେଡି ସଭ୍ୟ ପ୍ରଫୁଲ୍ଲ ସାମଲ ଓ ପ୍ରଫୁଲ୍ଲ ମଲ୍ଲିକ ଭର୍ଚୁଆଲରେ ଯୋଗଦେବାକୁ ବାଚସ୍ପତିଙ୍କ ନିକଟରେ ଲିଖିତ ଭାବେ ଜଣାଇଛନ୍ତି । ତେବେ ପ୍ରଥମ ଦିନରେ ମୁଖ୍ୟମନ୍ତ୍ରୀ ବିଧାନସଭାକୁ ଆସି ଶୋକ ପ୍ରସ୍ତାବ ଆଗତ କରିଥିଲେ।
