ଭବାନୀପାଟଣା,୭।୧୦(ଉତ୍ତମ କୁମାର ଦାଶ)-କଲେଜ ନିର୍ବାଚନ ତାରିଖ ନିକଟତର ହେଉଥିବା ବେଳେ କଳାହାଣ୍ଡି ଜିଲାରେ କ୍ୟାମ୍ପସ ରାଜନୀତି ସରଗରମ ହେବାରେ ଲାଗିଛି। ବୁଧବାର ଅପରାହ୍ନରେ ଭବାନୀପାଟଣା କଲେଜ ଛକ ନିକଟରେ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ (ଏବିଭିପି)ର ବ୍ୟାନର-ପୋଷ୍ଟର ଚିରାଯିବାକୁ ନେଇ ପ୍ରବଳ ଉତ୍ତେଜନା ପ୍ରକାଶ ପାଇଛି।
ଅଭିଯୋଗ ଅନୁଯାୟୀ, ଚିରାଯାଇଥିବା ବ୍ୟାନରରେ କୌଣସି ପ୍ରାର୍ଥୀଙ୍କ ଫଟୋ ନଥିଲା; କେବଳ ସ୍ୱାମୀ ବିବେକାନନ୍ଦ, ମା’ ସରସ୍ୱତୀଙ୍କ ଫଟୋ ସହ “ଏବିଭିପିରେ ଯୋଗଦିଅନ୍ତୁ” ବୋଲି ଲେଖାଯାଇଥିଲା। ତେବେ ଉଦ୍ଦେଶ୍ୟମୂଳକ ଭାବେ ୭ ନମ୍ବର ୱାର୍ଡର ବିଜେଡି କାଉନସିଲର ଶିବା ସାହୁଙ୍କ ଇଙ୍ଗିତରେ ପୌରପାଳିକାର କିଛି କର୍ମଚାରୀ ଏହାକୁ ଚିରି ଦେଇଥିବା ଏବିଭିପି ଛାତ୍ରଛାତ୍ରୀ ଅଭିଯୋଗ ଆଣିଛନ୍ତି। ଏହି ଘଟଣାର ଭିଡିଓ ମଧ୍ୟ ସୋସିଆଲ ମିଡିଆରେ ଭାଇରାଲ ହୋଇଛି।
ଏହାର ପ୍ରତିବାଦରେ ଏବିଭିପିର ଶତାଧିକ ଛାତ୍ରଛାତ୍ରୀ ଜାତୀୟ ରାଜପଥ-୨୬ ଅବରୋଧ କରି ଧାରଣା ଦେବା ସହ ବିକ୍ଷୋଭ ପ୍ରଦର୍ଶନ କରିଛନ୍ତି। ଘଟଣାକୁ ନେଇ ଏବିଭିପି ନେତା ହିତେଶ କୁମାର ସାହୁ, ନିତେଶ ଜାନୀ, ଆରୀୟା ନାଏକ, ଛନ୍ଦା ଚରଣ ବେହେରା, ଦେବାଶିଷ ପଟ୍ଟନାୟକ ଓ ସମିପ ରାଉତ ପ୍ରମୁଖ ଟାଉନ ଥାନାରେ ଲିଖିତ ଅଭିଯୋଗ କରିବା ସହ ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଦାବି କରିଛନ୍ତି।
ଅନ୍ୟପଟେ, ଭବାନୀପାଟଣା ପୌରପାଳିକା ନିର୍ବାହୀ ଅଧିକାରୀ ପ୍ରମୋଦ କୁମାର ପାଢ଼ୀଙ୍କୁ ପଚାରିବାରୁ ସେ ଘଟଣାଟି ସତ୍ୟ ବୋଲି ସ୍ୱୀକାର କରିଛନ୍ତି। କାଉନସିଲର ଜଣକ ତାଙ୍କ ଅଜାଣତରେ ୩ ଜଣ ପୌର କର୍ମଚାରୀଙ୍କୁ ନେଇ ଏପରି କାର୍ଯ୍ୟ କରିଥିବା ସେ ପ୍ରକାଶ କରିଛନ୍ତି। ଆସନ୍ତା ୧୫ ତାରିଖରେ କଲେଜ ନିର୍ବାଚନ ହେବାକୁ ଥିବା ବେଳେ ଏବେଠୁ ଏପରି ସ୍ଥିତି ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।
