ଭୁବନେଶ୍ୱର,୨୫।୧୧(ବ୍ୟୁରୋ): ରାସ୍ତାରେ ରାଜେଶ କୁମାର ନାୟକ ନାମକ ଜଣେ ଛାତ୍ରଙ୍କୁ ଆଣ୍ଠେଇ ମାଡ ମାରିବା ଘଟଣାର ଭିଡିଓ ଭାଇରାଲ ହେବା ପରେ ଚନ୍ଦ୍ରଶେଖରପୁର ଥାନା ପୋଲିସ ସଂପୃକ୍ତ ୫ଜଣ ଛାତ୍ରଙ୍କୁ ଗିରଫ କରିଛି। ସେମାନେ ହେଲେ କଟକ ଜିଲା ଆଠଗଡ ଥାନା ଅଞ୍ଚଳର ବିଠଲ ଓରଫ ପି.ବି. ଅୟସକାନ୍ତ (୨୩), ବୁବୁ ଓରଫ ପ୍ରିୟବ୍ରତ ଗୋଚ୍ଛି (୨୦), ବିଷ୍ଣୁ ପ୍ରସାଦ ସେଠୀ, ବଡମ୍ବା ନରସିଂହପୁର ଥାନା ଅଞ୍ଚଳର ଦେବଦତ୍ତ ଜେନା (୧୯) ଓ ଯାଜପୁର ଜିଲାର ଆଦିତ୍ୟ ଦାସ (୧୮)। ଅଭିଯୁକ୍ତମାନେ ଭୁବନେଶ୍ୱରର ଦୁଇ କଲେଜର ଛାତ୍ର ହୋଇଥିବାେବେଳ ତ୍ରିକୋଣୀୟ ପ୍ରେମକୁ ନେଇ ଏହି ଘଟଣା ଘଟିଥିବା ଜଣାପଡିଛି। ଏନେଇ ପୋଲିସ ମାମଲା (ନଂ.୪୫୬/୨୨) ରୁଜୁ କରି ଗୁରୁବାର ଅଭିଯୁକ୍ତଙ୍କୁ କୋର୍ଟ ଚାଲାଣ କରିଛି।
ପୋଲିସ ସୂଚନାନୁସାରେ, ରାଜେଶ ଓ ବିଠଲ ହେଉଛନ୍ତି ସାଙ୍ଗ। ରାଜେଶ ତାଙ୍କ ରୁମ୍କୁ ଯିବା ଆସିବା ଭିତରେ ବିଠଲଙ୍କ ମୋବାଇଲରୁ ତାଙ୍କ ପ୍ରେମିକାର ଫୋନ୍ ନମ୍ବର ନେଇଯାଇଥିଲେ। ପରବର୍ତ୍ତୀ ସମୟରେ ଫୋନ୍ରେ କଥାହେବା ଭିତରେ ମନ ମନେ ଭଲ ପାଇ ବସିଥିଲେ। ବାରମ୍ବାର ପ୍ରେମ ମେସେଜ୍ ପଠାଉଥିଲେ। ଏହା ଶୁଣିବା ପରେ ବିଠଲ ଉତ୍କ୍ଷିପ୍ତ ହୋଇଯାଇଥିଲେ। ପ୍ରେମିକଙ୍କୁ ଡାକି ପଚରାଉଚରା କରିବା ସହ ତାଙ୍କ ମୋବାଇଲ ଫୋନ୍କୁ ଯାଞ୍ଚ କରିଥିଲେ। ସେମାନେ ବାରମ୍ବାର କଥା ହୋଇଥିବା ଓ ମେସେଜ ଦିଆନିଆ ହୋଇଥିବା ଜଣାପଡିଥିଲା। ରାଜେଶ ତାଙ୍କ ପ୍ରେମିକାଙ୍କୁ ଫଶାଇ ଦେଇଥିବା ଜଣାପଡିବା ପରେ ବିଠଲ ତାଙ୍କୁ ପାନେ ଦେବାକୁ ସ୍ଥିର କରିଥିଲେ। ଗତ ୨୧ ତାରିଖ ବିଳମ୍ବିତ ରାତିରେ ଏଟିଏମ୍ ଛକ ନିକଟକୁ ରାଜେଶଙ୍କୁ ଡାକି ତାଙ୍କ ପ୍ରେମିକାଙ୍କଠାରୁ ଦୂରେଇ ଯିବାକୁ କହିଥିଲେ। ସେ ମନା କରିବାରୁ ବିଠଲ ଓ ସହଯୋଗୀମାନେ ଅଶ୍ରାବ୍ୟ ଭାଷାରେ ଗାଳିଗୁଲଜ କରିବା ସହ ବାଡ଼ିରେ ସଂଘବଦ୍ଧ ଆକ୍ରମଣ କରିଥିଲେ। ପରଦିନ ପୁନର୍ବାର ଅଭିଯୁକ୍ତମାନେ ତାଙ୍କୁ ଉତ୍କଳ ହସ୍ପିଟାଲ ରାସ୍ତାକୁ ନେଇ ସେଠାରେ ମଧ୍ୟ ଅଶ୍ରାବ୍ୟ ଗାଳିଗୁଲଜ କରିବା ସହ ନିସ୍ତୁକ ମାଡ଼ ମାରି ଆଣ୍ଠେଇ ନିର୍ଯାତନା ଦେଇଥିଲେ। ଏପରିକି ଦୂରେଇ ନ ଗଲେ ଜୀବନରୁ ମାରିଦେବା ଲାଗି ମଧ୍ୟ ଧମକ ଦେଇଥିଲେ। ଏହାର ଭିଡିଓ ଭାଇରାଲ ହେବା ପରେ ଘଟଣା ଲୋକଲୋଚନକୁ ଆସିଥିଲା। ଏନେଇ ରାଜେଶ ଚନ୍ଦ୍ରଶେଖରପୁର ଥାନାରେ ଅଭିଯୋଗ କରିବା ପରେ ପୋଲିସ ସମସ୍ତ ୫ଜଣଙ୍କୁ ଚିହ୍ନଟ କରି ବୁଧବାର ୩ଜଣଙ୍କୁ ଓ ଗୁରୁବାର ୨ ଜଣଙ୍କୁ ଗିରଫ କରିଥିଲା।
