ନୂଆଦିଲ୍ଲୀ,୮ା୧୦(ପି.ଟି.): ମୁଖ୍ୟ ନିର୍ବାଚନ କମିଶନର(ସିଇସି) ଏବଂ ନିର୍ବାଚନ କମିଶନର (ଇସି) ନିଯୁକ୍ତି ପାଇଁ ଅଣାଯାଇଥିବା ୨୦୨୩ ଆଇନକୁ ଚ୍ୟାଲେଞ୍ଜ କରି ଦାଏର ପିଟିଶନଗୁଡ଼ିକୁ ବୃହତ୍ତର ସାମ୍ବିଧାନିକ ପୀଠକୁ ବିଚାର ପାଇଁ ପଠାଯିବା ନେଇ ଗତ ସେପ୍ଟେମ୍ବରରେ ସୁପ୍ରିମକୋର୍ଟ ଏକ ବିଭାଜିତ ରାୟ ଦେଇଥିଲେ। ଉକ୍ତ ରାୟକୁ ପ୍ରତ୍ୟାହାର କରିନେବା ପାଇଁ ହୋଇଥିବା ଆବେଦନକୁ ଅନୁଧ୍ୟାନ କରିବାକୁ ସର୍ବୋଚ୍ଚ ଅଦାଲତ ବୁଧବାର ସହମତ ହୋଇଛନ୍ତି।
ସିଇସି ଏବଂ ଇସି ନିଯୁକ୍ତି ପାଇଁ ଗଠିତ ଚୟନ କମିଟିରୁ ଭାରତର ପ୍ରଧାନ ବିଚାରପତି (ସିଜେଆଇ)ଙ୍କୁ ବାଦ୍ ଦେଇଥିବା ୨୦୨୩ ଆଇନର ବୈଧତାକୁ ଚ୍ୟାଲେଞ୍ଜ କରାଯାଇଥିଲା। ଏହାକୁ ବୃହତ୍ତର ପୀଠକୁ ପଠାଇବା ନେଇ ସେପ୍ଟେମ୍ବର ୨୩ରେ ଜଷ୍ଟିସ୍ ଦୀପଙ୍କର ଦତ୍ତ ଏବଂ ସତୀଶ ଚନ୍ଦ୍ର ଶର୍ମାଙ୍କ ଖଣ୍ଡପୀଠ ବିଭାଜିତ ରାୟ ଦେଇଥିଲେ। ଏଥିରେ କୁହାଯାଇଥିଲା, ମତଭେଦ ଥିବା କାରଣରୁ ଏକ ପ୍ରଭାବଶାଳୀ ଓ ପ୍ରାମାଣିକ ନ୍ୟାୟ ନିର୍ଣ୍ଣୟ ପାଇଁ ଉପଯୁକ୍ତ ସଂଖ୍ୟକ ବିଚାରପତିଙ୍କୁ ନେଇ ସାମ୍ବିଧାନିକ ପୀଠ ଗଠନ ନିମନ୍ତେ ପ୍ରଶାସନିକ ସ୍ତରରେ ଏହି ମାମଲା ସିଜେଆଇ ସୂର୍ଯ୍ୟ କାନ୍ତଙ୍କ ନିକଟରେ ଉପସ୍ଥାପନ କରାଯାଉ।
ପୂର୍ବ ଖଣ୍ଡପୀଠଙ୍କ ବିଭାଜିତ ରାୟ ପ୍ରତ୍ୟାହାର ଆବେଦନ ସମ୍ପର୍କରେ ବରିଷ୍ଠ ଆଇନଜୀବୀ ଗୋପାଳ ଶଙ୍କରନାରାୟଣନ ବୁଧବାର ସିଜେଆଇଙ୍କ ସମେତ ଜଷ୍ଟିସ୍ ଜୟମାଲ୍ୟ ବାଗ୍ଚୀ ଏବଂ ଭି. ମୋହନାଙ୍କ ଖଣ୍ଡପୀଠଙ୍କୁ ଅବଗତ କରାଇଥିଲେ। ଆମେ ଏହାକୁ ଅନୁଧ୍ୟାନ କରି ନିଷ୍ପତ୍ତି ନେବୁ ବୋଲି ସିଜେଆଇ କହିଛନ୍ତି।
