ନୂଆଦିଲ୍ଲୀ,୨୩।୮: ଭାରତ ଓ ଶ୍ରୀଲଙ୍କା ମଧ୍ୟରେ ଚାଲିଥିବା ଟେଷ୍ଟ ସିରିଜର ଦ୍ୱିତୀୟ ମୁକାବିଲା କଲମ୍ବୋର SSC ଗ୍ରାଉଣ୍ଡରେ ଖେଳାଯାଉଛି । ଟସ୍ ଜିତି ଭାରତୀୟ ଅଧିନାୟକ ଶୁଭମନ ଗିଲ୍ ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲେ । ପ୍ରଥମ ଦିନର ଖେଳ ଶେଷ ସୁଦ୍ଧା ଭାରତ ୫ ୱିକେଟ୍ ହରାଇ ୩୦୦ ରନ୍ ସଂଗ୍ରହ କରିଛି । ପ୍ରଥମ ଦିନରେ ଗିଲଙ୍କ ବ୍ୟାଟରୁ ୫୦ ରନର ଇନିଂସ ଦେଖିବାକୁ ମିଳିଥିଲା। ଏହି ଅର୍ଦ୍ଧଶତକ ସହ ଗିଲ୍ ବିଶ୍ୱ ଟେଷ୍ଟ ଚାମ୍ପିଅନଶିପ୍ (WTC) ଇତିହାସରେ ଏକ ବଡ଼ ରେକର୍ଡ ନିଜ ନାମରେ କରିଛନ୍ତି।
ଶୁଭମନ ଗିଲ୍ WTC ୨୦୨୫-୨୭ ସଂସ୍କରଣରେ ୧୦୦୦ ରନ୍ ପୂରଣ କରିଥିବା ପ୍ରଥମ ଭାରତୀୟ ଅଧିନାୟକ ହୋଇଛନ୍ତି । ଅଧିନାୟକ ଭାବେ ମାତ୍ର ୧୦ଟି ଟେଷ୍ଟ ମ୍ୟାଚରେ ସେ ଏହି ମାଇଲଷ୍ଟୋନ୍ ହାସଲ କରିଛନ୍ତି ।WTC ୨୦୨୫-୨୭ରେ ଗିଲ୍ ଏପର୍ଯ୍ୟନ୍ତ ୧୭ଟି ଇନିଂସରୁ ୬୮.୨୬ ହାରାହାରିରେ ୧୦୨୪ ରନ୍ କରିଛନ୍ତି । ଏଥିରେ ୫ଟି ଶତକ ଓ ୨ଟି ଅର୍ଦ୍ଧଶତକ ସାମିଲ ରହିଛି। ଗିଲଙ୍କ ପୂର୍ବରୁ ରୋହିତ ଶର୍ମା, ଅଜିଙ୍କ୍ୟ ରାହାଣେ ଓ ଯଶସ୍ୱୀ ଜୟସ୍ୱାଲ WTCର ଗୋଟିଏ ସଂସ୍କରଣରେ ୧୦୦୦ରୁ ଅଧିକ ରନ୍ କରିସାରିଛନ୍ତି । କିନ୍ତୁ ଅଧିନାୟକ ଭାବେ ଏହି ଉପଲବ୍ଧି ହାସଲ କରିବାରେ ଗିଲ୍ ପ୍ରଥମ ଭାରତୀୟ ହୋଇଛନ୍ତି।
ଶ୍ରୀଲଙ୍କା ବିପକ୍ଷ କଲମ୍ବୋ ଟେଷ୍ଟରେ ଶୁଭମନ ଗିଲ୍ ଆଉ ଏକ ବଡ଼ ମାଇଲଷ୍ଟୋନ୍ ହାସଲ କରିଛନ୍ତି। ସେ ଟେଷ୍ଟ କ୍ରିକେଟରେ ନିଜର ୩୦୦୦ ରନ୍ ପୂରଣ କରିଛନ୍ତି। ଏହି ଉପଲବ୍ଧି ହାସଲ କରି ଗିଲ୍ ସବୁଠାରୁ କମ୍ ବୟସରେ ଟେଷ୍ଟରେ ୩୦୦୦ ରନ୍ ପୂରଣ କରିଥିବା ଭାରତୀୟଙ୍କ ତାଲିକାରେ ଚତୁର୍ଥ ସ୍ଥାନରେ ରହିଛନ୍ତି। ଏହି ତାଲିକାରେ ସଚିନ ତେନ୍ଦୁଲକର ସର୍ବାଗ୍ରେ ଅଛନ୍ତି। ସେ ମାତ୍ର ୨୩ ବର୍ଷ ୨୨୮ ଦିନରେ ୩୦୦୦ ଟେଷ୍ଟ ରନ୍ ପୂରଣ କରିଥିଲେ। ବୀରେନ୍ଦ୍ର ସେହୱାଗ ୨୬ ବର୍ଷ ୧୫୭ ଦିନରେ ଏହି ମାଇଲଷ୍ଟୋନ୍ ହାସଲ କରି ଦ୍ୱିତୀୟ ଏବଂ ଦିଲୀପ ଭେଙ୍ଗସରକର ୨୬ ବର୍ଷ ୨୬୩ ଦିନ ବୟସରେ ଏହା କରି ତୃତୀୟ ସ୍ଥାନରେ ଅଛନ୍ତି।
