ପୁରୀ ଅଫିସ, ୨୫ା୧୨: ରାଜ୍ୟ ଯୋଜନା ବୋର୍ଡ ଉପାଧ୍ୟକ୍ଷ ସଞ୍ଜୟ ଦାସବର୍ମାଙ୍କ ବ୍ୟକ୍ତିଗତ ସହାୟକ ଚିତ୍ତରଞ୍ଜନ ପଲେଇ ମୃତ୍ୟୁ ଘଟଣାର ପର୍ଦ୍ଦାଫାଶ୍ କରିଛି କ୍ରାଇମବ୍ରାଞ୍ଚ। ଚକ୍ରପଡ଼ା ଗ୍ରାମର ଏକ ଘଟଣାକୁ ନେଇ ଚିତ୍ତରଞ୍ଜନଙ୍କୁ ହତ୍ୟା କରାଯାଇଥିବାବେଳେ ତାଙ୍କ ସହଯୋଗୀ ପୁରୀ ଶାସନ ଦାମୋଦରପୁରର ଜଗନ୍ନାଥ ଷଡ଼ଙ୍ଗୀ ହିଁ ମୁଖ୍ୟ ଅଭିଯୁକ୍ତ। କ୍ରାଇମବ୍ରାଞ୍ଚ ଶୁକ୍ରବାର ଏହି ଘଟଣାରେ ସମ୍ପୃକ୍ତି ଅଭିଯୋଗରେ ଜଗନ୍ନାଥଙ୍କ ସମେତ ବାସୁଦେବପୁର ଅଞ୍ଚଳର ଅଶୋକ ଉପାଧ୍ୟାୟଙ୍କୁ ଗିରଫ କରି କୋର୍ଟ ଚାଲାଣ କରିଛି। ଉଭୟଙ୍କ ବିରୋଧରେ ଦଫା ୩୦୨, ୨୦୧, ୧୨୦(ବି), ୩୪ ଆଇପିସି ରୁଜୁ ହୋଇଛି। ସେମାନଙ୍କ ଜାମିନ ଆବେଦନ ଖାରଜ ପରେ ଉଭୟଙ୍କୁ ବିଚାରବିଭାଗୀୟ ହାଜତକୁ ପଠାଇ ଦିଆଯାଇଛି। ଅଭିଯୁକ୍ତଦ୍ୱୟଙ୍କୁ ପଚରାଉଚରା ପାଇଁ ୭ଦିନିଆ ରିମାଣ୍ଡରେ ଆଣିବାକୁ କୋର୍ଟରେ ଆବେଦନ କରାଯାଇଛି ବୋଲି ଶୁକ୍ରବାର ପୁରୀ ଜିଲା ଆରକ୍ଷୀ ଅଧୀକ୍ଷକଙ୍କ କାର୍ଯ୍ୟାଳୟରେ ଆୟୋଜିତ ଖବରଦାତା ସମ୍ମିଳନୀରେ କ୍ରାଇମବ୍ରାଞ୍ଚ ଡିଏସ୍ପି ଶିଶିର ମିଶ୍ର ସୂଚନା ଦେଇଛନ୍ତି।
କ୍ରାଇମ୍ବ୍ରାଞ୍ଚ ଡିଏସ୍ପି ମିଶ୍ର କହିଛନ୍ତି, ୧୧ତାରିଖ ରାତିରୁ ଚିତ୍ତରଞ୍ଜନ ନିଖୋଜ ଥିବାନେଇ ତାଙ୍କ ଦାଦା ୧୨ତାରିଖରେ ପୁରୀ ସଦର ଥାନାରେ ଲିଖିତ ଅଭିଯୋଗ କରିଥିଲେ। ଏ ନେଇ ପୋଲିସ ଏକ ଅପହରଣ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ୧୩ ତାରିଖ ସକାଳେ ଚିତ୍ତରଞ୍ଜନଙ୍କ କ୍ଷତବିକ୍ଷତ ଶରୀର ଗଡ଼ମୃଗଶିରା ପୋଲ ନିକଟ ନୂଆନଈରୁ ମିଳିଥିଲା। ତେଣୁ ପରିବାର ଲୋକେ ହତ୍ୟା ଅଭିଯୋଗ ଆଣିଥିଲେ। ଫଳରେ ୧୫ ତାରିଖରେ ଏହି ମାମଲାକୁ କ୍ରାଇମବ୍ରାଞ୍ଚକୁ ହସ୍ତାନ୍ତର କରାଯାଇଥିଲା। କ୍ରାଇମବ୍ରାଞ୍ଚ ଟିମ୍ ଜମାରସୁଆଁ ନଈବନ୍ଧ, ସାନବନ୍ଧକେରା, ଚକ୍ରପଡ଼ା ଏବଂ ଚିତ୍ତରଞ୍ଜନ ରହୁଥିବା ମାଟିଆପଡ଼ାସ୍ଥିତ ଭଡ଼ାଘରେ ତଦନ୍ତ କରିବା ସହ ସାକ୍ଷୀମାନଙ୍କୁ ପଚରାଉଚରା କରିଥିଲା। ଚକ୍ରପଡ଼ାର ପ୍ରତ୍ୟକ୍ଷଦର୍ଶୀଙ୍କ ବୟାନରୁ ଘଟଣାର ସୁରାକ ମିଳିଥିଲା। ଚିତ୍ତରଞ୍ଜନଙ୍କ ମୃତ୍ୟୁ ଏକ ଦୁର୍ଘଟଣା ନୁହେଁ ବରଂ ତାଙ୍କୁ ହତ୍ୟା କରାଯାଇଥିଲା। ଚକ୍ରପଡ଼ାର ଏକ ଘଟଣାରୁ ହିଁ ଏହି ହତ୍ୟାକାଣ୍ଡର ସୂତ୍ରପାତ ହୋଇଥିଲା। ୧୧ତାରିଖ ବିଳମ୍ବିତ ରାତିରେ ଚିତ୍ତ ନିଜ ବାଇକ୍ରେ ଚକ୍ରପଡ଼ାର ରହସ୍ୟମୟୀ ଯୁବତୀଙ୍କ ଘରକୁ ଯାଇଥିଲେ। ଜଗନ୍ନାଥଙ୍କ ସହ ଯୁବତୀଙ୍କ ପରିବାରର ସମ୍ପର୍କ ରହିଥିଲା, ମାତ୍ର ଚିତ୍ତରଞ୍ଜନ ଏତେରାତିରେ କାହିଁକି ଆସିଛନ୍ତି ବୋଲି ଗାଁରେ ଉତ୍ତେଜନା ପ୍ରକାଶ ପାଇବା ସହ ଗଣ୍ଡଗୋଳ ହୋଇଥିଲା। ଅଶୋକଙ୍କ ସହ ଗାଁର କେତେଜଣ ଯୁବକ ସେମାନଙ୍କୁ ପିଛା କରିଥିଲେ। ନଦୀବନ୍ଧ ଉପରେ ଚିତ୍ତରଞ୍ଜନଙ୍କୁ ମରଣାନ୍ତକ ଆକ୍ରମଣ କରାଯାଇଥିଲା। ଦୁଇଦିନ ପରେ ଘଟଣାସ୍ଥଳର ମାତ୍ର କେଇଫୁଟ ଦୂର ନୂଆନଈରୁ ଚିତ୍ତରଞ୍ଜନଙ୍କ ମୃତଦେହ ମିଳିଥିଲା। ହତ୍ୟାକାଣ୍ଡର ମୁଖ୍ୟ ଥିଲେ ଜଗନ୍ନାଥ। ହତ୍ୟା ଘଟଣା ସହ ଜଣେ ଯୁବତୀ ଏବଂ ଅନ୍ୟ କେତେଜଣ ସମ୍ପୃକ୍ତ ଥିବା ଜଣାପଡ଼ିଛି। ଚିତ୍ତରଞ୍ଜନଙ୍କ ପରିବାର ଲୋକଙ୍କ ସମେତ ଅନ୍ୟ ସାକ୍ଷୀଙ୍କ ବୟାନ ରେକର୍ଡ କରାଯାଇଛି। କ୍ରାଇମବ୍ରାଞ୍ଚ ଟିମ୍ ମୋଟ ୫ଜଣଙ୍କ ପଲିଗ୍ରାଫ ଟେଷ୍ଟ କରିଥିଲା। ସେମାନଙ୍କ ମଧ୍ୟରୁ ଘଟଣାରେ ସମ୍ପୃକ୍ତ ଥିବା ମୁଖ୍ୟ ଅଭିଯୁକ୍ତ ଜଗନ୍ନାଥ ଓ ତାଙ୍କ ସହଯୋଗୀ ଅଶୋକଙ୍କୁ ଗିରଫ କରାଯାଇଛି। କ୍ରାଇମବ୍ରାଞ୍ଚ ଡିଏସ୍ପି ତଦନ୍ତ ଜାରି ରହିଛି, ଖୁବ୍ଶୀଘ୍ର ଅନ୍ୟ ଅଭିଯୁକ୍ତମାନଙ୍କୁ ଗିରଫ କରାଯିବ।
