ବେର୍ନ,୨୮।୧୧: ମହାକାଶରେ ଧୀରେଧୀରେ ଆବଜର୍ନା ବଢ଼ିବାରେ ଲାଗିଛି। ବିଭିନ୍ନ ଦେଶର ମହାକାଶ ଯୋଜନା ଅନ୍ତର୍ଗତ ପଠାଯାଉଥିବା ଉପଗ୍ରହ ଏବଂ ଅନ୍ୟ ସର୍ଭେଲାନ୍ସ୍ ପଦାର୍ଥ ଅକାମୀ ହେବା ପରେ ଏଠାରେ ଏଭଳି ସ୍ଥିତି ସୃଷ୍ଟି ହୋଇଛି। ଫଳରେ ନୂଆ ମହାକାଶ ଗବେଷଣା କ୍ଷେତ୍ରରେ ଅଗାମୀ ଦିନରେ ବାଧା ସୃଷ୍ଟି ହେବାର ଆଶଙ୍କା ଦେଖାଦେଇଛି। ତେବେ ସୁଇଜରଲାଣ୍ଡର କ୍ଲିୟରସ୍ପେସ୍ ନାମକ ଏକ କମ୍ପାନୀ ମହାକାଶ ସଫେଇ କାର୍ଯ୍ୟ କରିବା ଲାଗି ଅଣ୍ଟା ଭିଡ଼ିଛି। କମ୍ପାନୀର ଏଭଳି କାର୍ଯ୍ୟକୁ ୟୁରୋପୀୟ ସ୍ପେଶ୍ ଏଜେନ୍ସି ପକ୍ଷରୁ ସମର୍ଥନ କରାଯାଇଛି। ସଫେଇ କାର୍ଯ୍ୟ ୨୦୨୫ରୁ ଆରମ୍ଭ ହେବ। ଏଥିପାଇଁ ଏକ ସ୍ବତନ୍ତ୍ର ଉପଗ୍ରହ ମହାକାଶକୁ ପଠାଯିବ। ଏହି ସଫେଇ ଅଭିଯାନ ପାଇଁ ୮.୬ କୋଟି ୟୁରୋ ଖର୍ଚ୍ଚ ହେବ ବୋଲି ବ୍ୟୟ ଅଟକଳ ପ୍ରସ୍ତୁତ କରାଯାଇଛି। ୟୁରୋପୀୟ ସ୍ପେସ୍ ଏଜେନ୍ସିର ମହାନିର୍ଦ୍ଦେଶକ ୟାନ୍ ଓ୍ବେନର ଗତ ଡିସେମ୍ବରରେ ଏହି କାର୍ଯ୍ୟ ଆରମ୍ଭ ହେବ ବୋଲି ସୂଚନା ଦେଇଥିଲେ। ଇତିମଧ୍ୟରେ ଗୋଟିଏ ବର୍ଷ ବିତିବାକୁ ଯାଉଛି। କ୍ଲିୟରସ୍ପେସ୍ ପକ୍ଷରୁ ଛଡ଼ା ଯିବାକୁ ଥିବା ଉପଗ୍ରହ ମହାକାଶରେ ଭାସି ବୁଲୁଥିବା ଅଦରକାରୀ ପଦାର୍ଥକୁ ସଂଗ୍ରହ କରି ଠୁଳ କରିବା ସହିତ ଏହାକୁ ଟାଣି ପୃଥିବୀର ବାୟୁମଣ୍ଡଳ ଭିତରକୁ ଆଣିବ। ଏସବୁ ପଦାର୍ଥ ପ୍ରବଳ ବେଗରେ ଭୂପୃଷ୍ଠ ମୁହାଁ ହେବ। ବାୟୁମଣ୍ଡଳରେ ଘଷର୍ଣ ଯୋଗୁ ଉତ୍ପନ୍ନ ହେଉଥିବା ତାପମାତ୍ରାରେ ଏସବୁ ଆଧାବାଟରେ ଜଳି ପାଉଁଶ ହୋଇଯିବ। କ୍ଲିୟରସ୍ପେସ୍ର ପ୍ରଥମ ମିଶନରେ ୧୧୨ କିଲୋଗ୍ରାମ୍ ଅବାର୍ଜନା ସଫା କରାଯିବ ବୋଲି କୁହାଯାଉଛି।
