କମୁଛନ୍ତି କୁଶଳୀ କର୍ମଚାରୀ
12:39 pmMay 1, 2022May 1, 2022 / 21

ବଅଁରପାଳ,୧।୫ ଉଡ଼ାଜାହାଜରୁ ବୁଡ଼ାଜାହାଜ। ସମାଧିରୁ ସୌଧ। କଳକବ୍‌ଜାରୁ କାରଖାନା। ବିକାଶର ପ୍ରତିଟି କ୍ଷେତ୍ରରେ ଲୁଚିରହିଛି ଶ୍ରମିକଙ୍କ ହାଡ଼ଭଙ୍ଗା ପରିଶ୍ରମ। ସ୍ବପ୍ନ, ସମ୍ଭାବନା, ଆତ୍ମସନ୍ତୁଷ୍ଟିକୁ ଜଳାଞ୍ଜଳି ଦେଇ ଜଣେ ଶ୍ରମିକ ରାଷ୍ଟ୍ରର ଉନ୍ନତିରେ କାଟିଦିଏ ତମାମ ଜୀବନ। ତେବେ ବିକାଶର ସୁଉଚ୍ଚ ଶିଡ଼ି ତିଆରି କରୁଥିବା ଏଭଳି ଶ୍ରମିକ ଗୋଷ୍ଠୀ ଏବଂ ସେମାନଙ୍କ ପରିବାର ସର୍ବଦା ଅବହେଳିତ ବୋଲି ଅଭିଯୋଗ ହୁଏ। କଳକାରଖାନାରେ ମାନବ ସମ୍ବଳର ଉପଯୁକ୍ତ ପରିଚାଳନାର ଅଭାବ ଏବଂ ହ୍ରାସ ପାଉଥିବା ନିଯୁକ୍ତି ଠିକା କର୍ମଚାରୀ ଭଳି ପ୍ରଥା ସୃଷ୍ଟି କରିଥିବାବେଳେ ଅନୁଭୂତ ହେଲାଣି କୁଶଳୀ ଶ୍ରମିକଙ୍କ ଅଭାବବୋଧ। ‘ନାଲ୍‌କୋ’ ଭଳି ନବରତ୍ନ ମାନ୍ୟତାପ୍ରାପ୍ତ କମ୍ପାନୀ ମଧ୍ୟ ଏଭଳି ସମସ୍ୟାରୁ ବାଦ୍‌ ପଡ଼ିନି। କମ୍ପାନୀରେ କୁଶଳୀ କର୍ମଚାରୀଙ୍କ ସଂଖ୍ୟା ହ୍ରାସ ପାଇବା ଶୁଭ ସଙ୍କେତ ନୁହେଁ। ଏହା ଆଗାମୀ ଦିନରେ ବିଷମ ପରିସ୍ଥିତି ସୃଷ୍ଟି କରିବ ବୋଲି ଶ୍ରମିକ ନେତାମାନେ ଆଶଙ୍କା ବ୍ୟକ୍ତ କରିଛନ୍ତି।
ଶିଳ୍ପସମୃଦ୍ଧ ଅନୁଗୋଳ ଜିଲାରେ ଗଢ଼ିଉଠିଛି ଅନେକ କମ୍ପାନୀ। ସେଥିମଧ୍ୟରୁ ଅନ୍ୟତମ ନାଲ୍‌କୋ। ଜାତୀୟ ଅର୍ଥନୀତିର ଗୁରୁତ୍ୱପୂର୍ଣ୍ଣ ଅଙ୍ଗ ପାଲଟିଥିବା ଏହି ରାଷ୍ଟ୍ରାୟତ୍ତ ଉଦ୍ୟୋଗରେ ବହୁ କୁଶଳୀ, ଅର୍ଦ୍ଧକୁଶଳୀ ଏବଂ ଅଣକୁଶଳୀ ଶ୍ରମିକ କାର୍ଯ୍ୟ କରୁଛନ୍ତି। ତେବେ ଦିନକୁ ଦିନ କୁଶଳୀ ତଥା ସ୍ଥାୟୀ କର୍ମଚାରୀଙ୍କ ସଂଖ୍ୟା କମିବାରେ ଲାଗିଛି। କମ୍ପାନୀ ପକ୍ଷରୁ ମିଳିଥିବା ସୂଚନା ଅନୁଯାୟୀ, ନାଲ୍‌କୋ ସ୍ମେଲଟ୍‌ର ପ୍ଲାଣ୍ଟରେ ପୂର୍ବରୁ ୨ ହଜାର ୭୫୦ ସ୍ଥାୟୀ କର୍ମଚାରୀ ଥିଲେ। ଇତିମଧ୍ୟରେ ସେମାନଙ୍କ ମଧ୍ୟରୁ ଅନେକେ ଅବସର ଗ୍ରହଣ କରିସାରିଲେଣି। ଫଳରେ ଏହି କର୍ମଚାରୀଙ୍କ ସଂଖ୍ୟା ୧ ହଜାର ୭୮୪କୁ ହ୍ରାସ ପାଇଛି। ସେହିପରି କ୍ୟାପ୍‌ଟିଭ୍‌ ପାଓ୍ବାର ପ୍ଲାଣ୍ଟ (ସିପିପି)ରେ ପୂର୍ବରୁ ୧ ହଜାର ୨୦୦ ଶ୍ରମିକ କାର୍ଯ୍ୟ କରୁଥିବାବେଳେ ଏବେ ଏଠାରେ ସ୍ଥାୟୀ ଶ୍ରମିକଙ୍କ ସଂଖ୍ୟା ୫୧୦କୁ ଖସି ଆସିଲାଣି। ମେ’ ୧ ଶ୍ରମିକ ଦିବସ ଅବ୍ୟବହିତ ପୂର୍ବରୁ ଶନିବାର ୩୪ କର୍ମଚାରୀ ଅବସର ନେଇଛନ୍ତି। ଏଭଳି ଧାରା ପ୍ରତିଦିନ ଲାଗି ରହିଛି। ଅଥଚ କମ୍ପାନୀରେ ନୂତନ ନିଯୁକ୍ତି ଦିଆଯାଉନାହିଁ। ୨୦୦୭ରୁ ଏଭଳି ସ୍ଥିତି ଜାରି ରହିଛି। ପ୍ରତିମାସରେ ୩୦ରୁ ୪୦ କର୍ମଚାରୀ ଅବସର ନେଉଛନ୍ତି। କମ୍ପାନୀରେ କାମ କରିଥିବା କ୍ଷତିଗ୍ରସ୍ତ ଜମିହରା ପ୍ରଜାଙ୍କ ଚାକିରି ଅଳ୍ପ କେଇଟା ବର୍ଷ ମଧ୍ୟରେ ଶେଷ ହୋଇଯିବ। କୁଶଳୀ କର୍ମଚାରୀଙ୍କ ଅନୁପସ୍ଥିତି କମ୍ପାନୀରେ ଶ୍ରମଶକ୍ତି ହ୍ରାସ କରିବ, ଯାହାର ସିଧାସଳଖ ପ୍ରଭାବ ଉତ୍ପାଦନ ଉପରେ ପଡ଼ିବ। ଠିକା ଶ୍ରମିକଙ୍କ ପକ୍ଷେ ଏସବୁ ବୋଝ ବୋହିବା ସହଜ ହେବନାହିଁ ବୋଲି ବହୁ ଶ୍ରମିକ ନେତା ଆଶଙ୍କା ବ୍ୟକ୍ତ କରିଛନ୍ତି। ସେହିପରି ଶ୍ରମଶକ୍ତିର ଅନ୍ୟତମ ଅଙ୍ଗ ହେଉଛନ୍ତି ମହିଳା ଶ୍ରମିକ। କମ୍ପାନୀରେ ସେମାନଙ୍କ ସ୍ବାସ୍ଥ୍ୟରକ୍ଷା ଏବଂ ସେମାନଙ୍କ ନବଜାତକଙ୍କ ସୁରକ୍ଷା ପ୍ରତି ସ୍ବତନ୍ତ୍ର ଦୃଷ୍ଟିଦେବାକୁ କମ୍ପାନୀ ନିୟମ-୧୯୪୮ ଅନୁଯାୟୀ ନିର୍ଦ୍ଦେଶ ରହିଛି। ତେବେ ନାଲ୍‌କୋର ମାତ୍ର ୨ଟି ପ୍ଲାଣ୍ଟରେ ଥିବା ଶିଶୁ ପାଳନ ଗୃହ (କ୍ରେଚ୍‌)ରେ ଦୀର୍ଘଦିନରୁ ତାଲା ଝୁଲୁଛି। କାମ କରୁଥିବା କୁଶଳୀ, ଅଣକୁଶଳୀ ଏବଂ ଠିକା ଶ୍ରମିକଙ୍କୁ ଉଚିତ୍‌ ପ୍ରାପ୍ୟ ମିଳୁ ନ ଥିବା ଅଭିଯୋଗ ମଧ୍ୟ ହେଉଛି। ଏହାକୁ ନେଇ ଅସନ୍ତୋଷ ତେଜିବାରେ ଲାଗିଛି। ତେଣୁ ତୁରନ୍ତ କମ୍ପାନୀ କର୍ତ୍ତୃପକ୍ଷ ଖାଲି ପଡ଼ିଥିବା ପଦବୀରେ ନିଯୁକ୍ତି ଦେବାକୁ ଦାବି କରିଛନ୍ତି ଶ୍ରମିକ ନେତା।