ନୂଆଦିଲ୍ଲୀ, ୧୭ା୮ (ପି.ଟି.)-ଅଧିନାୟକ ମନପ୍ରୀତ ସିଂଙ୍କ ସମେତ ଭାରତୀୟ ପୁରୁଷ ହକି ଦଳର ୬ ଜଣ ହକି ଖେଳାଳି କୋଭିଡ୍-୧୯ରୁ ଆରୋଗ୍ୟ ଲାଭ କରିଛନ୍ତି। ସୋମବାର ସନ୍ଧ୍ୟାରେ ସେମାନେ ହସ୍ପିଟାଲ ଛାଡ଼ ପାଇଛନ୍ତି। ମନପ୍ରୀତଙ୍କ ବ୍ୟତୀତ ଅନ୍ୟ ଖେଳାଳିମାନେ ହେଲେ ଡିଫେଣ୍ଡର ସୁରେନ୍ଦର କୁମାର, ଯଶକରନ ସିଂ, ବରୁଣ କୁମାର, ଗୋଲକିପର କ୍ରିଷନ ବାହାଦୂର ପାଠକ ଏବଂ ଷ୍ଟ୍ରାଇକର ମନଦୀପ ସିଂ। ଏହି ସମସ୍ତ ଖେଳାଳିଙ୍କର ଦୁଇଥର ଟେଷ୍ଟ କରାଯାଇଥିଲା ଏବଂ ଫଳାଫଳ ନେଗେଟିଭ ଆସିଥିଲା। ଅଗଷ୍ଟ ୧୦ରୁ ୧୨ ମଧ୍ୟରେ ଏହି ଖେଳାଳିମାନେ କରୋନା ଭାଇରସ ଦ୍ୱାରା ସଂକ୍ରମିତ ହୋଇଥିଲେ। ଟେଷ୍ଟରେ ସମସ୍ତଙ୍କର ପଜିଟିଭ୍ ଆସିଥିଲା। ମନଦୀପଙ୍କ ନିକଟରେ ଯଦିଓ କୌଣସି ଲକ୍ଷଣ ଦେଖାଦେଇ ନ ଥିଲା, ତାଙ୍କ ରକ୍ତରେ ଅକ୍ସିଜେନ ସ୍ତର ସ୍ବାଭାବିକ ନ ଥିଲା। ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ) ଦ୍ୱାରା ତାଙ୍କୁ ବେଙ୍ଗାଲୁରୁସ୍ଥିତି ଏସ୍ଏସ୍ ସ୍ପର୍ଶ ମଲ୍ଟି ସ୍ପେସିଆଲିଟି ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। ପରେ ପ୍ରତିଷେଧମୂଳକ ବ୍ୟବସ୍ଥା ସ୍ବରୂପ ମନପ୍ରୀତ ଓ ଅନ୍ୟ ୪ ଖେଳାଳିଙ୍କୁ ସେହି ହସ୍ପିଟାଲରେ ଭର୍ତ୍ତି କରାଯାଇଥିଲା। ବେଙ୍ଗାଲୁରୁରେ ଉଭୟ ମହିଳା ଓ ପୁରୁଷ ଦଳର ଟ୍ରେନିଂ ବୁଧବାରଠାରୁ ଆରମ୍ଭ ହେବ। ତେବେ ଏହି ୬ ଜଣ ଖେଳାଳି ସେମାନଙ୍କ ଟିମ୍ମେଟଙ୍କ ସହ ଯୋଗଦେବା ପୂର୍ବରୁ କିଛି ଦିନ ଆଇସୋଲେଶନରେ ରହିବେ। ବର୍ତ୍ତମାନ କ୍ୟାମ୍ପ ପାଇଁ ୩୩ ପୁରୁଷ ଓ ୨୪ ମହିଳା ଖେଳାଳି ବେଙ୍ଗାଲୁରୁରେ ଉପସ୍ଥିତ ଅଛନ୍ତି। ଜାତୀୟ କ୍ୟାମ୍ପ ସେପ୍ଟେମ୍ବର ୩୦ ତାରିଖ ପର୍ଯ୍ୟନ୍ତ ଚାଲିବ। ରାଜ୍ୟ ସରକାରଙ୍କ ଗାଇଡ୍ଲାଇନ୍ ଅନୁସାରେ ସୁସ୍ଥ ହୋଇଥିବା ଖେଳାଳିମାନେ ଅଭ୍ୟାସ ଆରମ୍ଭ ପୂର୍ବରୁ ଏକ ସପ୍ତାହରୁ ୧୦ ଦିନ ପର୍ଯ୍ୟନ୍ତ ସାଇ କ୍ୟାମ୍ପସ ଭିତରେ ଆଇସୋଲେଶନରେ ରହିବେ। ସମସ୍ତ ମହିଳା ଖେଳାଳି ପହଞ୍ଚତ୍ବା ପରେ ସେମାନଙ୍କର କୋଭିଡ୍-୧୯ ଟେଷ୍ଟ ହୋଇଥିଲା ଏବଂ ଫଳାଫଳ ନେଗେଟିଭ୍ ଆସିଥିଲା।
