ଗଞ୍ଜାମ,୧୧ା୧୦(ବିଦ୍ୟାଧର ସାହୁ): ଗଞ୍ଜାମ ବ୍ଲକ୍ ମଲାଡ଼ ପଞ୍ଚାୟତ ଅନ୍ତର୍ଗତ କୁଶପଲ୍ଲୀସ୍ଥିତ ମା’ ଚାମୁଣ୍ଡାଙ୍କ ପୀଠରେ ଶାରଦୀୟ ଦୁର୍ଗାପୂଜା ଅବସରରେ ୯ ଦିନବ୍ୟାପୀ ନବରାତ୍ର ପୂଜା ଓ ଅଖଣ୍ଡ ଦୀପ ପ୍ରଜ୍ବଳନ ରବିବାରଠାରୁ ଆରମ୍ଭ ହୋଇଛି। ଏଥିପାଇଁ ସମଗ୍ର କୁଶପଲ୍ଲୀ ଓ ଆଖପାଖ ଅଞ୍ଚଳରେ ଉତ୍ସବମୁଖର ପରିବେଶ ସୃଷ୍ଟି ହୋଇଛି।
ଏହି ଅବସରରେ ପୀଠରେ ପ୍ରତ୍ୟହ ଚଣ୍ଡୀପାଠ, ସୂର୍ଯ୍ୟପୂଜା, ଘୃତଯଜ୍ଞ ଓ ନବଦୁର୍ଗାଙ୍କ ବିଶେଷ ପୂଜାର୍ଚ୍ଚନା ଅନୁଷ୍ଠିତ ହେଉଛି। ପ୍ରଥମ ଦିନ (ପ୍ରତିପଦା) ରବିବାର ମା’ ଚାମୁଣ୍ଡା ‘ଶୈଳପୁତ୍ରୀ’ ବେଶରେ ଭକ୍ତଙ୍କୁ ଦର୍ଶନ ଦେଇଛନ୍ତି। ଦ୍ୱିତୀୟା ସୋମବାର ବ୍ରହ୍ମଚାରିଣୀ ବେଶ ତୃତୀୟାରେ ଚନ୍ଦ୍ର ଘଣ୍ଟା ବେଶ, ଚତୁର୍ଥୀରେ କୁଷ୍ମଣ୍ଡା ବେଶ, ପଞ୍ଚମୀ ଦିନ ସ୍କନ୍ଦମାତା ବେଶ, ଷଷ୍ଠୀ ଦିନ କାତ୍ୟାୟନୀ ବେଶ, ସପ୍ତମୀରେ କାଳରାତ୍ରି ବେଶ ଅଷ୍ଟମୀରେ ମହା ଗୌରୀ ବେଶ, ନବମୀରେ ସିଦ୍ଧି ଦାତ୍ରୀ ଓ ଦଶମୀରେ ବିଜୟୀ ଦଶମୀ ପାଳନ ହେବ। ପ୍ରତ୍ୟେକ ଦିନ ଘୃତଯଜ୍ଞ ଓ ଚଣ୍ଡୀପାଠ ଅନୁଷ୍ଠିତ ହେବ ବୋଲି ଆୟୋଜକ ଚାମୁଣ୍ଡା ଶକ୍ତି ପୀଠ ପରିଚାଳନା କମିଟି ପକ୍ଷରୁ ସୂଚନା ମିଳିଛି। ମା’ଙ୍କର ପୀଠରେ ବିଭିନ୍ନ ଅତ୍ୟାଧୁନିକ ଆଲୋକ ମାଳାରେ ସୁସଜ୍ଜିତ ହୋଇଛି। ଏହି ନବରାତ୍ର ପୂଜାକୁ କମିଟି ସଭାପତି ଟୁକୁନା ସାହୁ, ଉପସଭାପତି ଲିଙ୍ଗରାଜ ମହାପାତ୍ର (ସାନ), ସମ୍ପାଦକ ଡି ରାଜେନ୍ଦ୍ର, କୋଷଧ୍ୟକ୍ଷ ସମୀର ବିଶ୍ୱାଳ, ସଦସ୍ୟ କୃଷ୍ଣ ପଲାଇ, ପୂର୍ବତନ ବ୍ଲକ ଉପାଧ୍ୟକ୍ଷ ଭାଗ୍ୟ ରେଡ୍ଡୀ, ଭୀମସେନ ସାହୁ, ରାମରେଡ୍ଡୀ, ବିଶ୍ୱନାଥ ଦାସ ପ୍ରମୁଖ ପରିଚାଳନା କରୁଛନ୍ତି।
