ନୂଆଦିଲ୍ଲୀ,୩।୯(ପି.ଟି.): ବିଶ୍ୱ ଚାମ୍ପିୟନ ତଥା ଅଲିମ୍ପିକ୍ସ ରୌପ୍ୟପଦକ ବିଜୟିନୀ ପି.ଭି. ସିନ୍ଧୁ ଆସନ୍ତାମାସରେ ଆୟୋଜନ ହେବାକୁ ଥିବା ଉବର କପ୍ ଫାଇନାଲ୍ସରୁ ଓହରିଯାଇଛନ୍ତି। ବ୍ୟକ୍ତିଗତ କାରଣରୁ ଏହି ଗୁରୁତ୍ୱପୂର୍ଣ୍ଣ ଟୁର୍ନାମେଣ୍ଟରୁ ସେ ଓହରିଯାଇଛନ୍ତି। ସେ ମଧ୍ୟ ଡେନ୍ମାର୍କରେ ଖେଳାଯିବାକୁ ଥିବା ଆଗମୀ ସୁପର ୭୫୦ ନ ଖେଳିବା ସମ୍ଭାବନା ସୃଷ୍ଟି ହୋଇଛି।
ଡେନ୍ମାର୍କର ଅରହୁସ୍ରେ ଅକ୍ଟୋବର ୩ରୁ ୧୧ ତାରିଖ ମଧ୍ୟରେ ଥାମାସ ଓ ଉବର କପ୍ ଫାଇନାଲ୍ସ ଆୟୋଜନ ହେବାର କାର୍ଯ୍ୟକ୍ରମ ରହିଛି। ପରିବର୍ତ୍ତିତ କ୍ୟାଲେଣ୍ଡରରେ ପ୍ରଥମଥର ପାଇଁ ଡେନ୍ମାର୍କରେ ଏହି ହାଇପ୍ରୋଫାଇଲ ଟୁର୍ନାମେଣ୍ଟ ଖେଳାଯିବ। ଥୋମାସ ଓ ଉବର କପ୍ ଫାଇନାଲ୍ସରେ ସିନ୍ଧୁ ଅଂଶଗ୍ରହଣ କରିବେ ନାହିଁ ବୋଲି ତାଙ୍କ ପିତା ପି.ଭି. ରମନ୍ନା କହିଛନ୍ତି। ତାଙ୍କର କିଛି ବ୍ୟକ୍ତିଗତ କାର୍ଯ୍ୟ ରହିଛି। ତେଣୁ ଦୁର୍ଭାଗ୍ୟଜନକ ଭାବେ ସେ ଏହି ଟୁର୍ନାମେଣ୍ଟରେ ଯୋଗ ଦେଇପାରିବେ ନାହିଁ ବୋଲି ରମନ୍ନା କହିଛନ୍ତି। ବ୍ୟାଡମିଣ୍ଟନ ଆସୋସିଏଶନ ଅଫ୍ ଇଣ୍ଡିଆ (ବିଏଆଇ)କୁ ଏ ନେଇ ସୂଚନା ଦେଇଛୁ ବୋଲି ସେ କହିଛନ୍ତି।
ଥୋମାସ ଓ ଉବର କପ୍ ଫାଇନାଲ୍ସ ପରେ ଡେନ୍ମାର୍କ ଓପନ ୧ ଅକ୍ଟୋବର ୧୩ରୁ ୧୮ ତାରିଖ ମଧ୍ୟରେ ଆୟୋଜନ ହେବ। ସେହିପରି ଡେନମାର୍କ ମାଷ୍ଟର୍ସ ଏହି ମାସ ୨୦ରୁ ୨୫ ତାରିଖ ମଧ୍ୟରେ ଆୟୋଜନ ହେବ। ଡେନ୍ମାର୍କରେ ସେ ଗୋଟିଏ ଟୁର୍ନାମେଣ୍ଟ ନ ଖେଳିପାରିନ୍ତି। ସବୁକିଛି ତାଙ୍କ ବ୍ୟକ୍ତିଗତ କାର୍ଯ୍ୟ ଉପରେ ନର୍ଭର କରେ ବୋଲି ରମନ୍ନା କହିଛନ୍ତି।
