ଭଦ୍ରକ ଅଫିସ,୧୩ା୨:୧୬ ନଂ. ଜାତୀୟ ରାଜପଥର ଭଦ୍ରକ ଜିଲାର ଆଖୁଆପଦାଠାରୁ ରାଣୀତାଲ ସୀମା ପର୍ଯ୍ୟନ୍ତ ୩୦ କି.ମି. ରାସ୍ତା ସମ୍ପ୍ରସାରଣ କାର୍ଯ୍ୟ ଅବଧି ସରିଯାଇଥିଲେ ମଧ୍ୟ କାର୍ଯ୍ୟ ସମ୍ପୂର୍ଣ୍ଣ ହୋଇପାରିନାହିଁ। ୨୦୧୮ରୁ ନିର୍ମାଣ କାର୍ଯ୍ୟ ଆରମ୍ଭ ହୋଇ ୨୦୨୧ରେ ଶେଷ ହେବା କଥା। ଏବେ ୨୦୨୩ ଫେବୃୟାରୀ ମାସ ହୋଇଥିଲେ ମଧ୍ୟ କାର୍ଯ୍ୟ ଶେଷ ହୋଇପାରିନାହିଁ। ବାରିକପୁର, ନଳାଙ୍ଗ, ଗେଲପୁର, ଆରଡ଼ିଛକରେ ଓଭରବ୍ରିଜ କାର୍ଯ୍ୟ ଧିମେଇ ଚାଲିଛି। ନିର୍ମାଣ କାର୍ଯ୍ୟ ବିଳମ୍ବ ହେଉଥିବାରୁ ପ୍ରତିଦିନ ଦୁର୍ଘଟଣା ବଢ଼ିଚାଲିଛି। ଗତ ୨ ବର୍ଷରେ ଗେଲପୁର ଛକଠାରୁ ରାଣୀତାଲ ପର୍ଯ୍ୟନ୍ତ ରାସ୍ତା ଦୁର୍ଘଟଣାରେ ୨୧ ଜଣଙ୍କ ଜୀବନ ଯାଇଥିବା ବେଳେ ଅନେକ ଗୁରୁତର ହୋଇଛନ୍ତି। ସ୍ଥାନୀୟ ଟ୍ରକ, ବସ୍ ସହିତ ରାଜପଥରେ ଆସୁଥିବା ସମସ୍ତ ଟ୍ରକ୍, ବସ୍ ଏହି ସର୍ଭିସ୍ ରୋଡ୍ରେ ଯାତାୟତ କରୁଥିବାରୁ ଦୁର୍ଘଟଣା ବଢ଼ିଚାଲିଛି। ଆରଡ଼ିଛକ, ବନ୍ତଛକ ଓ ଷ୍ଟାଡିୟମ ଛକ ଦେଇ ଯାଇଥିବା ଉଭୟ ପାର୍ଶ୍ୱର ସର୍ଭିସ ରୋଡ୍କୁ ଜାତୀୟ ରାଜପଥ କର୍ତ୍ତୃପକ୍ଷ ସଂକୀର୍ଣ୍ଣ କରି ଦେଇଥିବାରୁ ଏହା ମରଣଯନ୍ତା ପାଲଟିଛି। ଏତେ ଦୁର୍ଘଟଣା ପରେ ବି ଏସବୁ ସ୍ଥାନରେ ଟ୍ରାଫିକ ପୋଲିସର ବ୍ୟବସ୍ଥା କରାଯାଉ ନ ଥିବାରୁ ଟ୍ରକ୍, ବସ୍ ଦ୍ରୁତଗତିରେ ଚଳାଚଳ କରୁଛନ୍ତି। ଜାତୀୟ ରାଜପଥର ଭଦ୍ରକ ଏବେ ଡେଥ୍ଜୋନ୍ ପାଲଟିଛି। ଜାତୀୟ ରାଜପଥ କର୍ତ୍ତୃପକ୍ଷଙ୍କ ସହ ଏମ୍ପି ମଞ୍ଜୁଲତା ମଣ୍ଡଳ, ସ୍ଥାନୀୟ ବିଧାୟକ ସଞ୍ଜୀବ କୁମାର ମଲ୍ଲିକ, ଜିଲାପାଳ ସିଦ୍ଧେଶ୍ୱର ବଳିରାମ ବୋନ୍ଦର, ଭଣ୍ଡାରିପୋଖରୀ ବିଧାୟକ ପ୍ରଫୁଲ୍ଲ ସାମଲ, ଏମ୍ପିଙ୍କ ପ୍ରତିନିଧି ମୁକ୍ତିକାନ୍ତ ମଣ୍ଡଳ, ରାଜପଥର ଓଡ଼ିଶା ମୁଖ୍ୟ ରାମପ୍ରସାଦ ପଣ୍ଡା, ବାଲେଶ୍ୱର ପ୍ରକଳ୍ପ ନିର୍ଦ୍ଦେଶକ ଜେପି ବର୍ମା ପ୍ରମୁଖ ରାସ୍ତା ଓ ପୋଲ ନିର୍ମାଣ କାର୍ଯ୍ୟର କ୍ଷେତ୍ର ପରିଦର୍ଶନ କରି ବିଭିନ୍ନ ସମସ୍ୟା ସମ୍ପର୍କରେ ଆଲୋଚନା କରିଥିଲେ। ଏହି ପରିଦର୍ଶନ ସମୟରେ ତୁରନ୍ତ ନିର୍ମାଣ କାର୍ଯ୍ୟ ଶେଷ କରିବାକୁ ସ୍ଥାନୀୟ ଲୋକେ ଦାବି କରିଥିବା ବେଳେ ନିର୍ମାଣ କାର୍ଯ୍ୟ ତ୍ୱରାନ୍ନିତ କରିବା ପାଇଁ ଜିଲା ପ୍ରଶାସନ ଓ ଜନ ପ୍ରତିନିଧିମାନେ ଦୃଷ୍ଟି ଦେବାକୁ ଦାବି କରିଥିଲେ। ଜାତୀୟ ରାଜପଥ କର୍ର୍ତ୍ତୃୃପକ୍ଷ ନିର୍ମାଣ କାର୍ଯ୍ୟ ଖୁବ୍ ଶୀଘ୍ର ଶେଷ କରିବେ ବୋଲି ପ୍ରତିଶ୍ରୁତି ଦେଇଥିଲେ। କିନ୍ତୁ ଅଦ୍ୟାବଧି ସମସ୍ୟାର ସମାଧାନ ହୋଇପାରିନାହିଁ।
