ଗଞ୍ଜାମ,୧୦।୭(ବିଦ୍ୟାଧର ସାହୁ): ଗଞ୍ଜାମ ବ୍ଲକ ସନ୍ତୋଷପୁର ପଞ୍ଚାୟତ ଅଧୀନସ୍ଥ ସାତୁଲୀ ୟୁଥ୍ କ୍ଲବ୍ ଆନୁକୂଲ୍ୟରେ ଚାଲିଥିବା କ୍ରିକେଟ ଟୁର୍ନାମେଣ୍ଟର ଶୁକ୍ରବାର ଦିନ ସେମିଫାଇନାଲ ମ୍ୟାଚ୍ ଅନୁଷ୍ଠିତ ହୋଇଯାଇଛି। ଏହି ହାଇଭୋଲ୍ଟେଜ୍ ମ୍ୟାଚରେ ଅରୁଣପୁରକୁ ପରାସ୍ତ କରି ଅଙ୍ଗାରଗାଁ ଦଳ ଫାଇନାଲରେ ପ୍ରବେଶ କରିଛି।
ଏହି ସେମିଫାଇନାଲ ମ୍ୟାଚରେ ଛତ୍ରପୁର ବିଧାୟକ କୃଷ୍ଣଚନ୍ଦ୍ର ନାୟକ ମୁଖ୍ୟ ଅତିଥି ଭାବେ ଯୋଗଦେଇ ଖେଳାଳିମାନଙ୍କୁ ଉତ୍ସାହିତ କରିବା ସହ ମ୍ୟାଚର ଶୁଭାରମ୍ଭ କରିଥିଲେ। ଅରୁଣପୁର ଓ ଅଙ୍ଗାରଗାଁ ଦଳ ମଧ୍ୟରେ ଅନୁଷ୍ଠିତ ଏହି ମ୍ୟାଚରେ ଅଙ୍ଗାରଗାଁ ଦଳ ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା। ଦଳ ନିର୍ଦ୍ଧାରିତ ୧୦ ଓଭରରେ ୧୫୩ ରନର ଏକ ସ୍କୋର ଛିଡ଼ା କରିଥିଲା।
୧୫୪ ରନର ବିଜୟ ଲକ୍ଷ୍ୟକୁ ପିଛା କରି ଅରୁଣପୁର ଦଳ ଆରମ୍ଭରୁ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ଅଙ୍ଗାରଗାଁ ଦଳର ସାଉଣ୍ଡ ବୋଲିଂ ଆଗରେ ଆବଶ୍ୟକ ରନ କରି ନ ପାରି ଅରୁଣପୁର ଦଳ ସମ୍ପୂର୍ଣ୍ଣ ଅଲ୍ଆଉଟ୍ ହୋଇଯାଇଥିଲା। ଫଳରେ ଅଙ୍ଗାରଗାଁ ଦଳ ଏକ ଦମଦାର ବିଜୟ ସହ ଫାଇନାଲ ଟିକେଟ ହାସଲ କରିଛି।
ଆୟୋଜକଙ୍କ ସୂଚନା ଅନୁଯାୟୀ, ଏହି ସମ୍ପୂର୍ଣ୍ଣ ଟୁର୍ନାମେଣ୍ଟରେ ମୋଟ ୧୬ଟି ଦଳ ଅଂଶଗ୍ରହଣ କରିଥିଲେ। ଆସନ୍ତା ରବିବାର ଦିନ ଏହି ପ୍ରତିଯୋଗିତାର ମେଗା ଫାଇନାଲ ମ୍ୟାଚ୍ ଅନୁଷ୍ଠିତ ହେବ। ଏଥିରେ ଶକ୍ତିଶାଳୀ ମଧୁରଚୁଆ ଦଳ ଏବଂ ଅଙ୍ଗାରଗାଁ ଦଳ ମଧ୍ୟରେ ଏକ କଡ଼ା ମୁକାବିଲା ଦେଖିବାକୁ ମିଳିବ ବୋଲି କ୍ରୀଡ଼ାପ୍ରେମୀ ଓ ଦର୍ଶକମାନେ ଆଶା ରଖିଛନ୍ତି।
